מקור איוב ל״ד
1 וַיַּ֥עַן אֱלִיה֗וּא וַיֹּאמַֽר׃
2 שִׁמְע֣וּ חֲכָמִ֣ים מִלָּ֑י וְ֝יֹדְעִ֗ים הַאֲזִ֥ינוּ לִֽי׃
3 כִּי־אֹ֭זֶן מִלִּ֣ין תִּבְחָ֑ן וְ֝חֵ֗ךְ יִטְעַ֥ם לֶאֱכֹֽל׃
4 מִשְׁפָּ֥ט נִבְחֲרָה־לָּ֑נוּ נֵדְעָ֖ה בֵינֵ֣ינוּ מַה־טּֽוֹב׃
5 כִּֽי־אָמַ֣ר אִיּ֣וֹב צָדַ֑קְתִּי וְ֝אֵ֗ל הֵסִ֥יר מִשְׁפָּטִֽי׃
6 עַל־מִשְׁפָּטִ֥י אֲכַזֵּ֑ב אָנ֖וּשׁ חִצִּ֣י בְלִי־פָֽשַׁע׃
7 מִי־גֶ֥בֶר כְּאִיּ֑וֹב יִֽשְׁתֶּה־לַּ֥עַג כַּמָּֽיִם׃
8 וְאָרַ֣ח לְ֭חֶבְרָה עִם־פֹּ֣עֲלֵי אָ֑וֶן וְ֝לָלֶ֗כֶת עִם־אַנְשֵׁי־רֶֽשַׁע׃
9 כִּֽי־אָ֭מַר לֹ֣א יִסְכׇּן־גָּ֑בֶר בִּ֝רְצֹת֗וֹ עִם־אֱלֹהִֽים׃
10 לָכֵ֤ן אַ֥נְשֵׁ֥י לֵבָ֗ב שִׁמְע֫וּ־לִ֥י חָלִ֖לָה לָאֵ֥ל מֵרֶ֗שַׁע וְשַׁדַּ֥י מֵעָֽוֶל׃
11 כִּ֤י פֹ֣עַל אָ֭דָם יְשַׁלֶּם־ל֑וֹ וּֽכְאֹ֥רַח אִ֝֗ישׁ יַמְצִאֶֽנּוּ׃
12 אַף־אׇמְנָ֗ם אֵ֥ל לֹֽא־יַרְשִׁ֑יעַ וְ֝שַׁדַּ֗י לֹא־יְעַוֵּ֥ת מִשְׁפָּֽט׃
13 מִֽי־פָקַ֣ד עָלָ֣יו אָ֑רְצָה וּמִ֥י שָׂ֝֗ם תֵּבֵ֥ל כֻּלָּֽהּ׃
14 אִם־יָשִׂ֣ים אֵלָ֣יו לִבּ֑וֹ רוּח֥וֹ וְ֝נִשְׁמָת֗וֹ אֵלָ֥יו יֶאֱסֹֽף׃
15 יִגְוַ֣ע כׇּל־בָּשָׂ֣ר יָ֑חַד וְ֝אָדָ֗ם עַל־עָפָ֥ר יָשֽׁוּב׃
16 וְאִם־בִּ֥ינָה שִׁמְעָה־זֹּ֑את הַ֝אֲזִ֗ינָה לְק֣וֹל מִלָּֽי׃
17 הַאַ֬ף שׂוֹנֵ֣א מִשְׁפָּ֣ט יַחֲב֑וֹשׁ וְאִם־צַדִּ֖יק כַּבִּ֣יר תַּרְשִֽׁיעַ׃
18 הַאֲמֹ֣ר לְמֶ֣לֶךְ בְּלִיָּ֑עַל רָ֝שָׁ֗ע אֶל־נְדִיבִֽים׃
19 אֲשֶׁ֤ר לֹֽא־נָשָׂ֨א פְּנֵ֥י שָׂרִ֗ים וְלֹ֣א נִכַּר־שׁ֭וֹעַ לִפְנֵי־דָ֑ל כִּֽי־מַעֲשֵׂ֖ה יָדָ֣יו כֻּלָּֽם׃
20 רֶ֤גַע יָמֻתוּ֮ וַחֲצ֢וֹת לָ֥֫יְלָה יְגֹעֲשׁ֣וּ עָ֣ם וְיַעֲבֹ֑רוּ וְיָסִ֥ירוּ אַ֝בִּ֗יר לֹ֣א בְיָֽד׃
21 כִּֽי־עֵ֭ינָיו עַל־דַּרְכֵי־אִ֑ישׁ וְֽכׇל־צְעָדָ֥יו יִרְאֶֽה׃
22 אֵֽין־חֹ֭שֶׁךְ וְאֵ֣ין צַלְמָ֑וֶת לְהִסָּ֥תֶר שָׁ֝֗ם פֹּ֣עֲלֵי אָֽוֶן׃
23 כִּ֤י לֹ֣א עַל־אִ֭ישׁ יָשִׂ֣ים ע֑וֹד לַהֲלֹ֥ךְ אֶל־אֵ֝֗ל בַּמִּשְׁפָּֽט׃
24 יָרֹ֣עַ כַּבִּירִ֣ים לֹא־חֵ֑קֶר וַיַּעֲמֵ֖ד אֲחֵרִ֣ים תַּחְתָּֽם׃
25 לָכֵ֗ן יַ֭כִּיר מַעְבָּדֵיהֶ֑ם וְהָ֥פַךְ לַ֝֗יְלָה וְיִדַּכָּֽאוּ׃
26 תַּֽחַת־רְשָׁעִ֥ים סְפָקָ֗ם בִּמְק֥וֹם רֹאִֽים׃
27 אֲשֶׁ֣ר עַל־כֵּ֭ן סָ֣רוּ מֵאַחֲרָ֑יו וְכׇל־דְּ֝רָכָ֗יו לֹ֣א הִשְׂכִּֽילוּ׃
28 לְהָבִ֣יא עָ֭לָיו צַעֲקַת־דָּ֑ל וְצַעֲקַ֖ת עֲנִיִּ֣ים יִשְׁמָֽע׃
29 וְה֤וּא יַשְׁקִ֨ט וּמִ֥י יַרְשִׁ֗עַ וְיַסְתֵּ֣ר פָּ֭נִים וּמִ֣י יְשׁוּרֶ֑נּוּ וְעַל־גּ֖וֹי וְעַל־אָדָ֣ם יָֽחַד׃
30 מִ֭מְּלֹךְ אָדָ֥ם חָנֵ֗ף מִמֹּ֥קְשֵׁי עָֽם׃
31 כִּֽי־אֶל־אֵ֭ל הֶאָמַ֥ר נָשָׂ֗אתִי לֹ֣א אֶחְבֹּֽל׃
32 בִּלְעֲדֵ֣י אֶ֭חֱזֶה אַתָּ֣ה הֹרֵ֑נִי אִֽם־עָ֥וֶל פָּ֝עַ֗לְתִּי לֹ֣א אֹסִֽיף׃
33 הֲֽמֵעִמְּךָ֬ יְשַׁלְּמֶ֨נָּה כִּֽי־מָאַ֗סְתָּ כִּֽי־אַתָּ֣ה תִבְחַ֣ר וְלֹא־אָ֑נִי וּֽמַה־יָּדַ֥עְתָּ דַבֵּֽר׃
34 אַנְשֵׁ֣י לֵ֭בָב יֹ֣אמְרוּ לִ֑י וְגֶ֥בֶר חָ֝כָ֗ם שֹׁמֵ֥עַֽ לִֽי׃
35 אִ֭יּוֹב לֹא־בְדַ֣עַת יְדַבֵּ֑ר וּ֝דְבָרָ֗יו לֹ֣א בְהַשְׂכֵּֽיל׃
36 אָבִ֗י יִבָּחֵ֣ן אִיּ֣וֹב עַד־נֶ֑צַח עַל־תְּ֝שֻׁבֹ֗ת בְּאַנְשֵׁי־אָֽוֶן׃
37 כִּ֥י־יֹ֘סִ֤יף עַֽל־חַטָּאת֣וֹ פֶ֭שַׁע בֵּינֵ֣ינוּ יִשְׂפּ֑וֹק וְיֶ֖רֶב אֲמָרָ֣יו לָאֵֽל׃ פ
פירוש רש"י על איוב ל״ד
1 מענה אליהו: כִּי אֹזֶן מִלִּין תִּבְחָן. כַּאֲשֶׁר הַחֵיךְ יִטְעַם הָאֹכֶל:
2 מִשְׁפָּטִי. הוֹכָחַת דְּבָרִים:
3 אֲכַזֵּב. אֲכַזִּיב שׁוֹפְטִי, שֶׁלֹּא דָנַנִּי אֱמֶת:
4 אָנוּשׁ. חוֹלֶה מַכָּתִי, כְּמוֹ ״וַיֵּאָנַשׁ״ שמואל ב יב:טו:
5 חִצִּי. נִגְעִי:
6 לֹא יִסְכָּן גָּבֶר. לֹא יֵהָנֶה אָדָם, אִם מַתְמִים דְּרָכָיו:
7 מִי פָקַד עָלָיו אָרְצָה. מִי מוֹשֵׁל בּוֹ, לֵאמֹר: לָמָּה כֵּן עָשִׂיתָ וְלֹא צִוִּיתִיךָ כֵּן? כִּי מִי צִוָּהוּ בְּמֶמְשַׁלְתּוֹ, וְלָמָּה יִמְצָא תּוֹאֲנוֹת לַבְּרִיּוֹת? אֵינוֹ צָרִיךְ לְהָשִׁיב דָּבָר לְמוֹשֵׁל בּוֹ, לֵאמֹר: בִּשְׁבִיל זֹאת הֲרֵעוֹתִי לוֹ:
8 אִם יָשִׂים אֵלָיו לִבּוֹ. עַל אָדָם, לְהַשְׁחִיתוֹ, לָמָּה יָבֹא בַּעֲלִילָה עָלָיו? הֲרֵי מִיָּד יֶאֱסֹף אֵלָיו רוּחוֹ וְנִשְׁמָתוֹ. רוּחַ וּנְשָׁמָה שֶׁלּוֹ שֶׁהִיא נְפוּחָה בּוֹ, וְאֵין מוֹחֶה בְּיָדוֹ, וְיִגְוַע כָּל בָּשָׂר יָחַד:
9 וְאִם בִּינָה. וְאִם אַתָּה רוֹצֶה הָבִין, שִׁמְעָה זֹאת. בִּינָה זוֹ אֵינָהּ שֵׁם דָּבָר, אֶלָּא לְשׁוֹן צִוּוּי, כְּמוֹ ״בִּינָה הֲגִיגִי״ תהלים ה:ב. לְפִיכָךְ שְׁתַּיִם אֵלּוּ טַעֲמָן לְמַעְלָה, בַּבֵּי״ת, וְכָל שְׁאָר בִּינָה טַעֲמָן לְמַטָּה, בַּנּוּ״ן:
10 הַאַף שׂוֹנֵא מִשְׁפָּט. מִשְׁפָּטוֹ שֶׁל שׁוֹפֵט צֶדֶק יַחֲבוֹשׁ הַמָּקוֹם? וְאִם תֹּאמַר: אֵינוֹ מִשְׁפָּט, כִּי לֹא כַדִּין עָשָׂה, אֶפְשָׁר זֹאת מִי שֶׁהוּא צַדִּיק מְאֹד תַּרְשִׁיעַ?
11 כַּבִּיר. לְשׁוֹן מְאֹד:
12 הַאֲמֹר לְמֶלֶךְ בְּלִיָּעַל. וְכִי הָגוּן וְרָאוּי לֹאמַר לְמֶלֶךְ: בְּלִיָּעַל, וְלֹאמַר רָשָׁע אֶל נְדִיבִים?!
13 אֲשֶׁר לֹא נָשָׂא פְּנֵי שָׂרִים. כְּלוֹמַר: לְמֶלֶךְ עוֹלָם, אֲשֶׁר אֵין מַשּׂוֹא פָנִים לְפָנָיו:
14 שׁוֹעַ. שַׂר, כְּמוֹ ״וְלַכִּילַי לֹא יֵאָמֵר שׁוֹעַ״ ישעיהו לב:ה:
15 רֶגַע יָמוּתוּ. כְּשֶׁיִּרְצֶה:
16 וַחֲצוֹת לָיְלָה. כְּמוֹ שֶׁעָשָׂה לְמִצְרַיִם שמות יא:ד-ח:
17 יְגֹעֲשׁוּ עָם. כְּלוֹמַר: בְּרֶגַע יַעַבְרוּ:
18 וְיָסִירוּ אַבִּיר. כֹּחַ שֶׁלָּהֶם:
19 לֹא בְיָד. לֹא יִשְׁנוּ בְיָדָם וְאֵין לָהֶם כֹּחַ:
20 כִּי לֹא עַל אִישׁ יָשִׂים עוֹד. כְּלוֹמַר: אָמַרְתָּ: ״לֹא אַךְ יָשִׂים בִּי״ איוב כג:ו, רַק חֲטָאַי לְבַדִּי; וַאֲנִי מְשִׁיבְךָ: לֹא יָשִׂים הַקָּדוֹשׁ בָּרוּךְ הוּא עַל בְּרִיּוֹתָיו עֲלִילוֹת תּוֹסֶפֶת עַל פִּשְׁעָם. עוֹד לְשׁוֹן תּוֹסֶפֶת:
21 לָהֲלֹךְ אֶל אֵל בַּמִּשְׁפָּט. כְּשֶׁהוּא בָּא עַל בְּרִיּוֹתָיו לְהִתְוַכֵּחַ עִמָּהֶם:
22 יָרֹעַ. יְרוֹצֵץ, כְּמוֹ ״רֹעַ הִתְרוֹעֲעָה״ ישעיה כד:יט:
23 וַיַּעֲמֵד אֲחֵרִים. בִּמְקוֹמָם:
24 לָכֵן יַכִּיר מַעְבָּדֵיהֶם. לְפִי שֶׁהוּא מַכִּיר מַעְבָּדֵיהֶם הַטּוֹב וְהָרַע, וְאֵין צֹרֶךְ לוֹ לְהִתְוַכֵּחַ:
25 וְהָפַךְ לַיְלָה. עֵת חֹשֶׁךְ וְצָרָה לָהֶם, וְיִדַּכָּאוּ:
26 תַּחַת רְשָׁעִים. בִּמְקוֹמָם:
27 סְפָקָם. לְאַנְשֵׁי סְדוֹם בראשית יט:א-כט:
28 בִּמְקוֹם רוֹאִים. לְעֵין כֹּל:
29 אֲשֶׁר עַל כֵּן סָרוּ מֵאַחֲרָיו. כְּמוֹ ״עַל כֵּן יָדַעְתָּ חֲנֹתֵנוּ בַּמִּדְבָּר״ במדבר י:לא. כְּמוֹ: מִפְּנֵי אֲשֶׁר סָרוּ מֵאַחֲרָיו וְהֵבִיאוּ לְפָנָיו וְעָלָיו צַעֲקַת דַּלִּים:
30 וְהוּא יַשְׁקִיט. מַשְׁקִיט אֶת הַדַּלִּים מֵאוֹתָן הָעוֹשְׁקִים, וּמִי יַרְשִׁיעַ עוֹד? וּבְעוֹד שֶׁהִסְתִּיר פָּנִים, מִי יְשׁוּרֶנּוּ?
31 וְעַל גּוֹי וְעַל אָדָם יָחַד. כִּיחִידִים כִּמְרֻבִּים שָׁוֶה לְפָנָיו, לְהַשְׁקִיט וּלְהַסְתִּיר פָּנִים:
32 מִמְּלֹךְ אָדָם חָנֵף מִמֹּקְשֵׁי עָם. עַל דַּלִּים שֶׁמָּלַךְ:
33 מִמּוֹקְשֵׁי עָם. עָוֹן, וְלֵאלוֹהַּ כָּזֶה לֹא הָיָה לְךָ לוֹמַר ״בְּלִיַּעַל״ וְ״רָשָׁע״ איוב לד:יח:
34 כִּי אֶל אֵל הֶאָמַר. לְהֵאָמֵר אֵלָיו. נָכוֹן וְרָאוּי מֵאֵת כָּל סוֹבְלֵי יִסּוּרִים לְהֵאָמֵר: נָשָׂאתִי, וּמְקַבֵּל וְסוֹבֵל אֲנִי מִשְׁפָּטֶיךָ, וְלֹא אֶחְבֹּל בְּעַצְמִי. וְעוֹד צָרִיךְ הַנִּדּוֹן לוֹמַר:
35 בִּלְעֲדֵי אֶחֱזֶה. לְבַד מַה שֶּׁאֲנִי יוֹדֵעַ לִרְאוֹת וּלְהָבִין בִּדְבָרֶיךָ, אַתָּה הוֹרֵנִי, וְאִם אָוֶן פָּעַלְתִּי, לֹא אוֹסִיף:
36 הַמֵעִמְּךָ יְשַׁלְּמֶנָּהּ כִּי מָאַסְתָּ וְגוֹ׳. כָּךְ אָמַר אֱלִיהוּ לְאִיּוֹב: הַמֵעִמְּךָ הָיָה לוֹ לְהַקָּדוֹשׁ בָּרוּךְ הוּא לְהִמָּלֵךְ בְּפֵרָעוֹן תַּשְׁלוּמִין מִמְּךָ?
37 כִּי מָאַסְתָּ. לֵאמֹר: ״מָאַסְתִּי לֹא לְעוֹלָם אֶחְיֶה״ איוב ז:טז, ״יַתֵּר יָדוֹ וִיבַצְּעֵנִי״ איוב ו:ט?! סָבוּר אַתָּה שֶׁיִּגְבֶּה מִמְּךָ לְפִי דַעְתְּךָ וּרְצוֹנְךָ, וְאַתָּה תִבְחַר הַתַּשְׁלוּמִין, וְלֹא אֲנִי? בִּמְקוֹם הַקָּדוֹשׁ בָּרוּךְ הוּא דִּבֵּר אֱלִיהוּ, בִּתְמִיהַּ:
38 אַנְשֵׁי לֵבָב יֹאמְרוּ לִי. כִּי אִיּוֹב לֹא בְדַעַת יְדַבֵּר:
39 אָבִי יִבָּחֵן. אָבִי. אַתָּה הַקָּדוֹשׁ בָּרוּךְ הוּא אָב לַכֹּל, הַלְוַאי יִבָּחֵן אִיּוֹב עַד נֶצַח, לְמַעַן תִּהְיֶה תְּשׁוּבָה לְאַנְשֵׁי אָוֶן. וְאַף לִבְנֵי אָדָם דִּבֵּר הַכָּתוּב כֵּן, כְּמוֹ ״אָבִי דָּבָר גָּדוֹל וְגוֹ׳״ מלכים ב ה:יג. דָּבָר אַחֵר: אָבִי. כְּמוֹ ״וְתָפֵר הָאֲבִיּוֹנָה״ קהלת יב:ה, לְשׁוֹן רָצוֹן. כָּךְ חִבְּרוֹ מְנַחֵם. וְכֵן פִּתְרוֹנוֹ: אָבִי יִבָּחֵן אִיּוֹב עַד נֶצַח. רְצוֹנִי וּמְאַוְּיִי שֶׁיִּבָּחֵן אִיּוֹב עַד נֶצַח סא״א.
40 יִסְפּוֹק. לְשׁוֹן רוֹב דְּבָרִים וַהֲרָמַת קוֹל:
41 בֵּינֵינוּ יִסְפּוֹק. הוּא אוֹמֵר: מַה לָּנוּ וּלְדִבְרֵי אִיּוֹב? ״אַף אָמְנָם שָׁגִיתִי אִתִּי תָּלִין״ איוב יט:ד! וְאֵינוֹ יוֹדֵעַ שֶׁאָנוּ נֶעֱנָשִׁים, וּמַסְפִּיק לָנוּ עֲוֹנוֹת, עַל שֶׁאָנוּ שׁוֹמְעִים. כָּךְ מְפֹרָשׁ בְּוַיִּקְרָא רַבָּה ויקרא רבה ד:ו: