מקור ישעיהו מ״ט
1 שִׁמְע֤וּ אִיִּים֙ אֵלַ֔י וְהַקְשִׁ֥יבוּ לְאֻמִּ֖ים מֵרָח֑וֹק יְהֹוָה֙ מִבֶּ֣טֶן קְרָאָ֔נִי מִמְּעֵ֥י אִמִּ֖י הִזְכִּ֥יר שְׁמִֽי׃
2 וַיָּ֤שֶׂם פִּי֙ כְּחֶ֣רֶב חַדָּ֔ה בְּצֵ֥ל יָד֖וֹ הֶחְבִּיאָ֑נִי וַיְשִׂימֵ֙נִי֙ לְחֵ֣ץ בָּר֔וּר בְּאַשְׁפָּת֖וֹ הִסְתִּירָֽנִי׃
3 וַיֹּ֥אמֶר לִ֖י עַבְדִּי־אָ֑תָּה יִשְׂרָאֵ֕ל אֲשֶׁר־בְּךָ֖ אֶתְפָּאָֽר׃
4 וַאֲנִ֤י אָמַ֙רְתִּי֙ לְרִ֣יק יָגַ֔עְתִּי לְתֹ֥הוּ וְהֶ֖בֶל כֹּחִ֣י כִלֵּ֑יתִי אָכֵן֙ מִשְׁפָּטִ֣י אֶת־יְהֹוָ֔ה וּפְעֻלָּתִ֖י אֶת־אֱלֹהָֽי׃ ס
5 וְעַתָּ֣ה אָמַ֣ר יְהֹוָ֗ה יֽוֹצְרִ֤י מִבֶּ֙טֶן֙ לְעֶ֣בֶד ל֔וֹ לְשׁוֹבֵ֤ב יַֽעֲקֹב֙ אֵלָ֔יו וְיִשְׂרָאֵ֖ל לא ל֣וֹ יֵאָסֵ֑ף וְאֶכָּבֵד֙ בְּעֵינֵ֣י יְהֹוָ֔ה וֵאלֹהַ֖י הָיָ֥ה עֻזִּֽי׃
6 וַיֹּ֗אמֶר נָקֵ֨ל מִֽהְיוֹתְךָ֥ לִי֙ עֶ֔בֶד לְהָקִים֙ אֶת־שִׁבְטֵ֣י יַעֲקֹ֔ב ונצירי וּנְצוּרֵ֥י יִשְׂרָאֵ֖ל לְהָשִׁ֑יב וּנְתַתִּ֙יךָ֙ לְא֣וֹר גּוֹיִ֔ם לִהְי֥וֹת יְשׁוּעָתִ֖י עַד־קְצֵ֥ה הָאָֽרֶץ׃ ס
7 כֹּ֣ה אָֽמַר־יְהֹוָה֩ גֹּאֵ֨ל יִשְׂרָאֵ֜ל קְדוֹשׁ֗וֹ לִבְזֹה־נֶ֜פֶשׁ לִמְתָ֤עֵֽב גּוֹי֙ לְעֶ֣בֶד מֹשְׁלִ֔ים מְלָכִים֙ יִרְא֣וּ וָקָ֔מוּ שָׂרִ֖ים וְיִֽשְׁתַּחֲו֑וּ לְמַ֤עַן יְהֹוָה֙ אֲשֶׁ֣ר נֶאֱמָ֔ן קְדֹ֥שׁ יִשְׂרָאֵ֖ל וַיִּבְחָרֶֽךָּ׃ ס
8 כֹּ֣ה אָמַ֣ר יְהֹוָ֗ה בְּעֵ֤ת רָצוֹן֙ עֲנִיתִ֔יךָ וּבְי֥וֹם יְשׁוּעָ֖ה עֲזַרְתִּ֑יךָ וְאֶצׇּרְךָ֗ וְאֶתֶּנְךָ֙ לִבְרִ֣ית עָ֔ם לְהָקִ֣ים אֶ֔רֶץ לְהַנְחִ֖יל נְחָל֥וֹת שֹׁמֵמֽוֹת׃
9 לֵאמֹ֤ר לַֽאֲסוּרִים֙ צֵ֔אוּ לַאֲשֶׁ֥ר בַּחֹ֖שֶׁךְ הִגָּל֑וּ עַל־דְּרָכִ֣ים יִרְע֔וּ וּבְכׇל־שְׁפָיִ֖ים מַרְעִיתָֽם׃
10 לֹ֤א יִרְעָ֙בוּ֙ וְלֹ֣א יִצְמָ֔אוּ וְלֹא־יַכֵּ֥ם שָׁרָ֖ב וָשָׁ֑מֶשׁ כִּֽי־מְרַחֲמָ֣ם יְנַהֲגֵ֔ם וְעַל־מַבּ֥וּעֵי מַ֖יִם יְנַהֲלֵֽם׃
11 וְשַׂמְתִּ֥י כׇל־הָרַ֖י לַדָּ֑רֶךְ וּמְסִלֹּתַ֖י יְרֻמֽוּן׃
12 הִנֵּה־אֵ֕לֶּה מֵרָח֖וֹק יָבֹ֑אוּ וְהִֽנֵּה־אֵ֙לֶּה֙ מִצָּפ֣וֹן וּמִיָּ֔ם וְאֵ֖לֶּה מֵאֶ֥רֶץ סִינִֽים׃
13 רׇנּ֤וּ שָׁמַ֙יִם֙ וְגִ֣ילִי אָ֔רֶץ יפצחו וּפִצְח֥וּ הָרִ֖ים רִנָּ֑ה כִּֽי־נִחַ֤ם יְהֹוָה֙ עַמּ֔וֹ וַעֲנִיָּ֖יו יְרַחֵֽם׃ ס
14 וַתֹּ֥אמֶר צִיּ֖וֹן עֲזָבַ֣נִי יְהֹוָ֑ה וַאדֹנָ֖י שְׁכֵחָֽנִי׃
15 הֲתִשְׁכַּ֤ח אִשָּׁה֙ עוּלָ֔הּ מֵרַחֵ֖ם בֶּן־בִּטְנָ֑הּ גַּם־אֵ֣לֶּה תִשְׁכַּ֔חְנָה וְאָנֹכִ֖י לֹ֥א אֶשְׁכָּחֵֽךְ׃
16 הֵ֥ן עַל־כַּפַּ֖יִם חַקֹּתִ֑יךְ חוֹמֹתַ֥יִךְ נֶגְדִּ֖י תָּמִֽיד׃
17 מִהֲר֖וּ בָּנָ֑יִךְ מְהָֽרְסַ֥יִךְ וּמַחֲרִיבַ֖יִךְ מִמֵּ֥ךְ יֵצֵֽאוּ׃
18 שְׂאִֽי־סָבִ֤יב עֵינַ֙יִךְ֙ וּרְאִ֔י כֻּלָּ֖ם נִקְבְּצ֣וּ בָֽאוּ־לָ֑ךְ חַי־אָ֣נִי נְאֻם־יְהֹוָ֗ה כִּ֤י כֻלָּם֙ כָּעֲדִ֣י תִלְבָּ֔שִׁי וּֽתְקַשְּׁרִ֖ים כַּכַּלָּֽה׃
19 כִּ֤י חׇרְבֹתַ֙יִךְ֙ וְשֹׁ֣מְמֹתַ֔יִךְ וְאֶ֖רֶץ הֲרִסֻתֵ֑ךְ כִּ֤י עַתָּה֙ תֵּצְרִ֣י מִיּוֹשֵׁ֔ב וְרָחֲק֖וּ מְבַלְּעָֽיִךְ׃
20 ע֚וֹד יֹאמְר֣וּ בְאׇזְנַ֔יִךְ בְּנֵ֖י שִׁכֻּלָ֑יִךְ צַר־לִ֥י הַמָּק֖וֹם גְּשָׁה־לִּ֥י וְאֵשֵֽׁבָה׃
21 וְאָמַ֣רְתְּ בִּלְבָבֵ֗ךְ מִ֤י יָֽלַד־לִי֙ אֶת־אֵ֔לֶּה וַאֲנִ֥י שְׁכוּלָ֖ה וְגַלְמוּדָ֑ה גֹּלָ֣ה וְסוּרָ֗ה וְאֵ֙לֶּה֙ מִ֣י גִדֵּ֔ל הֵ֤ן אֲנִי֙ נִשְׁאַ֣רְתִּי לְבַדִּ֔י אֵ֖לֶּה אֵיפֹ֥ה הֵֽם׃ פ
22 כֹּה־אָמַ֞ר אֲדֹנָ֣י יֱהֹוִ֗ה הִנֵּ֨ה אֶשָּׂ֤א אֶל־גּוֹיִם֙ יָדִ֔י וְאֶל־עַמִּ֖ים אָרִ֣ים נִסִּ֑י וְהֵבִ֤יאוּ בָנַ֙יִךְ֙ בְּחֹ֔צֶן וּבְנֹתַ֖יִךְ עַל־כָּתֵ֥ף תִּנָּשֶֽׂאנָה׃
23 וְהָי֨וּ מְלָכִ֜ים אֹמְנַ֗יִךְ וְשָׂרֽוֹתֵיהֶם֙ מֵינִ֣יקֹתַ֔יִךְ אַפַּ֗יִם אֶ֚רֶץ יִשְׁתַּ֣חֲווּ לָ֔ךְ וַעֲפַ֥ר רַגְלַ֖יִךְ יְלַחֵ֑כוּ וְיָדַ֙עַתְּ֙ כִּי־אֲנִ֣י יְהֹוָ֔ה אֲשֶׁ֥ר לֹא־יֵבֹ֖שׁוּ קֹוָֽי׃ ס
24 הֲיֻקַּ֥ח מִגִּבּ֖וֹר מַלְק֑וֹחַ וְאִם־שְׁבִ֥י צַדִּ֖יק יִמָּלֵֽט׃ ס
25 כִּי־כֹ֣ה אָמַ֣ר יְהֹוָ֗ה גַּם־שְׁבִ֤י גִבּוֹר֙ יֻקָּ֔ח וּמַלְק֥וֹחַ עָרִ֖יץ יִמָּלֵ֑ט וְאֶת־יְרִיבֵךְ֙ אָנֹכִ֣י אָרִ֔יב וְאֶת־בָּנַ֖יִךְ אָנֹכִ֥י אוֹשִֽׁיעַ׃
26 וְהַאֲכַלְתִּ֤י אֶת־מוֹנַ֙יִךְ֙ אֶת־בְּשָׂרָ֔ם וְכֶעָסִ֖יס דָּמָ֣ם יִשְׁכָּר֑וּן וְיָדְע֣וּ כׇל־בָּשָׂ֗ר כִּ֣י אֲנִ֤י יְהֹוָה֙ מֽוֹשִׁיעֵ֔ךְ וְגֹאֲלֵ֖ךְ אֲבִ֥יר יַעֲקֹֽב׃ ס
פירוש רש"י על ישעיהו מ״ט
1 מִבֶּטֶן קְרָאָנִי. מִשֶּׁאֲנִי בַּבֶּטֶן עָלְתָה לְפָנָיו בְּמַחֲשָׁבָה לִהְיוֹת שְׁמִי יְשַׁעְיָה, לְהִנָּבֵא יְשׁוּעוֹת וְנֶחָמוֹת:
2 וַיָּשֶׂם פִּי כְּחֶרֶב חַדָּה. לְהוֹכִיחַ אֶת הָרְשָׁעִים וּלְהִתְנַבְּאוֹת עֲלֵיהֶם פֻּרְעָנוּת:
3 בְּצֵל יָדוֹ הֶחְבִּיאָנִי. שֶׁלֹּא יוּכְלוּ לְהָרַע לִי:
4 לְחֵץ בָּרוּר. מְמוֹרָט, קלי״ר בלע״ז:
5 בְּאַשְׁפָּתוֹ. כְּלִי נַרְתֵּק הַחִצִּים, שֶׁקּוֹרִין קוייכר״א בלע״ז:
6 וַאֲנִי אָמַרְתִּי לְרִיק יָגַעְתִּי. כְּשֶׁרָאִיתִי שֶׁאֲנִי מוֹכִיחָם וְאֵינָם שׁוֹמְעִים:
7 אָכֵן מִשְׁפָּטִי אֶת ה׳. הוּא יוֹדֵעַ שֶׁאֵינָהּ מֵאִתִּי, אֶלָּא מֵאִתָּם:
8 לוֹ יֵאָסֵף. אֵלָיו יָשׁוּב בִּתְשׁוּבָה:
9 נָקֵל מִהְיוֹתְךָ וגו׳. מַתָּנָה קְטַנָּה הִיא בְּעֵינַי, שֶׁתְּהֵא לְךָ זֹאת לְבַדָּהּ, שֶׁתְּהֵא לִי עֶבֶד לְהָקִים אֶת יַעֲקֹב וּלְהָשִׁיב אֵלַי נְצוּרֵי יִשְׂרָאֵל, וְהִנְנִי מוֹסִיף לְךָ עוֹד וּנְתַתִּיךָ לְאוֹר גּוֹיִם לְהִנָּבֵא עַל מַפַּלְתָּהּ שֶׁל בָּבֶל, שֶׁהִיא שִׂמְחָה לְכָל הָעוֹלָם:
10 וּנְצוּרֵי יִשְׂרָאֵל. כְּמוֹ משלי ז:י ״וּנְצֻרַת לֵב״, שֶׁלִּבָּם מֻקָּף יֵצֶר הִרְהוּרֵי עֲבֵירָה כְּעִיר נְצוּרָה מָצוֹר הַצָּרִים עָלֶיהָ:
11 לִבְזֹה נֶפֶשׁ. נֶפֶשׁ בְּזוּיָה:
12 לִמְתָעֵב גּוֹי. לְמִי שֶׁהַגּוֹי מְתַעֲבוֹ:
13 מְלָכִים יִרְאוּ אוֹתוֹ וְקָמוּ:
14 אֲשֶׁר נֶאֱמָן. לִשְׁמוֹר הַבְטָחָתוֹ שֶׁהִבְטִיחַ לְאַבְרָהָם עַל הַמַּלְכִיּוֹת, כְּעִנְיָן שֶׁנֶּאֱמַר ״וְהִנֵּה תַנּוּר עָשָׁן וְגוֹ׳״ בראשית טו:יז:
15 קְדוֹשׁ יִשְׂרָאֵל. הוּא וַיִּבְחָרֶךָּ:
16 בְּעֵת רָצוֹן. בְּעֵת תְּפִלָּה, שֶׁאַתָּה מִתְרַצֶּה וּמִתְפַּיֵּס לְפָנַי ברכות ח א:
17 וּבְיוֹם יְשׁוּעָה. שֶׁתְּהֵא צָרִיךְ לִישׁוּעָה:
18 וְאֶצָּרְךָ. וְאֶשְׁמָרְךָ:
19 לִבְרִית עָם. לִהְיוֹת עַם בְּרִית לִי:
20 לְהָקִים אֶרֶץ. אֶרֶץ יִשְׂרָאֵל, הַבְּחוּרָה לִי בְּכָל הָאֲרָצוֹת:
21 לַאֲסוּרִים צֵאוּ. לְעֵת אֲשֶׁר אוֹמַר לַאֲסוּרֵי גוֹלָה צֵאוּ:
22 שְׁפָיִים. תִּרְגֵּם יוֹנָתָן ״נַגְדִּין״, נַחֲלֵי מַיִם:
23 שָׁרָב. חוֹם:
24 וְשַׂמְתִּי כָל הָרַי לַדָּרֶךְ. כְּלַפֵּי שֶׁאָמַר ישעיהו לג:ח עַל יְדֵי חֻרְבָּנָהּ ״שָׁבַת עוֹבֵר אֹרַח״, עַכְשָׁיו יָשׁוּבוּ וְיֵלְכוּ בּוֹ עוֹבְרִים וְשָׁבִים:
25 וּמְסִלֹּתַי יְרֻמוּן. כְּלַפֵּי שֶׁאָמַר ישעיהו לג:ח ״נָשַׁמּוּ מְסִלּוֹת״, נִתְקַלְקְלוּ מֵאֵין מְתַקֵּן אוֹתָם, עַכְשָׁיו וּמְסִלֹּתַי יְרֻמוּן – יְתַקְּנוּ קִלְקוּל הַדְּרָכִים וְיַגְבִּיהַ אוֹתָם כַּמִשְׁפָּט בְּחִלּוּקֵי אֲבָנִים וְעָפָר:
26 מֵאֶרֶץ סִינִים. ״מֵאַרַע דָּרוֹמָא״ תרגום יונתן:
27 כִּי נִחַם ה׳‏ אֶת עַמּוֹ׃
28 וַתֹּאמֶר צִיּוֹן. הִיא הָיְתָה סְבוּרָה שֶׁשְּׁכַחְתִּיהָ:
29 הֲתִשְׁכַּח אִשָּׁה עוּלָהּ. עוֹלָל שֶׁלָּהּ:
30 מֵרַחֵם בֶּן בִּטְנָהּ. מִלְּרַחֵם עַל בֶּן בִּטְנָהּ:
31 גַּם אֵלֶּה תִשְׁכַּחְנָה. אֲפִילּוּ אִם אֵלֶּה תִּשְׁכַּחְנָה, אָנֹכִי לֹא אֶשְׁכָּחֵךְ:
32 עַל כַּפַּיִם. עַל כַּפַּי רוֹאֶה אֲנִי כְּאִלּוּ אַתְּ חֲקוּקָה עַל כַּפִּי לִרְאוֹתֵךְ וּלְזָכְרֵךְ תָּמִיד. דָּבָר אַחֵר: עַל כַּפַּיִם – מֵעַל עַנְנֵי כָּבוֹד, כְּמוֹ איוב לו:לב ״עַל כַּפַּיִם כִּסָּה אוֹר״:
33 מִהֲרוּ בָּנָיִךְ. לָשׁוּב:
34 תֵּצְרִי מִיּוֹשֵׁב. תְּהִי צָרָה מֵרֹב יוֹשְׁבִים שֶׁיָּבֹאוּ לְתוֹכֵךְ, יְהִי לָהֶם הַמָּקוֹם צַר מִלִּבְנוֹת לָהֶם בָּתִּים:
35 בְּנֵי שִׁכֻּלָיִךְ. בָּנִים שֶׁהָיִית שְׁכוּלָה מֵהֶם:
36 גְּשָׁה לִּי. הִתְקָרֵב לְצַד אַחֵר בִּשְׁבִילִי וְאֵשֵׁבָה:
37 גַּלְמוּדָה. שולד״א בלע״ז:
38 וְסוּרָה. מוּסֶרֶת מִכָּל אָדָם, הַכֹּל אוֹמְרִים עָלַי: סוּרוּ מִמֶּנָּה:
39 יָדִי… נִסִּי. סִימָן לְהָבִיא גָּלִיּוֹת:
40 נִסִּי. פירקא בלע״ז, כמו ״וְכַנֵּס עַל הַגִבְעָה״ ישעיהו ל:יז, וְהוּא סִימָן קִבּוּץ, וְנוֹתְנִין בְּרֹאשָׁהּ בֶּגֶד:
41 בְּחֹצֶן. איישיל״א בלע״ז, וְדוֹמֶה לוֹ בְּעֶזְרָא: ״וגַם אני חָצְנִי נָעַרְתִּי״ נחמיה ה:יג:
42 הֲיֻקַּח מִגִּבּוֹר מַלְקוֹחַ. כִּסְבוּרִים אַתֶּם שֶׁאִי אֶפְשָׁר לָקַחַת מֵעֵשָׂיו מַלְקוֹחַ שִׁבְיוֹ שֶׁל יַעֲקֹב הַצַּדִּיק?
43 וְאֶת יְרִיבֵךְ. וְעִם מְרִיבַיִךְ אֲנִי אָרִיב:
44 וְהַאֲכַלְתִּי אֶת מוֹנַיִךְ. הַבַּבְלִיִּים לְחַיַּת הַשָּׂדֶה אֶת בְּשָׂרָם. מוֹנַיִךְ – לְשׁוֹן ״אַל תּוֹנוּ״ ויקרא כה:יד, אוֹנָאַת דְּבָרִים, הַמְקַנְתְּרִים אוֹתָךְ בְּגִדּוּפֵיהֶם:
45 וְכֶעָסִיס. מֶתֶק יַיִן:
46 דָּמָם יִשְׁכָּרוּן. כֵּן יִשְׁכְּרוּ מִדָּמָם אוֹתָם הָרְגִילִים לִשְׁתּוֹת דָּם, וּמִי הֵם אֵלּוּ? עוֹף הַשָּׁמַיִם. כֵּן תִּרְגֵּם יוֹנָתָן: