מקור תהילים צ״ז
1 יְהֹוָ֣ה מָ֭לָךְ תָּגֵ֣ל הָאָ֑רֶץ יִ֝שְׂמְח֗וּ אִיִּ֥ים רַבִּֽים׃
2 עָנָ֣ן וַעֲרָפֶ֣ל סְבִיבָ֑יו צֶ֥דֶק וּ֝מִשְׁפָּ֗ט מְכ֣וֹן כִּסְאֽוֹ׃
3 אֵ֭שׁ לְפָנָ֣יו תֵּלֵ֑ךְ וּתְלַהֵ֖ט סָבִ֣יב צָרָֽיו׃
4 הֵאִ֣ירוּ בְרָקָ֣יו תֵּבֵ֑ל רָאֲתָ֖ה וַתָּחֵ֣ל הָאָֽרֶץ׃
5 הָרִ֗ים כַּדּוֹנַ֗ג נָ֭מַסּוּ מִלִּפְנֵ֣י יְהֹוָ֑ה מִ֝לִּפְנֵ֗י אֲד֣וֹן כׇּל־הָאָֽרֶץ׃
6 הִגִּ֣ידוּ הַשָּׁמַ֣יִם צִדְק֑וֹ וְרָא֖וּ כׇל־הָעַמִּ֣ים כְּבוֹדֽוֹ׃
7 יֵבֹ֤שׁוּ כׇּל־עֹ֬בְדֵי פֶ֗סֶל הַמִּֽתְהַלְלִ֥ים בָּאֱלִילִ֑ים הִשְׁתַּחֲווּ־ל֝֗וֹ כׇּל־אֱלֹהִֽים׃
8 שָׁמְעָ֬ה וַתִּשְׂמַ֨ח צִיּ֗וֹן וַ֭תָּגֵלְנָה בְּנ֣וֹת יְהוּדָ֑ה לְמַ֖עַן מִשְׁפָּטֶ֣יךָ יְהֹוָֽה׃
9 כִּֽי־אַתָּ֤ה יְהֹוָ֗ה עֶלְי֥וֹן עַל־כׇּל־הָאָ֑רֶץ מְאֹ֥ד נַ֝עֲלֵ֗יתָ עַל־כׇּל־אֱלֹהִֽים׃
10 אֹֽהֲבֵ֥י יְהֹוָ֗ה שִׂנְא֫וּ־רָ֥ע שֹׁ֭מֵר נַפְשׁ֣וֹת חֲסִידָ֑יו מִיַּ֥ד רְ֝שָׁעִ֗ים יַצִּילֵֽם׃
11 א֭וֹר זָרֻ֣עַ לַצַּדִּ֑יק וּֽלְיִשְׁרֵי־לֵ֥ב שִׂמְחָֽה׃
12 שִׂמְח֣וּ צַ֭דִּיקִים בַּיהֹוָ֑ה וְ֝הוֹד֗וּ לְזֵ֣כֶר קׇדְשֽׁוֹ׃ פ
פירוש רש"י על תהילים צ״ז
1 ה׳ מָלַךְ. בְּנָטְלוֹ הַמְּלוּכָה מֵעֲמָלֵק וּמִזַּרְעוֹ שמות יז:יד-טז:
2 תָּגֵל הָאָרֶץ. זֶהוּ שֶׁאָמַר יחזקאל לה:יד ״כִּשְׂמוֹחַ כָּל הָאָרֶץ שְׁמָמָה אֶעֱשֶׂה לָּךְ״, עַל עֲמָלֵק נִתְנַבֵּא כֵּן:
3 אֵשׁ לְפָנָיו תֵּלֵךְ. בְּמִלְחֶמֶת גּוֹג וּמָגוֹג, דִּכְתִיב בְּמִלְחַמְתּוֹ יחזקאל לח:כב ״וְנִשְׁפַּטְתִּי אִתּוֹ בְּדֶבֶר וּבְדָם וְגֶשֶׁם שׁוֹטֵף וְאַבְנֵי אֶלְגָּבִישׁ אֵשׁ וְגָפְרִית״:
4 בְּרָקָיו. זָהֳרוּרָיו, לָשׁוֹן ״לְמַעַן הֱיֹה לָהּ בָּרָק מוֹרָטָה״ יחזקאל כא:טו:
5 וַתָּחֵל. ״בַּיּוֹם הַהוּא יִהְיֶה רַעַשׁ גָּדוֹל עַל אַדְמַת יִשְׂרָאֵל וְרָעֲשׁוּ מִפָּנָיו דְּגֵי הַיָּם״ יחזקאל לח:יט-כ:
6 וַתָּחֵל. לְשׁוֹן ״חִיל כַּיּוֹלֵדָה״ תהלים מח:ז; מיכה ד:ט:
7 כַּדּוֹנַג נָמַסּוּ. דִּכְתִיב ״וְנֶהֶרְסוּ הֶהָרִים וְנָפְלוּ הַמַּדְרֵגוֹת״ יחזקאל לח:כ:
8 כַּדּוֹנַג. כְּשַׁעֲוָה:
9 יֵבֹשׁוּ כָּל עוֹבְדֵי פֶסֶל. דִּכְתִיב ישעיהו ב:יח ״וְהָאֱלִילִים כָּלִיל יַחֲלֹף״:
10 הַמִּתְהַלְלִים. הַמִּתְפָּאֲרִים לַעֲבוֹדַת גִּלּוּלִים:
11 מִשְׁפָּטֶיךָ. נִקְמָתְךָ:
12 אוֹר זָרוּעַ לַצַּדִּיק. זְרִיעָה מַמָּשׁ, מוּכֶנֶת לִצְמֹחַ לָהֶם: