רש"י על איוב י״ד

« רש"י על איוב י״ג:כ״ח רש"י על איוב ט״ו:ב׳ »

מקור איוב י״ד

1 אָ֭דָם יְל֣וּד אִשָּׁ֑ה קְצַ֥ר יָ֝מִ֗ים וּֽשְׂבַֽע־רֹֽגֶז׃

2 כְּצִ֣יץ יָ֭צָא וַיִּמָּ֑ל וַיִּבְרַ֥ח כַּ֝צֵּ֗ל וְלֹ֣א יַעֲמֽוֹד׃

3 אַף־עַל־זֶ֭ה פָּקַ֣חְתָּ עֵינֶ֑ךָ וְאֹ֘תִ֤י תָבִ֖יא בְמִשְׁפָּ֣ט עִמָּֽךְ׃

4 מִֽי־יִתֵּ֣ן טָ֭הוֹר מִטָּמֵ֗א לֹ֣א אֶחָֽד׃

5 אִ֥ם־חֲרוּצִ֨ים יָמָ֗יו מִֽסְפַּר־חֳדָשָׁ֥יו אִתָּ֑ךְ חֻקָּ֥ו עָ֝שִׂ֗יתָ וְלֹ֣א יַעֲבֹֽר׃

6 שְׁעֵ֣ה מֵעָלָ֣יו וְיֶחְדָּ֑ל עַד־יִ֝רְצֶ֗ה כְּשָׂכִ֥יר יוֹמֽוֹ׃

7 כִּ֤י יֵ֥שׁ לָעֵ֗ץ תִּ֫קְוָ֥ה אִֽם־יִ֭כָּרֵת וְע֣וֹד יַחֲלִ֑יף וְ֝יֹנַקְתּ֗וֹ לֹ֣א תֶחְדָּֽל׃

8 אִם־יַזְקִ֣ין בָּאָ֣רֶץ שׇׁרְשׁ֑וֹ וּ֝בֶעָפָ֗ר יָמ֥וּת גִּזְעֽוֹ׃

9 מֵרֵ֣יחַ מַ֣יִם יַפְרִ֑חַ וְעָשָׂ֖ה קָצִ֣יר כְּמוֹ־נָֽטַע׃

10 וְגֶ֣בֶר יָ֭מוּת וַֽיֶּחֱלָ֑שׁ וַיִּגְוַ֖ע אָדָ֣ם וְאַיּֽוֹ׃

11 אָֽזְלוּ־מַ֭יִם מִנִּי־יָ֑ם וְ֝נָהָ֗ר יֶחֱרַ֥ב וְיָבֵֽשׁ׃

12 וְאִ֥ישׁ שָׁכַ֗ב וְֽלֹא־יָ֫ק֥וּם עַד־בִּלְתִּ֣י שָׁ֭מַיִם לֹ֣א יָקִ֑יצוּ וְלֹֽא־יֵ֝עֹ֗רוּ מִשְּׁנָתָֽם׃

13 מִ֤י יִתֵּ֨ן בִּשְׁא֬וֹל תַּצְפִּנֵ֗נִי תַּ֭סְתִּירֵנִי עַד־שׁ֣וּב אַפֶּ֑ךָ תָּ֤שִֽׁית־לִ֖י חֹ֣ק וְתִזְכְּרֵֽנִי׃

14 אִם־יָמ֥וּת גֶּ֗בֶר הֲיִֽ֫חְיֶ֥ה כׇּל־יְמֵ֣י צְבָאִ֣י אֲיַחֵ֑ל עַד־בּ֝֗וֹא חֲלִיפָתִֽי׃

15 תִּ֭קְרָא וְאָנֹכִ֣י אֶעֱנֶ֑ךָּ לְֽמַעֲשֵׂ֖ה יָדֶ֣יךָ תִכְסֹֽף׃

16 כִּֽי־עַ֭תָּה צְעָדַ֣י תִּסְפּ֑וֹר לֹֽא־תִ֝שְׁמֹ֗ר עַל־חַטָּאתִֽי׃

17 חָתֻ֣ם בִּצְר֣וֹר פִּשְׁעִ֑י וַ֝תִּטְפֹּ֗ל עַל־עֲוֺנִֽי׃

18 וְ֭אוּלָם הַר־נוֹפֵ֣ל יִבּ֑וֹל וְ֝צ֗וּר יֶעְתַּ֥ק מִמְּקֹמֽוֹ׃

19 אֲבָנִ֤ים שָׁ֥חֲקוּ מַ֗יִם תִּשְׁטֹֽף־סְפִיחֶ֥יהָ עֲפַר־אָ֑רֶץ וְתִקְוַ֖ת אֱנ֣וֹשׁ הֶאֱבַֽדְתָּ׃

20 תִּתְקְפֵ֣הוּ לָ֭נֶצַח וַֽיַּהֲלֹ֑ךְ מְשַׁנֶּ֥ה פָ֝נָ֗יו וַֽתְּשַׁלְּחֵֽהוּ׃

21 יִכְבְּד֣וּ בָ֭נָיו וְלֹ֣א יֵדָ֑ע וְ֝יִצְעֲר֗וּ וְֽלֹא־יָבִ֥ין לָֽמוֹ׃

22 אַךְ־בְּ֭שָׂרוֹ עָלָ֣יו יִכְאָ֑ב וְ֝נַפְשׁ֗וֹ עָלָ֥יו תֶּאֱבָֽל׃ פ

פירוש רש"י על איוב י״ד

1 אַף עַל זֶה. הַהֶבֶל וְהַנִּרְקָב:

2 פָּקַחְתָּ עֵינֶיךָ. לְדַקְדֵּק בַּחֲטָאָיו:

3 וְאוֹתִי. אַתָּה מֵבִיא בְמִשְׁפָּט עַל עֲווֹנוֹתַי:

4 מִי יִתֵּן טָהוֹר. מִדְּבַר טִפָּה סְרוּחָה וְשִׁכְבַת זֶרַע שֶׁהוּא טָמֵא. לֹא אֶחָד בָּהֶם טָהוֹר, שֶׁלֹּא יֶחֱטָא:

5 אִם חֲרוּצִים יָמָיו. אִם גְּמוּל זֶה הוּא מִשְׁתַּלֵּם, שֶׁחֲרוּצִים וּקְצוּבִים לְיוֹם קָבוּעַ וּמְיֻעָד לְמִיתָה:

6 וּמִסְפַּר חֳדָשָׁיו אִתָּךְ. קְצוּבִים, וְחֹק זֶה עָשִׂיתָ לוֹ וְלֹא יִתְקַיֵּם עוֹד יוֹתֵר בָּעוֹלָם – דַּי לְךָ בַּתַּשְׁלוּמִין הַלָּלוּ:

7 שְׁעֵה מֵעָלָיו. בְּאוֹתוֹ מִעוּט חָרַץ הַיָּמִים, וְיֶחְדַּל לוֹ מִמַּכְאוֹב, עַד יִרְצֶה בְּזִקְנוּתוֹ וְתַשּׁוּת כֹּחוֹ אֶת יוֹם מוֹתוֹ כְּשָׂכִיר הָרוֹצֶה לְהַשְׁלָמַת עֲבוֹדַת יוֹמוֹ. כִּי עֲבִירָתוֹ מִן הָעוֹלָם חֲלוּטָה וְנִצְמֶתֶת מִשְּׁאָר כָּל הָעוֹבְרִים:

8 כִּי יֵשׁ לָעֵץ תִּקְוָה. שֶׁיַּחֲלֹף:

9 וְיֹנַקְתּוֹ. אֲשֶׁר מִגִּזְעוֹ לֹא תֶחְדָּל מִהְיוֹת עָנָף:

10 וְעָשָׂה קָצִיר. הִיא יוֹנֶקֶת, כְּמוֹ ״תְּשַׁלַּח קְצִירֶיהָ עַד יָם״ תהילים פ:יב:

11 נָטַע. שֵׁם דָּבָר הוּא, וְטַעַם הֲבָרָתוֹ לְמַעְלָה בַּנּוּ״ן, וְנִנְקַד כֻּלּוֹ קָמַץ מִפְּנֵי שֶׁהוּא סוֹף פָּסוּק. אַף מִגִּזְרַת ״נָטַע״ ישעיה מד:יד הוּא:

12 אָזְלוּ מַיִם מִנִּי יָם. מִמָּקוֹם שֶׁנָּהָר בָּא וְיוֹצֵא מִמְּקוֹרוֹ, הַבָּא מֵאֵלָיו מִן הַיָּם:

13 וְהַנָּהָר. הַבָּא מִשָּׁם יֶחֱרַב וְיִיבַשׁ לְעוֹלָם, כֵּן אִישׁ שָׁכַב וְלֹא יָקוּם:

14 כָּל־יְמֵי צְבָאִי אֲיַחֵל. לִתְחִיָּה:

15 תִּקְרָא. תְּחִנָּה הִיא: קְרָא אֵלַי וְאָנֹכִי אֶעֱנֶךָּ לְהוֹכִיחַ דְּבָרַי:

16 תִּכְסֹף. תַּחְמֹד:

17 כִּי עַתָּה. אַתָּה מֵרֵיעַ לִי:

18 צְעָדַי. אַתָּה סוֹפֵר:

19 לֹא תִשְׁמוֹר. אֵינְךָ מַמְתִּין עַל חַטָּאתִי מִלְּהִפָּרַע, כְּמוֹ ״וְאָבִיו שָׁמַר אֶת הַדָּבָר״ בראשית לז:יא – הִמְתִּין שֶׁתִּתְקַיֵּם. וּבִלְשׁוֹן מִשְׁנָה סנהדרין סג:: לֹא יֹאמַר אָדָם לַחֲבֵרוֹ שְׁמוֹר לִי בְּצַד עֲבוֹדַת כּוֹכָבִים פְּלוֹנִית – לְשׁוֹן ״הַמְתֵּן״:

20 חָתוּם בִּצְרוֹר. חָתוּם וּמְשֻׁמָּר בִּצְרוֹר בֶּגֶד, כְּכֶסֶף וּמַרְגָּלִיּוֹת, שֶׁלֹּא תֹּאבַד:

21 וַתִּטְפֹּל עַל עֲוֺנִי. נִתְחַבַּרְתָּ עַל עֲוֺנִי:

22 וְאוּלָם הַר נוֹפֵל. הַר הַנּוֹפֵל גָּבְהוֹ יִבּוֹל וְיֵעָשֶׂה עָפָר, וּתְהֵא לוֹ תִּקְוָה לֵיהָנוֹת מִמֶּנּוּ. וְצוּר אֲשֶׁר נֶעְתַּק מִמְּקוֹמוֹ גַּם הוּא, יִבּוֹל לְשׁוֹן תְּבוּאָה. אוֹ:

23 אֲבָנִים. אֲשֶׁר שָׁחֲקוּ מַיִם בְּעָבְרָם עֲלֵיהֶם תָּמִיד:

24 תִּשְׁטֹף. הִשְׁטִיפוּ סְפִיחֶיהָ שֶׁל אֶבֶן לֵיהָפֵךְ לְעָפָר וְלִצְמֹחַ בּוֹ דָּבָר, כַּאֲשֶׁר יִצְמַח סְפִיחַ הַקָּצִיר שֶׁעָבַר – כֵּן יִתְהַפֵּךְ עָפָר זֶה סְפִיחֶיהָ לְאֶבֶן:

25 וְתִקְוַת אֱנוֹשׁ. אֵינָהּ כֵּן, אֲשֶׁר מִשֶּׁיָּמוּת – אָבְדָה סֶלָה:

26 תִּתְקְפֵהוּ. תֶּחֱזַק מִמֶּנּוּ וְתֶאֱנְסֵהוּ בְּתָקְפְּךָ, וַיַּהֲלֹךְ מִן הָעוֹלָם:

27 יִכְבְּדוּ. יִהְיוּ כְבֵדִים בְּכֶסֶף וּבְזָהָב, וְהוּא לֹא יֵדָע:

28 וְיִצְעֲרוּ. וְיִמְעֲטוּ מִכָּל טוֹב, וְהוּא לֹא יָבִין:

29 אַךְ בְּשָׂרוֹ עָלָיו יִכְאָב. קָשָׁה רִמָּה לַמֵּת כְּמַחַט בַּבָּשָׂר הֶחָי שבת יג::

« רש"י על איוב י״ג:כ״ח רש"י על איוב ט״ו:ב׳ »