מקור ירמיהו כ׳
1 וַיִּשְׁמַ֤ע פַּשְׁחוּר֙ בֶּן־אִמֵּ֣ר הַכֹּהֵ֔ן וְהוּא־פָקִ֥יד נָגִ֖יד בְּבֵ֣ית יְהֹוָ֑ה אֶֽת־יִרְמְיָ֔הוּ נִבָּ֖א אֶת־הַדְּבָרִ֥ים הָאֵֽלֶּה׃
2 וַיַּכֶּ֣ה פַשְׁח֔וּר אֵ֖ת יִרְמְיָ֣הוּ הַנָּבִ֑יא וַיִּתֵּ֨ן אֹת֜וֹ עַל־הַמַּהְפֶּ֗כֶת אֲשֶׁ֨ר בְּשַׁ֤עַר בִּנְיָמִן֙ הָֽעֶלְי֔וֹן אֲשֶׁ֖ר בְּבֵ֥ית יְהֹוָֽה׃
3 וַֽיְהִי֙ מִֽמׇּחֳרָ֔ת וַיֹּצֵ֥א פַשְׁח֛וּר אֶֽת־יִרְמְיָ֖הוּ מִן־הַמַּהְפָּ֑כֶת וַיֹּ֨אמֶר אֵלָ֜יו יִרְמְיָ֗הוּ לֹ֤א פַשְׁחוּר֙ קָרָ֤א יְהֹוָה֙ שְׁמֶ֔ךָ כִּ֖י אִם־מָג֥וֹר מִסָּבִֽיב׃ ס
4 כִּ֣י כֹ֣ה אָמַ֣ר יְהֹוָ֡ה הִנְנִי֩ נֹתֶנְךָ֨ לְמָג֜וֹר לְךָ֣ וּלְכׇל־אֹהֲבֶ֗יךָ וְנָ֥פְל֛וּ בְּחֶ֥רֶב אֹיְבֵיהֶ֖ם וְעֵינֶ֣יךָ רֹא֑וֹת וְאֶת־כׇּל־יְהוּדָ֗ה אֶתֵּן֙ בְּיַ֣ד מֶלֶךְ־בָּבֶ֔ל וְהִגְלָ֥ם בָּבֶ֖לָה וְהִכָּ֥ם בֶּחָֽרֶב׃
5 וְנָתַתִּ֗י אֶת־כׇּל־חֹ֙סֶן֙ הָעִ֣יר הַזֹּ֔את וְאֶת־כׇּל־יְגִיעָ֖הּ וְאֶת־כׇּל־יְקָרָ֑הּ וְאֵ֨ת כׇּל־אוֹצְר֜וֹת מַלְכֵ֣י יְהוּדָ֗ה אֶתֵּן֙ בְּיַ֣ד אֹֽיְבֵיהֶ֔ם וּבְזָזוּם֙ וּלְקָח֔וּם וֶהֱבִיא֖וּם בָּבֶֽלָה׃
6 וְאַתָּ֣ה פַשְׁח֗וּר וְכֹל֙ יֹשְׁבֵ֣י בֵיתֶ֔ךָ תֵּלְכ֖וּ בַּשֶּׁ֑בִי וּבָבֶ֣ל תָּב֗וֹא וְשָׁ֤ם תָּמוּת֙ וְשָׁ֣ם תִּקָּבֵ֔ר אַתָּה֙ וְכׇל־אֹֽהֲבֶ֔יךָ אֲשֶׁר־נִבֵּ֥אתָ לָהֶ֖ם בַּשָּֽׁקֶר׃ פ
7 פִּתִּיתַ֤נִי יְהֹוָה֙ וָאֶפָּ֔ת חֲזַקְתַּ֖נִי וַתּוּכָ֑ל הָיִ֤יתִי לִשְׂחוֹק֙ כׇּל־הַיּ֔וֹם כֻּלֹּ֖ה לֹעֵ֥ג לִֽי׃
8 כִּֽי־מִדֵּ֤י אֲדַבֵּר֙ אֶזְעָ֔ק חָמָ֥ס וָשֹׁ֖ד אֶקְרָ֑א כִּֽי־הָיָ֨ה דְבַר־יְהֹוָ֥ה לִ֛י לְחֶרְפָּ֥ה וּלְקֶ֖לֶס כׇּל־הַיּֽוֹם׃
9 וְאָמַרְתִּ֣י לֹֽא־אֶזְכְּרֶ֗נּוּ וְלֹֽא־אֲדַבֵּ֥ר עוֹד֙ בִּשְׁמ֔וֹ וְהָיָ֤ה בְלִבִּי֙ כְּאֵ֣שׁ בֹּעֶ֔רֶת עָצֻ֖ר בְּעַצְמֹתָ֑י וְנִלְאֵ֥יתִי כַּֽלְכֵ֖ל וְלֹ֥א אוּכָֽל׃
10 כִּ֣י שָׁמַ֜עְתִּי דִּבַּ֣ת רַבִּים֮ מָג֣וֹר מִסָּבִיב֒ הַגִּ֙ידוּ֙ וְנַגִּידֶ֔נּוּ כֹּ֚ל אֱנ֣וֹשׁ שְׁלֹמִ֔י שֹׁמְרֵ֖י צַלְעִ֑י אוּלַ֤י יְפֻתֶּה֙ וְנ֣וּכְלָה ל֔וֹ וְנִקְחָ֥ה נִקְמָתֵ֖נוּ מִמֶּֽנּוּ׃
11 וַיהֹוָ֤ה אוֹתִי֙ כְּגִבּ֣וֹר עָרִ֔יץ עַל־כֵּ֛ן רֹדְפַ֥י יִכָּשְׁל֖וּ וְלֹ֣א יֻכָ֑לוּ בֹּ֤שֽׁוּ מְאֹד֙ כִּי־לֹ֣א הִשְׂכִּ֔ילוּ כְּלִמַּ֥ת עוֹלָ֖ם לֹ֥א תִשָּׁכֵֽחַ׃
12 וַיהֹוָ֤ה צְבָאוֹת֙ בֹּחֵ֣ן צַדִּ֔יק רֹאֶ֥ה כְלָי֖וֹת וָלֵ֑ב אֶרְאֶ֤ה נִקְמָֽתְךָ֙ מֵהֶ֔ם כִּ֥י אֵלֶ֖יךָ גִּלִּ֥יתִי אֶת־רִיבִֽי׃ ס
13 שִׁ֚ירוּ לַֽיהֹוָ֔ה הַֽלְל֖וּ אֶת־יְהֹוָ֑ה כִּ֥י הִצִּ֛יל אֶת־נֶ֥פֶשׁ אֶבְי֖וֹן מִיַּ֥ד מְרֵעִֽים׃ ס
14 אָר֣וּר הַיּ֔וֹם אֲשֶׁ֥ר יֻלַּ֖דְתִּי בּ֑וֹ י֛וֹם אֲשֶׁר־יְלָדַ֥תְנִי אִמִּ֖י אַל־יְהִ֥י בָרֽוּךְ׃
15 אָר֣וּר הָאִ֗ישׁ אֲשֶׁ֨ר בִּשַּׂ֤ר אֶת־אָבִי֙ לֵאמֹ֔ר יֻֽלַּד־לְךָ֖ בֵּ֣ן זָכָ֑ר שַׂמֵּ֖חַ שִׂמְּחָֽהוּ׃
16 וְהָיָה֙ הָאִ֣ישׁ הַה֔וּא כֶּעָרִ֛ים אֲשֶׁר־הָפַ֥ךְ יְהֹוָ֖ה וְלֹ֣א נִחָ֑ם וְשָׁמַ֤ע זְעָקָה֙ בַּבֹּ֔קֶר וּתְרוּעָ֖ה בְּעֵ֥ת צׇהֳרָֽיִם׃
17 אֲשֶׁ֥ר לֹא־מוֹתְתַ֖נִי מֵרָ֑חֶם וַתְּהִי־לִ֤י אִמִּי֙ קִבְרִ֔י וְרַחְמָ֖הֿ הֲרַ֥ת עוֹלָֽם׃
18 לָ֤מָּה זֶּה֙ מֵרֶ֣חֶם יָצָ֔אתִי לִרְא֥וֹת עָמָ֖ל וְיָג֑וֹן וַיִּכְל֥וּ בְּבֹ֖שֶׁת יָמָֽי׃ פ
פירוש רש"י על ירמיהו כ׳
1 הַמַּהְפֶּכֶת. שֵׁם מְקוֹם הָאֲסוּרִים, וְיוֹנָתָן תִּרְגֵּם: ״לְכִיפְתָּא״, אַרְוְלוֹ״ר בְּלַעַ״ז:
2 מָגוֹר. יִרְאָה:
3 לֹא פַשְׁחוּר קָרָא ה׳ שְׁמֶךָ וגו׳. לֹא נִקְרָא שִׁמְךָ פַּשְׁחוּר אֶלָּא בִּשְׁבִיל דָּבָר זֶה. כְּלוֹמַר פָּשַׁח שָׁחוֹר כְּמוֹ אִילָן שֶׁנִּפְשַׁח משנה שביעית ד, ו, וְכֵן ״וַיְפַשְּׁחֵנִי״ איכה ג, יא, וְכֵן אָמַר לוֹ לֹא פַשְׁחוּר קָרָא שְׁמֶךָ שֶׁלְּשׁוֹן פַּשְׁחוּר מַשְׁמַע אָדָם גָּדוֹל וּבֶן חוֹרִין, פָּשׁ חוּר, אֶלָּא לְכָךְ נִקְרָא שִׁמְךָ פַּשְׁחוּר – פָּשַׁח שָׁחוֹר. דָּבָר אַחֵר: פָּשׁ סְחוֹר, רַבִּים סְבִיבוֹתֶיךָ לַהֲרֹג, וְלַלָּשׁוֹן זֶה מָגוֹר הוּא לְשׁוֹן אֲסִיפָה, כְּמוֹ ״מְגוּרֵי אֶל חָרֶב״ יחזקאל כא:יז:
4 חֹסֶן. מָמוֹן:
5 פִּתִּיתַנִי. לָלֶכֶת בִּשְׁלִיחוּתְךָ:
6 חֲזַקְתַּנִי. הִכְבַּדְתָּ עָלַי יָדְךָ הַחֲזָקָה, לָלֶכֶת עַל כָּרְחִי:
7 וַתּוּכָל. וְנִצַּחְתָּ:
8 כֻּלֹּה. כָּל הָעָם לֹעֵג לִי:
9 מִדֵּי אֲדַבֵּר. בְּכָל עֵת שֶׁאֲדַבֵּר אֲלֵיהֶם, אֲנִי צָרִיךְ לִזְעֹק וּלְהָרִים קוֹל; וְאֵינִי קוֹרֵא אֲלֵיהֶם טוֹבָה כִּי אִם נְבוּאוֹת חָמָס וָשֹׁד:
10 כִּי הָיָה דְבַר ה׳ לִי. לְפִיכָךְ דִּבְּרוּ לִי חֶרְפָּה, שֶׁהֵם מְחָרְפִים אוֹתִי:
11 וּלְקֶלֶס. וּלְדִבּוּר, כְּמוֹ ״וְקַלָּסָה״ יחזקאל כב:ד:
12 וְאָמַרְתִּי לֹא אֶזְכְּרֶנּוּ. וְאִם אָמַר לִי לִבִּי שֶׁלֹּא לֵילֵךְ בִּשְׁלִיחוּתוֹ עוֹד:
13 וְהָיָה בְלִבִּי. הַנְּבוּאָה כְּאֵשׁ בֹּעֶרֶת, וְעַל כָּרְחִי אֲנִי צָרִיךְ לֵילֵךְ:
14 עָצוּר בְּעַצְמוֹתָי. וְכָנוּס בְּעַצְמוֹתַי הָאֵשׁ:
15 כַּלְכֵּל. לִסְבּוֹל הָאֵשׁ:
16 כִּי שָׁמַעְתִּי. אֲנִי אָמַרְתִּי שֶׁלֹּא אֶזְכְּרֶנּוּ לְפִי שֶׁשָּׁמַעְתִּי דִּבַּת רַבִּים, אֵלּוּ שֶׁמִּתְלַחֲשִׁים עָלַי:
17 מָגוֹר. לְשׁוֹן אֲסִיפָה, וְכֵן תִּרְגֵּם יוֹנָתָן:
18 הַגִּידוּ. עָלָיו עֵדוּת שֶׁקֶר:
19 וְנַגִּידֶנּוּ. וְנָעִידֶנּוּ. וּמְנַחֵם פֵּירֵשׁ הַגִּידוּ וְנַגִּידֶנּוּ כְּמוֹ ״לֹא תִתְגּוֹדְדוּ״ דברים יד:א, וְכֵן חִבֵּר ״לְחֵלֶק יַגִּיד רֵעִים״ איוב יז:ה לְשׁוֹן הַשְׁחָתָה, כְּמוֹ ״גֹּדּוּ אִילָנָא״ דניאל ד:יא. וְדוּנָשׁ פָּתַר אוֹתוֹ לְשׁוֹן הַגָּדָה מַמָּשׁ, וְכֹה פִּתְרוֹנוֹ: הַגִּידוּ עָלָיו דִּבְרֵי שֶׁקֶר וְנַגִּידֶנּוּ לַמֶּלֶךְ. וְיֵשׁ לָנוּ כְּמוֹ נַגִּידֶנּוּ דְּבָרִים רַבִּים בַּמִּקְרָא, אֲשֶׁר לֹא יִכּוֹן פִּתְרוֹנוֹ כִּי אִם עַד אֲשֶׁר יְחַלְּקוּן לִשְׁתֵּי תֵיבוֹת אוֹ לְשָׁלֹשׁ, כְּמוֹ ״וְלֹא יָכְלוּ דַּבְּרוֹ לְשָׁלוֹם״ בראשית לז:ד; ״בָּנַי יְצָאֻנִי״ ירמיה י:כ:
20 שׁוֹמְרֵי צַלְעִי. מְצַפִּים שִׁבְרִי:
21 אוּלַי יְפֻתֶּה. לִשְׁמֹעַ לָנוּ וְלִטְעוֹת אַחֲרֵינוּ:
22 כִּי לֹא הִשְׂכִּילוּ. לֹא הִצְלִיחוּ בַּעֲצָתָם:
23 אָרוּר הַיּוֹם אֲשֶׁר יֻלַּדְתִּי בּוֹ. פוא״י אינייניר״ט בְּלַעַ״ז, הִיא שְׁעַת הֵרָיוֹן. וְעַל יְדֵי אֹנֶס שִׁמֵּשׁ חִלְקִיָּהוּ אָבִיו מִטָּתוֹ בַּיּוֹם, שֶׁהָיָה בּוֹרֵחַ מִפְּנֵי מְנַשֶּׁה שֶׁהָיָה הוֹרֵג אֶת הַנְּבִיאִים; וְשִׁמֵּשׁ מִטָּתוֹ וּבָרַח בראשית רבה סד, ה:
24 שַׂמֵּחַ. מ״ם דְּגוּשָׁה, שֶׁהוּא לְשׁוֹן תְּשַׂמַּח אֲחֵרִים; שֶׁשִּׂמַּח אֶת אָבִיו בִּבְשׂוֹרָתוֹ:
25 כֶּעָרִים אֲשֶׁר הָפַךְ. סְדוֹם וַעֲמוֹרָה בראשית יט:כד-כה:
26 וְלֹא נִחָם. מִשֶּׁגָּזַר עֲלֵיהֶם חוּרְבָּן, לֹא חָשַׁב מַחֲשָׁבָה אַחֶרֶת לְבַטֵּל גְּזֵרָתוֹ בראשית יח:כ-לב:
27 אֲשֶׁר לֹא מוֹתְתַנִי מַלְאַךְ הַמָּוֶת מֵרָחֶם. וַהֲרֵי זֶה מִן הַמִּקְרָאוֹת קִצְרֵי דִּבּוּר:
28 הֲרַת עוֹלָם. הֵרָיוֹן שֶׁל עוֹלָמִית:
29 עָמָל וְיָגוֹן. חֻרְבַּן בֵּית הַמִּקְדָּשׁ: