רש"י על יחזקאל ל״ה

« רש"י על יחזקאל ל״ד:ל״א רש"י על יחזקאל ל״ו:ב׳ »

1 וַיְהִ֥י דְבַר־יְהֹוָ֖ה אֵלַ֥י לֵאמֹֽר׃

2 בֶּן־אָדָ֕ם שִׂ֥ים פָּנֶ֖יךָ עַל־הַ֣ר שֵׂעִ֑יר וְהִנָּבֵ֖א עָלָֽיו׃

3 וְאָמַ֣רְתָּ לּ֗וֹ כֹּ֤ה אָמַר֙ אֲדֹנָ֣י יֱהֹוִ֔ה הִנְנִ֥י אֵלֶ֖יךָ הַר־שֵׂעִ֑יר וְנָטִ֤יתִי יָדִי֙ עָלֶ֔יךָ וּנְתַתִּ֖יךָ שְׁמָמָ֥ה וּמְשַׁמָּֽה׃

4 עָרֶ֙יךָ֙ חׇרְבָּ֣ה אָשִׂ֔ים וְאַתָּ֖ה שְׁמָמָ֣ה תִֽהְיֶ֑ה וְיָדַעְתָּ֖ כִּֽי־אֲנִ֥י יְהֹוָֽה׃

5 יַ֗עַן הֱי֤וֹת לְךָ֙ אֵיבַ֣ת עוֹלָ֔ם וַתַּגֵּ֥ר אֶת־בְּנֵֽי־יִשְׂרָאֵ֖ל עַל־יְדֵי־חָ֑רֶב בְּעֵ֣ת אֵידָ֔ם בְּעֵ֖ת עֲוֺ֥ן קֵֽץ׃

6 לָכֵ֣ן חַי־אָ֗נִי נְאֻם֙ אֲדֹנָ֣י יֱהֹוִ֔ה כִּֽי־לְדָ֥ם אֶעֶשְׂךָ֖ וְדָ֣ם יִרְדְּפֶ֑ךָ אִם־לֹ֥א דָ֛ם שָׂנֵ֖אתָ וְדָ֥ם יִרְדְּפֶֽךָ׃

7 וְנָֽתַתִּי֙ אֶת־הַ֣ר שֵׂעִ֔יר לְשִֽׁמְמָ֖ה וּשְׁמָמָ֑ה וְהִכְרַתִּ֥י מִמֶּ֖נּוּ עֹבֵ֥ר וָשָֽׁב׃

8 וּמִלֵּאתִ֥י אֶת־הָרָ֖יו חֲלָלָ֑יו גִּבְעוֹתֶ֤יךָ וְגֵיאוֹתֶ֙יךָ֙ וְכׇל־אֲפִיקֶ֔יךָ חַלְלֵי־חֶ֖רֶב יִפְּל֥וּ בָהֶֽם׃

9 שִֽׁמְמ֤וֹת עוֹלָם֙ אֶתֶּנְךָ֔ וְעָרֶ֖יךָ לֹ֣א תישבנה תָשֹׁ֑בְנָה וִידַעְתֶּ֖ם כִּֽי־אֲנִ֥י יְהֹוָֽה׃

10 יַ֣עַן אֲ֠מׇרְךָ֠ אֶת־שְׁנֵ֨י הַגּוֹיִ֜ם וְאֶת־שְׁתֵּ֧י הָאֲרָצ֛וֹת לִ֥י תִהְיֶ֖ינָה וִֽירַשְׁנ֑וּהָ וַיהֹוָ֖ה שָׁ֥ם הָיָֽה׃ ס

11 לָכֵ֣ן חַי־אָ֗נִי נְאֻם֮ אֲדֹנָ֣י יֱהֹוִה֒ וְעָשִׂ֗יתִי כְּאַפְּךָ֙ וּכְקִנְאָ֣תְךָ֔ אֲשֶׁ֣ר עָשִׂ֔יתָה מִשִּׂנְאָתֶ֖יךָ בָּ֑ם וְנוֹדַ֥עְתִּי בָ֖ם כַּאֲשֶׁ֥ר אֶשְׁפְּטֶֽךָ׃

12 וְֽיָדַעְתָּ֮ כִּ֣י אֲנִ֣י יְהֹוָה֒ שָׁמַ֣עְתִּי אֶת־כׇּל־נָאָֽצוֹתֶ֗יךָ אֲשֶׁ֥ר אָמַ֛רְתָּ עַל־הָרֵ֥י יִשְׂרָאֵ֖ל לֵאמֹ֣ר שָׁמֵ֑מוּ שממה לָ֥נוּ נִתְּנ֖וּ לְאׇכְלָֽה׃

13 וַתַּגְדִּ֤ילוּ עָלַי֙ בְּפִיכֶ֔ם וְהַעְתַּרְתֶּ֥ם עָלַ֖י דִּבְרֵיכֶ֑ם אֲנִ֖י שָׁמָֽעְתִּי׃ ס

14 כֹּ֥ה אָמַ֖ר אֲדֹנָ֣י יֱהֹוִ֑ה כִּשְׂמֹ֙חַ֙ כׇּל־הָאָ֔רֶץ שְׁמָמָ֖ה אֶעֱשֶׂה־לָּֽךְ׃

15 כְּשִׂמְחָ֨תְךָ֜ לְנַחֲלַ֧ת בֵּֽית־יִשְׂרָאֵ֛ל עַ֥ל אֲשֶׁר־שָׁמֵ֖מָה כֵּ֣ן אֶעֱשֶׂה־לָּ֑ךְ שְׁמָמָ֨ה תִהְיֶ֤ה הַר־שֵׂעִיר֙ וְכׇל־אֱד֣וֹם כֻּלָּ֔הּ וְיָדְע֖וּ כִּי־אֲנִ֥י יְהֹוָֽה׃ פ

פירוש רש"י על יחזקאל ל״ה

1 וַתַּגֵּר. וְתַשְׁפֵּל, כְּמוֹ ״וְהִגַּרְתִּי לַגַּיְא אֲבָנֶיהָ״ מיכה א:ו; שֶׁהָיוּ מַסְגִּירִין אוֹתָן לְאוֹיְבֵיהֶן כְּשֶׁהָיוּ בּוֹרְחִין דֶּרֶךְ אַרְצָם, וְזוֹ הִיא שֶׁאָמַר ״אַל תַּעֲמֹד עַל הַפֶּרֶק״ עובדיה א:יד:

2 בְּעֵת אֵידָם. בְּעֵת כְּשֶׁמְּסַרְתִּים בְּיַד אוֹיֵב:

3 בְּעֵת עֲוֺן קֵץ. כְּשֶׁנִּגְמַר קֵץ עֲוֹנָם וְנִתְמַלְּאָה סְאָתָם על פי שוחר טוב י:

4 לְדָם אֶעֶשְׂךָ. נוֹפֵל בַּחֶרֶב שמואל ב ג:כט:

5 דָּם שָׂנֵאתָ. בָּזִיתָ אֶת הַבְּכוֹרָה, שֶׁעֲבוֹדָתִי הָיְתָה מְסוּרָה לָהֶם, וְשָׂנֵאתָ לִהְיוֹת מְלַכְלֵךְ עַצְמְךָ בְּדַם קָרְבַּן עֲבוֹדָתִי, וְלִכְלוּךְ דָּם הֲרוּגִים יִרְדְּפֶךָ בראשית רבה סג:יג. וְיֵשׁ אוֹמְרִים: רוֹצְחִים אַתָּה יָרֵא כְּשָׁאָר כָּל אָדָם, וְרוֹצְחִים יִרְדְּפוּךָ; וְיֵשׁ אוֹמְרִים: דָּם שָׂנֵאתָ אָחִיךָ, שֶׁהוּא בְּשָׂרְךָ וְדָמְךָ:

6 וְעָרֶיךָ לֹא תָשׁוֹבְנָה. לֹא כְּמוֹ שֶׁאָמַרְתִּי לְמִצְרַיִם ״וְשַׁבְתִּי אֶת שְׁבוּת מִצְרָיִם״ יחזקאל כט:יד; ״וְשַׁבְתִּי אֶת שְׁבוּת בְּנֵי עַמּוֹן״ ירמיהו מט:ו. וְזוֹ הִיא שֶׁאָמַר מַלְאָכִי ״וְאֶת עֵשָׂו שָׂנֵאתִי וָאֶתֵּן אֶת הָרָיו שְׁמָמָה״ מלאכי א:ג – שֶׁעֲתִידִים לְשִׁמְמוֹת עוֹלָם:

7 שְׁנֵי הַגּוֹיִם. יִשְׂרָאֵל וִיהוּדָה; וּמִדְרַשׁ אַגָּדָה רַבִּי תַּנְחוּמָא בראשית רבה סז:ח דּוֹרְשׁוֹ כְּלַפֵּי שֶׁהָלַךְ עֵשָׂו אֶל יִשְׁמָעֵאל לְהִתְחַתֵּן בּוֹ, לְהַשִּׂיאוֹ שֶׁיְּעוֹרֵר עַל יִצְחָק עַל יְרֻשַּׁת אַבְרָהָם, וְיַהֲרֹג יִשְׁמָעֵאל אֶת יִצְחָק, וְאֶהְיֶה אֲנִי גּוֹאֵל הַדָּם וְאֶהֱרֹג אֶת יִשְׁמָעֵאל. וְזֶהוּ ״יִקְרְבוּ יְמֵי אֵבֶל אָבִי״ בראשית כז:מא, וְאִירַשׁ אֲנִי אֶת יִצְחָק וְאֶת יִשְׁמָעֵאל:

8 וַה׳ שָׁם הָיָה. יוֹדֵעַ אֶת מַחְשְׁבוֹתֶיךָ:

9 וְעָשִׂיתִי כְּאַפְּךָ. כְּאוֹתָהּ הָאַף שֶׁעָשִׂיתָ לְיִשְׂרָאֵל, אֶעֱשֶׂה לְךָ:

10 וְנוֹדַעְתִּי בָם כַּאֲשֶׁר אֶשְׁפְּטֶךָ. אָז יַכִּירוּ אֶת גְּבוּרָתִי:

11 וְהַעְתַּרְתֶּם. הִרְבֵּיתֶם, וְכֵן ״וַעֲתַר עֲנַן הַקְּטֹרֶת״ יחזקאל ח:יא, לְשׁוֹן רִבּוּי:

12 כִּשְׂמֹחַ כָּל הָאָרֶץ. כְּשֶׁאֶטּוֹל אֲנִי אֶת מַלְכוּתִי, כִּי אָז תִּשְׂמַח הָאָרֶץ, כְּעִנְיָן שֶׁנֶּאֱמַר ״ה׳ מָלָךְ תָּגֵל הָאָרֶץ״ תהלים צז:א, אָז שְׁמָמָה אֶעֱשֶׂה לָּךְ:

« רש"י על יחזקאל ל״ד:ל״א רש"י על יחזקאל ל״ו:ב׳ »