מקור תהילים ס״א
1 לַמְנַצֵּ֬חַ עַֽל־נְגִינַ֬ת לְדָוִֽד׃
2 שִׁמְעָ֣ה אֱ֭לֹהִים רִנָּתִ֑י הַ֝קְשִׁ֗יבָה תְּפִלָּתִֽי׃
3 מִקְצֵ֤ה הָאָ֨רֶץ אֵלֶ֣יךָ אֶ֭קְרָא בַּעֲטֹ֣ף לִבִּ֑י בְּצוּר־יָר֖וּם מִמֶּ֣נִּי תַנְחֵֽנִי׃
4 כִּֽי־הָיִ֣יתָ מַחְסֶ֣ה לִ֑י מִגְדַּל־עֹ֝֗ז מִפְּנֵ֥י אוֹיֵֽב׃
5 אָג֣וּרָה בְ֭אׇהׇלְךָ עוֹלָמִ֑ים אֶ֥חֱסֶ֨ה בְסֵ֖תֶר כְּנָפֶ֣יךָ סֶּֽלָה׃
6 כִּֽי־אַתָּ֣ה אֱ֭לֹהִים שָׁמַ֣עְתָּ לִנְדָרָ֑י נָתַ֥תָּ יְ֝רֻשַּׁ֗ת יִרְאֵ֥י שְׁמֶֽךָ׃
7 יָמִ֣ים עַל־יְמֵי־מֶ֣לֶךְ תּוֹסִ֑יף שְׁ֝נוֹתָ֗יו כְּמוֹ־דֹ֥ר וָדֹֽר׃
8 יֵשֵׁ֣ב ע֭וֹלָם לִפְנֵ֣י אֱלֹהִ֑ים חֶ֥סֶד וֶ֝אֱמֶ֗ת מַ֣ן יִנְצְרֻֽהוּ׃
9 כֵּ֤ן אֲזַמְּרָ֣ה שִׁמְךָ֣ לָעַ֑ד לְֽשַׁלְּמִ֥י נְ֝דָרַ֗י י֣וֹם יֽוֹם׃ פ
פירוש רש"י על תהילים ס״א
1 מִקְּצֵה הָאָרֶץ. אַף עַל פִּי שֶׁאֲנִי רָחוֹק מֵאֲנָשַׁי שֶׁאֲנִי מְשַׁלֵּחַ עַל אוֹיְבַי לַמִּלְחָמָה:
2 אֵלֶיךָ אֶקְרָא בַּעֲטֹף לִבִּי. עֲלֵיהֶם. וְעַל מָה אֲנִי קוֹרֵא לְךָ? שֶׁתַּנְחֵנִי בְּצוּר – שֶׁהוּא רָם וְחָזָק מִמֶּנִּי:
3 אָגוּרָה בְאָהָלְךָ עוֹלָמִים. זַכֵּנִי בָּעוֹלָם הַזֶּה וּבָעוֹלָם הַבָּא בכורות לא::
4 נָתַתָּ יְרֻשַּׁת יִרְאֵי שְׁמֶךָ. הֶחֱזַרְתָּ עָרֵי יְרֻשָּׁתָם עַל יָדִי:
5 יָמִים עַל יְמֵי מֶלֶךְ תּוֹסִיף. אִם נִגְזַר עָלַי לָמוּת בָּחוּר, הוֹסִיף יָמִים עַל יָמַי, עַד שֶׁשְּׁנוֹתַי יִהְיוּ שִׁבְעִים שָׁנָה כְּמוֹ שְׁנֵי דֹר וָדֹר:
6 יֵשֵׁב. הַמֶּלֶךְ לְעוֹלָם לִפְנֵי אֱלֹהִים:
7 חֶסֶד וֶאֱמֶת. שֶׁהוּא עוֹסֵק בָּהֶם, יִהְיוּ מְזֻמָּנִים לְנָצְרוֹ:
8 מָן. הַזְמָנָה, כְּמוֹ ״וַיְמַן ה׳ קִיקָיוֹן״ יונה ד:ו:
9 כֵּן אֲזַמְּרָה. כְּמוֹ שֶׁתֵּיטִיב לִי, כֵּן אֲזַמְּרָה שִׁמְךָ, לִהְיוֹתִי מְשַׁלֵּם נְדָרַי יוֹם יוֹם: