מקור יחזקאל ז׳
1 וַיְהִ֥י דְבַר־יְהֹוָ֖ה אֵלַ֥י לֵאמֹֽר׃
2 וְאַתָּ֣ה בֶן־אָדָ֗ם כֹּֽה־אָמַ֞ר אֲדֹנָ֧י יֱהֹוִ֛ה לְאַדְמַ֥ת יִשְׂרָאֵ֖ל קֵ֑ץ בָּ֣א הַקֵּ֔ץ עַל־אַרְבַּ֖ע ארבעת כַּנְפ֥וֹת הָאָֽרֶץ׃
3 עַתָּה֙ הַקֵּ֣ץ עָלַ֔יִךְ וְשִׁלַּחְתִּ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כׇּל־תּוֹעֲבוֹתָֽיִךְ׃
4 וְלֹא־תָח֥וֹס עֵינִ֛י עָלַ֖יִךְ וְלֹ֣א אֶחְמ֑וֹל כִּ֣י דְרָכַ֜יִךְ עָלַ֣יִךְ אֶתֵּ֗ן וְתוֹעֲבוֹתַ֙יִךְ֙ בְּתוֹכֵ֣ךְ תִּֽהְיֶ֔יןָ וִידַעְתֶּ֖ם כִּי־אֲנִ֥י יְהֹוָֽה׃ פ
5 כֹּ֥ה אָמַ֖ר אֲדֹנָ֣י יֱהֹוִ֑ה רָעָ֛ה אַחַ֥ת רָעָ֖ה הִנֵּ֥ה בָאָֽה׃
6 קֵ֣ץ בָּ֔א בָּ֥א הַקֵּ֖ץ הֵקִ֣יץ אֵלָ֑יִךְ הִנֵּ֖ה בָּאָֽה׃
7 בָּ֧אָה הַצְּפִירָ֛ה אֵלֶ֖יךָ יוֹשֵׁ֣ב הָאָ֑רֶץ בָּ֣א הָעֵ֗ת קָר֛וֹב הַיּ֥וֹם מְהוּמָ֖ה וְלֹא־הֵ֥ד הָרִֽים׃
8 עַתָּ֣ה מִקָּר֗וֹב אֶשְׁפּ֤וֹךְ חֲמָתִי֙ עָלַ֔יִךְ וְכִלֵּיתִ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כׇּל־תּוֹעֲבוֹתָֽיִךְ׃
9 וְלֹא־תָח֥וֹס עֵינִ֖י וְלֹ֣א אֶחְמ֑וֹל כִּדְרָכַ֜יִךְ עָלַ֣יִךְ אֶתֵּ֗ן וְתוֹעֲבוֹתַ֙יִךְ֙ בְּתוֹכֵ֣ךְ תִּהְיֶ֔יןָ וִידַעְתֶּ֕ם כִּ֛י אֲנִ֥י יְהֹוָ֖ה מַכֶּֽה׃
10 הִנֵּ֥ה הַיּ֖וֹם הִנֵּ֣ה בָאָ֑ה יָֽצְאָה֙ הַצְּפִרָ֔ה צָ֚ץ הַמַּטֶּ֔ה פָּרַ֖ח הַזָּדֽוֹן׃
11 הֶחָמָ֥ס קָ֖ם לְמַטֵּה־רֶ֑שַׁע לֹא־מֵהֶ֞ם וְלֹ֧א מֵהֲמוֹנָ֛ם וְלֹ֥א מֶהֱמֵהֶ֖ם וְלֹא־נֹ֥הַּ בָּהֶֽם׃
12 בָּ֤א הָעֵת֙ הִגִּ֣יעַ הַיּ֔וֹם הַקּוֹנֶה֙ אַל־יִשְׂמָ֔ח וְהַמֹּכֵ֖ר אַל־יִתְאַבָּ֑ל כִּ֥י חָר֖וֹן אֶל־כׇּל־הֲמוֹנָֽהּ׃
13 כִּ֣י הַמֹּכֵ֗ר אֶל־הַמִּמְכָּר֙ לֹ֣א יָשׁ֔וּב וְע֥וֹד בַּחַיִּ֖ים חַיָּתָ֑ם כִּֽי־חָז֤וֹן אֶל־כׇּל־הֲמוֹנָהּ֙ לֹ֣א יָשׁ֔וּב וְאִ֧ישׁ בַּעֲוֺנ֛וֹ חַיָּת֖וֹ לֹ֥א יִתְחַזָּֽקוּ׃
14 תָּקְע֤וּ בַתָּק֙וֹעַ֙ וְהָכִ֣ין הַכֹּ֔ל וְאֵ֥ין הֹלֵ֖ךְ לַמִּלְחָמָ֑ה כִּ֥י חֲרוֹנִ֖י אֶל־כׇּל־הֲמוֹנָֽהּ׃
15 הַחֶ֣רֶב בַּח֔וּץ וְהַדֶּ֥בֶר וְהָרָעָ֖ב מִבָּ֑יִת אֲשֶׁ֤ר בַּשָּׂדֶה֙ בַּחֶ֣רֶב יָמ֔וּת וַאֲשֶׁ֣ר בָּעִ֔יר רָעָ֥ב וָדֶ֖בֶר יֹאכְלֶֽנּוּ׃
16 וּפָֽלְטוּ֙ פְּלִ֣יטֵיהֶ֔ם וְהָי֣וּ אֶל־הֶהָרִ֗ים כְּיוֹנֵ֧י הַגֵּאָי֛וֹת כֻּלָּ֖ם הֹמ֑וֹת אִ֖ישׁ בַּעֲוֺנֽוֹ׃
17 כׇּל־הַיָּדַ֖יִם תִּרְפֶּ֑ינָה וְכׇל־בִּרְכַּ֖יִם תֵּלַ֥כְנָה מָּֽיִם׃
18 וְחָגְר֣וּ שַׂקִּ֔ים וְכִסְּתָ֥ה אוֹתָ֖ם פַּלָּצ֑וּת וְאֶ֤ל כׇּל־פָּנִים֙ בּוּשָׁ֔ה וּבְכׇל־רָאשֵׁיהֶ֖ם קׇרְחָֽה׃
19 כַּסְפָּ֞ם בַּחוּצ֣וֹת יַשְׁלִ֗יכוּ וּזְהָבָם֮ לְנִדָּ֣ה יִֽהְיֶה֒ כַּסְפָּ֨ם וּזְהָבָ֜ם לֹא־יוּכַ֣ל לְהַצִּילָ֗ם בְּיוֹם֙ עֶבְרַ֣ת יְהֹוָ֔ה נַפְשָׁם֙ לֹ֣א יְשַׂבֵּ֔עוּ וּמֵעֵיהֶ֖ם לֹ֣א יְמַלֵּ֑אוּ כִּֽי־מִכְשׁ֥וֹל עֲוֺנָ֖ם הָיָֽה׃
20 וּצְבִ֤י עֶדְיוֹ֙ לְגָא֣וֹן שָׂמָ֔הוּ וְצַלְמֵ֧י תוֹעֲבֹתָ֛ם שִׁקּוּצֵיהֶ֖ם עָ֣שׂוּ ב֑וֹ עַל־כֵּ֛ן נְתַתִּ֥יו לָהֶ֖ם לְנִדָּֽה׃
21 וּנְתַתִּ֤יו בְּיַֽד־הַזָּרִים֙ לָבַ֔ז וּלְרִשְׁעֵ֥י הָאָ֖רֶץ לְשָׁלָ֑ל וחללוה וְחִלְּלֽוּהוּ׃
22 וַהֲסִבּוֹתִ֤י פָנַי֙ מֵהֶ֔ם וְחִלְּל֖וּ אֶת־צְפוּנִ֑י וּבָאוּ־בָ֥הּ פָּרִיצִ֖ים וְחִלְּלֽוּהָ׃ פ
23 עֲשֵׂ֖ה הָרַתּ֑וֹק כִּ֣י הָאָ֗רֶץ מָֽלְאָה֙ מִשְׁפַּ֣ט דָּמִ֔ים וְהָעִ֖יר מָלְאָ֥ה חָמָֽס׃
24 וְהֵֽבֵאתִי֙ רָעֵ֣י גוֹיִ֔ם וְיָרְשׁ֖וּ אֶת־בָּתֵּיהֶ֑ם וְהִשְׁבַּתִּי֙ גְּא֣וֹן עַזִּ֔ים וְנִחֲל֖וּ מְקַֽדְשֵׁיהֶֽם׃
25 קְפָ֖דָה־בָ֑א וּבִקְשׁ֥וּ שָׁל֖וֹם וָאָֽיִן׃
26 הֹוָ֤ה עַל־הֹוָה֙ תָּב֔וֹא וּשְׁמֻעָ֥ה אֶל־שְׁמוּעָ֖ה תִּֽהְיֶ֑ה וּבִקְשׁ֤וּ חָזוֹן֙ מִנָּבִ֔יא וְתוֹרָה֙ תֹּאבַ֣ד מִכֹּהֵ֔ן וְעֵצָ֖ה מִזְּקֵנִֽים׃
27 הַמֶּ֣לֶךְ יִתְאַבָּ֗ל וְנָשִׂיא֙ יִלְבַּ֣שׁ שְׁמָמָ֔ה וִידֵ֥י עַם־הָאָ֖רֶץ תִּבָּהַ֑לְנָה מִדַּרְכָּ֞ם אֶעֱשֶׂ֤ה אֹתָם֙ וּבְמִשְׁפְּטֵיהֶ֣ם אֶשְׁפְּטֵ֔ם וְיָדְע֖וּ כִּֽי־אֲנִ֥י יְהֹוָֽה׃ פ
פירוש רש"י על יחזקאל ז׳
1 בָּא הַקֵּץ. שֶׁאָמַרְתִּי ״וְנוֹשַׁנְתֶּם בָּאָרֶץ וְהִשְׁחַתֶּם וְגוֹ׳״, ״הַעִידֹתִי בָכֶם הַיּוֹם כִּי אָבֹד תֹּאבֵדוּן״ דברים ד:כה-כו; ״וְנוֹשַׁנְתֶּם״ – בְּגִימַטְרִיָּא שְׁמוֹנֶה מֵאוֹת חֲמִשִּׁים וּשְׁתַּיִם, וְהֵם נִשְׁתַּהוּ בָהּ שְׁמוֹנֶה מֵאוֹת וַחֲמִשִּׁים: אַרְבַּע מֵאוֹת וְאַרְבָּעִים מִשֶּׁנִּכְנְסוּ לָהּ עַד שֶׁנִּבְנָה הַבַּיִת מלכים א ו:א; במדבר יד:לג-לד, וְאַרְבַּע מֵאוֹת וְעֶשֶׂר שָׁנִים עָמַד הַבַּיִת יומא ט.:
2 רָעָה אַחַת רָעָה. רָעָה שְׁלֵימָה וּמְיֻחֶדֶת, לְמַעְלָה מִכָּל הָרָעוֹת, וְהוּא חֻרְבַּן הַבַּיִת:
3 הִנֵּה בָאָה. טַעְמוֹ בָּאָלֶ״ף, הוּא לְשׁוֹן פּוֹעֶלֶת:
4 בָּאָה הַצְּפִירָה. טַעְמוֹ לְמַעְלָה בַּבֵּי״ת, וְהוּא לְשׁוֹן פָּעֲלָה: כְּבָר בָּאָה הַצְּפִירָה – כְּמוֹ בָּא וְשָׁקַע מְאוֹר הַשַּׁחַר וְהַתִּפְאֶרֶת בָּא:
5 וְלֹא הֵד הָרִים. ״וְלָא לְאִשְׁתֵּיזָבָא בְּמִצְדֵי טוּרַיָּא״, וְהֵד – לְשׁוֹן צַעֲקַת הַכְרָזָה לָקוּם לִבְרוֹחַ אֶל רָאשֵׁי הֶהָרִים, כְּמוֹ ״הֵידָד הִשְׁבַּתִּי״ ישעיה טז:י, ״וְעָנוּ עָלֶיךָ הֵידָד״ ירמיה נא:יד, הַשְׁמָעַת קוֹל נוֹשֵׂא מַשָּׂא עֲנָבִים אֶל הַגַּת וְטוֹעֲנֵי הַקּוֹרָה:
6 מִקָּרוֹב. בִּמְהֵרָה:
7 הִנֵּה הַיּוֹם. הִנֵּה בָּא הַיּוֹם:
8 הִנֵּה בָאָה. הָרָעָה:
9 יָצְאָה הַצְּפִירָה. עָלָה הַשַּׁחַר שֶׁל יוֹם הָרָעָה:
10 צָץ הַמַּטֶּה. לְהַכּוֹת אֶתְכֶם:
11 פָּרַח הַזָּדוֹן. נִתְגַּלָּה נְבוּכַדְנֶצַּר הָרָשָׁע:
12 הֶחָמָס קָם וְגוֹ׳. הֶחָמָס אֲשֶׁר בְּיֶדְכֶם הוּא קָם עֲלֵיכֶם לְמַטֵּה רֶשַׁע לְשַׁחֶתְכֶם:
13 לֹא מֵהֶם. כָּךְ אָמַר הַקָּדוֹשׁ בָּרוּךְ הוּא לַמַּשְׁחִית: אֵינְךָ זָקוּק לְהַשְׁאִיר נֶפֶשׁ מֵרִשְׁעֵי יִשְׂרָאֵל, כִּי אֵין טוֹבָה יוֹצֵאת לֹא מֵהֶם וְלֹא מִבְּנֵיהֶם וְלֹא מֵהֲמוֹנָם:
14 וְלֹא נֹהַּ בָּהֶם. אֵין בָּהֶם נוֹהֶה אַחֲרַי, מְגַעְגֵּעַ וְנוֹתֵן לֵב אֵלַי; כְּמוֹ ״וַיִּנָּהוּ כָּל בֵּית יִשְׂרָאֵל אַחֲרֵי ה׳״ שמואל א ז:ב, וְלָשׁוֹן אֲרַמִּי הוּא: ״וְאִתְנְהִיאוּ לְפוּלְחָנָא״, לְשׁוֹן תַּאֲוָה וְגִעְגּוּעִין. וּמְנַחֵם חִבְּרוֹ לְשׁוֹן יְלָלָה, וְכֵן ״וַיִּנָּהוּ כָּל בֵּית יִשְׂרָאֵל״ פֵּרֵשׁ לְשׁוֹן יְלָלָה, וְאֵין בַּתֵּבָה רַק ה״א יְסוֹד:
15 וְהַמּוֹכֵר אַל יִתְאַבָּל. אַף עַל פִּי שֶׁדֶּרֶךְ הַמּוֹכֵר שָׂדֵהוּ לִהְיוֹת עָצֵב, אַל יִתְעַצֵּב, כִּי סוֹפְכֶם לִגְלוֹת:
16 כִּי הַמּוֹכֵר אֶל הַמִּמְכָּר לֹא יָשׁוּב. כְּשֶׁיִּגְלֶה בַּגּוֹלָה לֹא יָשׁוּב וְיִרְאֶה עוֹד הַשָּׂדֶה שֶׁמָּכַר, וְלָמָּה יִתְאַבֵּל?
17 וְעוֹד בַּחַיִּים חַיָּתָם. כָּל יְמֵי חַיֵּיהֶם לֹא יָשׁוּבוּ אֶל מְקוֹמָם:
18 כִּי חָזוֹן אֶל כָּל הֲמוֹנָהּ וגו׳. ״אֲרֵי נְבִיָּיא מִתְנַבְּן עַל כָּל אַתְרְגוּשְׁתְהוֹן לְמֵיתַב בִּתְיוּבְתָּא וְלָא תַּיְיבִין״ תרגום יונתן:
19 וְאִישׁ בַּעֲוֺנוֹ חַיָּתוֹ. כָּל אֶחָד מֵהֶם חַיָּתוֹ וְנַפְשׁוֹ דְּבוּקָה בַּעֲוֹנוֹ:
20 לֹא יִתְחַזָּקוּ. לֹא יְחַזְּקוּ לִבָּם עַל יִצְרָם הָרָע לָשׁוּב לְתוֹרָתָם:
21 תָּקְעוּ בַתָּקוֹעַ. כְּשֶׁיָּבֹא עֲלֵיהֶם הַצַּר הֵכִינוּ עַצְמָם לַמִּלְחָמָה, וְאֵין יוֹצֵא לְהִלָּחֵם:
22 כְּיוֹנֵי הַגֵּאָיוֹת. דֶּרֶךְ הַיּוֹנִים לְהִקָּבֵץ בַּגֵּאָיוֹת וְהוֹמוֹת שָׁם; וְהָיוּ הוֹמִים אֶל הֶהָרִים אֲשֶׁר יָנוּסוּ שָׁם אִישׁ בַּעֲוֺנוֹ, כְּיוֹנֵי הַגֵּאָיוֹת אֲשֶׁר כֻּלָּם הֹמוֹת:
23 תֵּלַכְנָה מָּיִם. מִזִּיעַת אֵימָה:
24 לְנִדָּה יִהְיֶה. לְשִׁקּוּץ יִהְיֶה לָהֶם:
25 וּצְבִי עֶדְיוֹ. שֶׁל הַקָּדוֹשׁ בָּרוּךְ הוּא אֲשֶׁר לְגָאוֹן שָׂמָהוּ לָהֶם, הוּא בֵּית הַמִּקְדָּשׁ שֶׁנִּקְרָא גְּאוֹן עֻזָּם, כְּמָה שֶׁנֶּאֱמַר ״הִנְנִי מְחַלֵּל אֶת מִקְדָּשִׁי גְּאוֹן עֻזְּכֶם״ יחזקאל כד:כא, הֵם גִּלּוּלֵי תוֹעֲבוֹת עָשׂוּ בוֹ עַל כֵּן וְגוֹ׳:
26 אֶת צְפוּנִי. אֶת הַמָּקוֹם שֶׁהָיִיתִי צָפוּן שָׁם בֵּינֵיהֶם:
27 עֲשֵׂה הָרַתּוֹק. שַׁלְשֶׁלֶת, אוֹת הוּא שֶׁיֵּלְכוּ בַּגּוֹלָה אֲסוּרִים בְּזִיקִים:
28 מִשְׁפַּט דָּמִים. ״חַיָּבֵי קְטוֹל״ תרגום יונתן:
29 רָעֵי גוֹיִם. רָעִים שֶׁבְּעוֹבְדֵי כּוֹכָבִים וּמַזָּלוֹת וְאַכְזָרִים:
30 וְנִחֲלוּ. וְיִתְנַחֲלוּ לַאֲחֵרִים:
31 מְקַדְּשֵׁיהֶם. בָּתֵּי הֵיכַל הַבָּמוֹת שֶׁהָיוּ נוֹעָדִים שָׁם, לְשׁוֹן בֵּית זִמּוּנָם:
32 קְפָדָה בָּא. כְּמוֹ ״קִפַּדְתִּי כָאֹרֵג חַיַּי״ ישעיהו לח:יב, לְשׁוֹן כְּרִיתָה:
33 הוֹוָה עַל הוֹוָה. מְאוֹרָע עַל מְאוֹרָע, הֲוָיָה אַחַר הֲוָיָה. וּמְנַחֵם חִבְּרוֹ לְשׁוֹן שֶׁבֶר:
34 וְתוֹרָה תֹּאבַד מִכֹּהֵן. הָרְגִילִים בְּהוֹרָאָה, כְּמוֹ שֶׁנֶּאֱמַר ״וְתוֹרָה יְבַקְשׁוּ מִפִּיהוּ״ מלאכי ב:ז: