מקור תהילים מ׳
1 לַ֝מְנַצֵּ֗חַ לְדָוִ֥ד מִזְמֽוֹר׃
2 קַוֺּ֣ה קִוִּ֣יתִי יְהֹוָ֑ה וַיֵּ֥ט אֵ֝לַ֗י וַיִּשְׁמַ֥ע שַׁוְעָתִֽי׃
3 וַיַּעֲלֵ֤נִי מִבּ֥וֹר שָׁאוֹן֮ מִטִּ֢יט הַיָּ֫וֵ֥ן וַיָּ֖קֶם עַל־סֶ֥לַע רַגְלַ֗י כּוֹנֵ֥ן אֲשֻׁרָֽי׃
4 וַיִּתֵּ֬ן בְּפִ֨י שִׁ֥יר חָדָשׁ֮ תְּהִלָּ֢ה לֵאלֹ֫הֵ֥ינוּ יִרְא֣וּ רַבִּ֣ים וְיִירָ֑אוּ וְ֝יִבְטְח֗וּ בַּיהֹוָֽה׃
5 אַ֥שְֽׁרֵי־הַגֶּ֗בֶר אֲשֶׁר־שָׂ֣ם יְ֭הֹוָה מִבְטַח֑וֹ וְֽלֹא־פָנָ֥ה אֶל־רְ֝הָבִ֗ים וְשָׂטֵ֥י כָזָֽב׃
6 רַבּ֤וֹת עָשִׂ֨יתָ אַתָּ֤ה יְהֹוָ֣ה אֱלֹהַי֮ נִ֥פְלְאֹתֶ֥יךָ וּמַחְשְׁבֹתֶ֗יךָ אֵ֫לֵ֥ינוּ אֵ֤ין עֲרֹ֬ךְ אֵלֶ֗יךָ אַגִּ֥ידָה וַאֲדַבֵּ֑רָה עָ֝צְמ֗וּ מִסַּפֵּֽר׃
7 זֶ֤בַח וּמִנְחָ֨ה לֹֽא־חָפַ֗צְתָּ אׇ֭זְנַיִם כָּרִ֣יתָ לִּ֑י עוֹלָ֥ה וַ֝חֲטָאָ֗ה לֹ֣א שָׁאָֽלְתָּ׃
8 אָ֣ז אָ֭מַרְתִּי הִנֵּה־בָ֑אתִי בִּמְגִלַּת־סֵ֝֗פֶר כָּת֥וּב עָלָֽי׃
9 לַ֥עֲשׂוֹת־רְצוֹנְךָ֣ אֱלֹהַ֣י חָפָ֑צְתִּי וְ֝ת֥וֹרָתְךָ֗ בְּת֣וֹךְ מֵעָֽי׃
10 בִּשַּׂ֤רְתִּי צֶ֨דֶק בְּקָ֘הָ֤ל רָ֗ב הִנֵּ֣ה שְׂ֭פָתַי לֹ֣א אֶכְלָ֑א יְ֝הֹוָ֗ה אַתָּ֥ה יָדָֽעְתָּ׃
11 צִדְקָתְךָ֬ לֹֽא־כִסִּ֨יתִי בְּת֬וֹךְ לִבִּ֗י אֱמוּנָתְךָ֣ וּתְשׁוּעָתְךָ֣ אָמָ֑רְתִּי לֹא־כִחַ֥דְתִּי חַסְדְּךָ֥ וַ֝אֲמִתְּךָ֗ לְקָהָ֥ל רָֽב׃
12 אַתָּ֤ה יְהֹוָ֗ה לֹֽא־תִכְלָ֣א רַחֲמֶ֣יךָ מִמֶּ֑נִּי חַסְדְּךָ֥ וַ֝אֲמִתְּךָ֗ תָּמִ֥יד יִצְּרֽוּנִי׃
13 כִּ֤י אָפְפֽוּ־עָלַ֨י רָע֡וֹת עַד־אֵ֬ין מִסְפָּ֗ר הִשִּׂיג֣וּנִי עֲ֭וֺנֹתַי וְלֹא־יָכֹ֣לְתִּי לִרְא֑וֹת עָצְמ֥וּ מִשַּׂעֲר֥וֹת רֹ֝אשִׁ֗י וְלִבִּ֥י עֲזָבָֽנִי׃
14 רְצֵ֣ה יְ֭הֹוָה לְהַצִּילֵ֑נִי יְ֝הֹוָ֗ה לְעֶזְרָ֥תִי חֽוּשָׁה׃
15 יֵ֘בֹ֤שׁוּ וְיַחְפְּר֨וּ יַחַד֮ מְבַקְשֵׁ֥י נַפְשִׁ֗י לִסְפּ֫וֹתָ֥הּ יִסֹּ֣גוּ אָ֭חוֹר וְיִכָּלְמ֑וּ חֲ֝פֵצֵ֗י רָעָתִֽי׃
16 יָ֭שֹׁמּוּ עַל־עֵ֣קֶב בׇּשְׁתָּ֑ם הָאֹמְרִ֥ים לִ֝֗י הֶ֘אָ֥ח הֶאָֽח׃
17 יָ֘שִׂ֤ישׂוּ וְיִשְׂמְח֨וּ בְּךָ֗ כׇּֽל־מְבַ֫קְשֶׁ֥יךָ יֹאמְר֣וּ תָ֭מִיד יִגְדַּ֣ל יְהֹוָ֑ה אֹ֝הֲבֵ֗י תְּשׁוּעָתֶֽךָ׃
18 וַאֲנִ֤י עָנִ֣י וְאֶבְיוֹן֮ אֲדֹנָ֢י יַחֲשׇׁ֫ב־לִ֥י עֶזְרָתִ֣י וּמְפַלְטִ֣י אַ֑תָּה אֱ֝לֹהַ֗י אַל־תְּאַחַֽר׃ פ
פירוש רש"י על תהילים מ׳
1 קַוֺּה קִוִּיתִי ה׳. בְּמִצְרַיִם, וּמִזְמוֹר זֶה גַּם הוּא כְּנֶגֶד כָּל יִשְׂרָאֵל:
2 וַיֵּט אֵלַי. אָזְנוֹ:
3 מִבּוֹר שָׁאוֹן. מֵאֲסִירִים שֶׁל מִצְרַיִם וּמִשָּׁאוֹן הֲמִיַּת יָם:
4 מִטִּיט הַיָּוֵן. מִן הַיָּם. הַיָּוֵן לְשׁוֹן רֶפֶשׁ, פיינ״ש בְּלַעַ״ז:
5 כּוֹנֵן. הֵכִין אֲשׁוּרַי וּצְעָדַי:
6 שִׁיר חָדָשׁ. שִׁירַת הַיָּם שמות טו:א-כו:
7 רְהָבִים. לְשׁוֹן גַּסּוּת, כְּמוֹ ״יִרְהֲבוּ הַנַּעַר״ ישעיהו ג:ה, ״שֶׁהֵם הִרְהִיבוּנִי״ שיר השירים ו:ה:
8 וְשָׂטֵי כָזָב. מְשַּׁטִים מִדֶּרֶךְ הַיָּשָׁר אַחֲרֵי הַכָּזָב. שָׂטֵי – אִיטוּרְנָ״אנְץ בְּלַעַ״ז:
9 נִפְלְאוֹתֶיךָ וּמַחְשְׁבֹתֶיךָ אֵלֵינוּ. בִּשְׁבִילֵנוּ בָּרָאתָ עוֹלָמְךָ, קָרַעְתָּ לָנוּ אֶת הַיָּם וְחָשַׁבְתָּ מֵרָחוֹק לְהֵיטִיב לָנוּ. אִחַרְתָּנוּ בַמִּדְבָּר אַרְבָּעִים שָׁנָה מִפְּנֵי הָאֱמוֹרִים, שֶׁקִּצְּצוּ אֶת הָאִילָנוֹת וְהֶחֱרִיבוּ אַרְצָם כְּשֶׁשָּׁמְעוּ שֶׁיִּשְׂרָאֵל יוֹצְאִין לָלֶכֶת לָרֶשֶׁת אֶת אַרְצָם מכילתא בשלח ויהי פתיחתא:
10 אֵין עֲרוֹךְ אֵלֶיךָ. אֵין לְדַמּוֹת לְךָ כָּל שַׂר וּמוֹשִׁיעַ, לְשׁוֹן עֵרֶךְ כְּמוֹ ״כְּעֶרְכְּךָ״ ויקרא כז:יב, אהפרישי״ר בְּלַעַ״ז:
11 אַגִּידָה וַאֲדַבֵּרָה. אִם בָּאתִי לְהַגִּיד וּלְדַבֵּר, עָצְמוּ מִסַּפֵּר:
12 זֶבַח וּמִנְחָה לֹא חָפַצְתָּ. בְּיוֹם מַתַּן תּוֹרָה כְּעִנְיָן שֶׁנֶּאֱמַר ״וְעַתָּה אִם תִּשְׁמַע בְּקוֹל ה׳ וְגוֹ׳״ שמות יט:ה, וְכֵן הוּא אוֹמֵר ״כִּי לֹא דִבַּרְתִּי אֶת אֲבוֹתֵיכֶם וְלֹא צִוִּיתִים וְגוֹ׳ עַל דִּבְרֵי עוֹלָה אוֹ זָבַח״ ירמיהו ז:כב ״כִּי יַקְרִיב מִכֶּם״ אָמַרְתִּי ויקרא א:ב וְלֹא הִזְקַקְתִּי חוֹבָה לְהַכְבִּיד עֲלֵיהֶם, תְּמִידִין וּמוּסָפִין אֵינָם אֶלָּא נַחַת רוּחַ שֶׁאָמַרְתִּי וְנַעֲשָׂה רְצוֹנִי וְדָבָר מוּעָט ס״א אינו:
13 אָזְנַיִם כָּרִיתָ לִּי. לֵאמֹר ״שִׁמְעוּ בְקוֹלִי״ ירמיה ז:כג:
14 כָּרִיתָ. עֲשִׂיתָם חֲלוּלִים לִשְׁמֹעַ:
15 אָז. בִּשְׁעַת מַתַּן תּוֹרָה אָמַרְתִּי לְפָנֶיךָ: הִנֵּה בָאתִי אֵלֶיךָ בִּמְסוֹרֶת בְּרִיתְךָ יחזקאל כ:לז, ״נַעֲשֶׂה וְנִשְׁמָע״ שמות כד:ז. דָּבָר זוֹ כָּתוּב עֵדוּת עָלַי בִּמְגִלַּת סֵפֶר. בְּתוֹרַת מֹשֶׁה:
16 וְתוֹרָתְךָ בְּתוֹךְ מֵעָי. אַף מַאֲכָלִי, עַל פִּי תוֹרָתְךָ הוּא:
17 בִּשַּׂרְתִּי צֶדֶק. שִׁירָה עַל הַיָּם שמות טו:א-כ, וְשִׁירָה עַל הַבְּאֵר במדבר כא:יז-כ, שִׁירַת דְּבוֹרָה שופטים ה:
18 לֹא אֶכְלָא. לֹא אֶמְנַע, לְשׁוֹן ״וַיִּכָּלֵא הַגֶּשֶׁם״ בראשית ח:ב:
19 לֹא תִכְלָא רַחֲמֶיךָ. לֹא תִמְנַע:
20 יִצְּרוּנִי. יִשְׁמְרוּנִי:
21 אָפְפוּ. סָבְבוּ:
22 לִסְפּוֹתָהּ. לְכַלּוֹתָהּ, כְּדִמְתַרְגְּמִינָן דברים ב:יד ״עַד תֹּם כָּל הַדּוֹר״ – ״עַד דְּסָף כָּל דָּרָא״:
23 יָשֹׁמּוּ. יִתְמָהוּ:
24 עַל עֵקֶב בָּשְׁתָּם. כְּשֶׁיְּקַבְּלוּ בָּשְׁתָּם עַל עֵקֶב, הַכֹּל בְּמִדָּה שֶׁמָּדְדוּ וּבְדֶרֶךְ שֶׁהָלְכוּ לְמוּלִי. עַל עֵקֶב ״וְעִקְּבוֹתֶיךָ לֹא נוֹדָעוּ״ תהלים עז:כ; ״צְאִי לָךְ בְּעִקְבֵי הַצֹּאן״ שיר השירים א:ח – כֻּלָּם לְשׁוֹן מִדְרַךְ כַּף רֶגֶל הֵם, טְרַצִי״שׁ בְּלַעַ״ז. עַל עֵקֶב אַנְצִי״שׁ טְרַצִ״ישׁ:
25 הָאוֹמְרִים לִי הֶאָח. הָאוֹמְרִים עָלַי בִּשְׁבִילִי הֶאָח, כְּשֶׁהַצָּרָה בָּאָה מִתְהַלְּלִים בְּאֵידִי. כָּל עָנִי וְאֶבְיוֹן שֶׁבִּתְהִלִּים אֵינוֹ אֶלָּא כְּנֶגֶד יִשְׂרָאֵל:
26 יַחֲשָׁב לִי. יִתֵּן לִי לֵב לַחֲשֹׁב עֲנִיּוּתִי וְאֶבְיוֹנוּתִי לְהוֹשִׁיעֵנִי:
27 יַחֲשָׁב לִי. פֶּנְשׁוֹיִי״ט בְּלַעַ״ז: