מקור ישעיהו ל״ו
1 וַיְהִ֡י בְּאַרְבַּע֩ עֶשְׂרֵ֨ה שָׁנָ֜ה לַמֶּ֣לֶךְ חִזְקִיָּ֗הוּ עָלָ֞ה סַנְחֵרִ֤יב מֶֽלֶךְ־אַשּׁוּר֙ עַ֣ל כׇּל־עָרֵ֧י יְהוּדָ֛ה הַבְּצֻר֖וֹת וַֽיִּתְפְּשֵֽׂם׃
2 וַיִּשְׁלַ֥ח מֶֽלֶךְ־אַשּׁ֣וּר אֶת־רַבְשָׁקֵ֨ה מִלָּכִ֧ישׁ יְרוּשָׁלַ֛͏ְמָה אֶל־הַמֶּ֥לֶךְ חִזְקִיָּ֖הוּ בְּחֵ֣יל כָּבֵ֑ד וַֽיַּעֲמֹ֗ד בִּתְעָלַת֙ הַבְּרֵכָ֣ה הָעֶלְיוֹנָ֔ה בִּמְסִלַּ֖ת שְׂדֵ֥ה כוֹבֵֽס׃
3 וַיֵּצֵ֥א אֵלָ֛יו אֶלְיָקִ֥ים בֶּן־חִלְקִיָּ֖הוּ אֲשֶׁ֣ר עַל־הַבָּ֑יִת וְשֶׁבְנָא֙ הַסֹּפֵ֔ר וְיוֹאָ֥ח בֶּן־אָסָ֖ף הַמַּזְכִּֽיר׃
4 וַיֹּ֤אמֶר אֲלֵיהֶם֙ רַבְשָׁקֵ֔ה אִמְרוּ־נָ֖א אֶל־חִזְקִיָּ֑הוּ כֹּֽה־אָמַ֞ר הַמֶּ֤לֶךְ הַגָּדוֹל֙ מֶ֣לֶךְ אַשּׁ֔וּר מָ֧ה הַבִּטָּח֛וֹן הַזֶּ֖ה אֲשֶׁ֥ר בָּטָֽחְתָּ׃
5 אָמַ֙רְתִּי֙ אַךְ־דְּבַר־שְׂפָתַ֔יִם עֵצָ֥ה וּגְבוּרָ֖ה לַמִּלְחָמָ֑ה עַתָּה֙ עַל־מִ֣י בָטַ֔חְתָּ כִּ֥י מָרַ֖דְתָּ בִּֽי׃
6 הִנֵּ֣ה בָטַ֡חְתָּ עַל־מִשְׁעֶ֩נֶת֩ הַקָּנֶ֨ה הָרָצ֤וּץ הַזֶּה֙ עַל־מִצְרַ֔יִם אֲשֶׁ֨ר יִסָּמֵ֥ךְ אִישׁ֙ עָלָ֔יו וּבָ֥א בְכַפּ֖וֹ וּנְקָבָ֑הּ כֵּ֚ן פַּרְעֹ֣ה מֶלֶךְ־מִצְרַ֔יִם לְכׇֽל־הַבֹּטְחִ֖ים עָלָֽיו׃
7 וְכִֽי־תֹאמַ֣ר אֵלַ֔י אֶל־יְהֹוָ֥ה אֱלֹהֵ֖ינוּ בָּטָ֑חְנוּ הֲלוֹא־ה֗וּא אֲשֶׁ֨ר הֵסִ֤יר חִזְקִיָּ֙הוּ֙ אֶת־בָּמֹתָ֣יו וְאֶת־מִזְבְּחֹתָ֔יו וַיֹּ֤אמֶר לִיהוּדָה֙ וְלִיר֣וּשָׁלַ֔͏ִם לִפְנֵ֛י הַמִּזְבֵּ֥חַ הַזֶּ֖ה תִּֽשְׁתַּחֲוֽוּ׃
8 וְעַתָּה֙ הִתְעָ֣רֶב נָ֔א אֶת־אֲדֹנִ֖י הַמֶּ֣לֶךְ אַשּׁ֑וּר וְאֶתְּנָ֤ה לְךָ֙ אַלְפַּ֣יִם סוּסִ֔ים אִם־תּוּכַ֕ל לָ֥תֶת לְךָ֖ רֹכְבִ֥ים עֲלֵיהֶֽם׃
9 וְאֵ֣יךְ תָּשִׁ֗יב אֵ֠ת פְּנֵ֨י פַחַ֥ת אַחַ֛ד עַבְדֵ֥י אֲדֹנִ֖י הַקְּטַנִּ֑ים וַתִּבְטַ֤ח לְךָ֙ עַל־מִצְרַ֔יִם לְרֶ֖כֶב וּלְפָרָשִֽׁים׃
10 וְעַתָּה֙ הֲמִבַּלְעֲדֵ֣י יְהֹוָ֔ה עָלִ֛יתִי עַל־הָאָ֥רֶץ הַזֹּ֖את לְהַשְׁחִיתָ֑הּ יְהֹוָה֙ אָמַ֣ר אֵלַ֔י עֲלֵ֛ה אֶל־הָאָ֥רֶץ הַזֹּ֖את וְהַשְׁחִיתָֽהּ׃ ס
11 וַיֹּ֣אמֶר אֶלְיָקִים֩ וְשֶׁבְנָ֨א וְיוֹאָ֜ח אֶל־רַבְשָׁקֵ֗ה דַּבֶּר־נָ֤א אֶל־עֲבָדֶ֙יךָ֙ אֲרָמִ֔ית כִּ֥י שֹׁמְעִ֖ים אֲנָ֑חְנוּ וְאַל־תְּדַבֵּ֤ר אֵלֵ֙ינוּ֙ יְהוּדִ֔ית בְּאׇזְנֵ֣י הָעָ֔ם אֲשֶׁ֖ר עַל־הַחוֹמָֽה׃
12 וַיֹּ֣אמֶר רַבְשָׁקֵ֗ה הַאֶ֨ל אֲדֹנֶ֤יךָ וְאֵלֶ֙יךָ֙ שְׁלָחַ֣נִי אֲדֹנִ֔י לְדַבֵּ֖ר אֶת־הַדְּבָרִ֣ים הָאֵ֑לֶּה הֲלֹ֣א עַל־הָאֲנָשִׁ֗ים הַיֹּֽשְׁבִים֙ עַל־הַ֣חוֹמָ֔ה לֶאֱכֹ֣ל אֶת־צוֹאָתָ֗ם חראיהם וְלִשְׁתּ֛וֹת אֶת־מֵימֵ֥י רַגְלֵיהֶ֖ם שיניהם עִמָּכֶֽם׃
13 וַֽיַּעֲמֹד֙ רַבְשָׁקֵ֔ה וַיִּקְרָ֥א בְקוֹל־גָּד֖וֹל יְהוּדִ֑ית וַיֹּ֕אמֶר שִׁמְע֗וּ אֶת־דִּבְרֵ֛י הַמֶּ֥לֶךְ הַגָּד֖וֹל מֶ֥לֶךְ אַשּֽׁוּר׃
14 כֹּ֚ה אָמַ֣ר הַמֶּ֔לֶךְ אַל־יַשִּׁ֥א לָכֶ֖ם חִזְקִיָּ֑הוּ כִּ֥י לֹֽא־יוּכַ֖ל לְהַצִּ֥יל אֶתְכֶֽם׃
15 וְאַל־יַבְטַ֨ח אֶתְכֶ֤ם חִזְקִיָּ֙הוּ֙ אֶל־יְהֹוָ֣ה לֵאמֹ֔ר הַצֵּ֥ל יַצִּילֵ֖נוּ יְהֹוָ֑ה לֹ֤א תִנָּתֵן֙ הָעִ֣יר הַזֹּ֔את בְּיַ֖ד מֶ֥לֶךְ אַשּֽׁוּר׃
16 אַֽל־תִּשְׁמְע֖וּ אֶל־חִזְקִיָּ֑הוּ פ כִּי֩ כֹ֨ה אָמַ֜ר הַמֶּ֣לֶךְ אַשּׁ֗וּר עֲשֽׂוּ־אִתִּ֤י בְרָכָה֙ וּצְא֣וּ אֵלַ֔י וְאִכְל֤וּ אִישׁ־גַּפְנוֹ֙ וְאִ֣ישׁ תְּאֵנָת֔וֹ וּשְׁת֖וּ אִ֥ישׁ מֵי־בוֹרֽוֹ׃
17 עַד־בֹּאִ֕י וְלָקַחְתִּ֥י אֶתְכֶ֖ם אֶל־אֶ֣רֶץ כְּאַרְצְכֶ֑ם אֶ֤רֶץ דָּגָן֙ וְתִיר֔וֹשׁ אֶ֥רֶץ לֶ֖חֶם וּכְרָמִֽים׃
18 פֶּן־יַסִּ֨ית אֶתְכֶ֤ם חִזְקִיָּ֙הוּ֙ לֵאמֹ֔ר יְהֹוָ֖ה יַצִּילֵ֑נוּ הַהִצִּ֜ילוּ אֱלֹהֵ֤י הַגּוֹיִם֙ אִ֣ישׁ אֶת־אַרְצ֔וֹ מִיַּ֖ד מֶ֥לֶךְ אַשּֽׁוּר׃
19 אַיֵּ֞ה אֱלֹהֵ֤י חֲמָת֙ וְאַרְפָּ֔ד אַיֵּ֖ה אֱלֹהֵ֣י סְפַרְוָ֑יִם וְכִֽי־הִצִּ֥ילוּ אֶת־שֹׁמְר֖וֹן מִיָּדִֽי׃
20 מִ֗י בְּכׇל־אֱלֹהֵ֤י הָאֲרָצוֹת֙ הָאֵ֔לֶּה אֲשֶׁר־הִצִּ֥ילוּ אֶת־אַרְצָ֖ם מִיָּדִ֑י כִּֽי־יַצִּ֧יל יְהֹוָ֛ה אֶת־יְרוּשָׁלַ֖͏ִם מִיָּדִֽי׃
21 וַֽיַּחֲרִ֔ישׁוּ וְלֹא־עָנ֥וּ אֹת֖וֹ דָּבָ֑ר כִּֽי־מִצְוַ֨ת הַמֶּ֥לֶךְ הִ֛יא לֵאמֹ֖ר לֹ֥א תַעֲנֻֽהוּ׃
22 וַיָּבֹ֣א אֶלְיָקִ֣ים בֶּן־חִלְקִיָּ֣הוּ אֲשֶׁר־עַל־הַ֠בַּ֠יִת וְשֶׁבְנָ֨א הַסֹּפֵ֜ר וְיוֹאָ֨ח בֶּן־אָסָ֧ף הַמַּזְכִּ֛יר אֶל־חִזְקִיָּ֖הוּ קְרוּעֵ֣י בְגָדִ֑ים וַיַּגִּ֣ידוּ ל֔וֹ אֵ֖ת דִּבְרֵ֥י רַבְשָׁקֵֽה׃ ס
פירוש רש"י על ישעיהו ל״ו
1 בִּתְעָלַת. פושי״ר בלע״ז:
2 בְּרֵכָה. מְקוֹם כִּנּוּס מַיִם, חָפוּר בַּקַּרְקַע בִּידֵי אָדָם לָתֵת בּוֹ דָּגִים, אָרוֹךְ וְרָחָב:
3 בִּמְסִלַּת. דֶּרֶךְ כְּבוּשָׁה, קמי״ן בלע״ז:
4 שְׂדֵה כוֹבֵס. תִּרְגֵּם יוֹנָתָן: ״חֲקַל מִשְׁטַח קַצְרַיָּא״, שֶׁשּׁוֹטְחִין שָׁם הַכּוֹבְסִים אֶת הַבְּגָדִים:
5 הַמַּזְכִּיר. כּוֹתֵב הַזִּכְרוֹנוֹת בְּסִפְרֵי דִּבְרֵי הַיָּמִים, דבר אחר: הַמַּזְכִּיר אֵיזֶה דִּין בָּא לְפָנָיו רִאשׁוֹן שֶׁיִּפְסְקֶנּוּ רִאשׁוֹן:
6 אָמַרְתִּי. עַד הֵנָּה אַךְ דִּבְרֵי שְׂפָתַיִם הוּא בְּפִיו לֵאמֹר: ״לֹא אֶעֱבֹד לְמֶלֶךְ אַשּׁוּר״, וּמִשֶּׁיִּרְאֶה שֶׁאֶעֱלֶה עָלָיו לְצָבָא יַחֲזֹר בּוֹ; עַכְשָׁיו הֲרֵי עָלִיתִי, מֵעַתָּה אוֹ יַעַבְדֵנִי, אוֹ צָרִיךְ הוּא לְבַקֵּשׁ עֵצָה וּגְבוּרָה לַמִּלְחָמָה:
7 עַתָּה. שֶׁבָּא הָעֵת, אֱמוֹר נָא עַל מִי בָטַחְתָּ לִמְרוֹד בִּי:
8 אֲשֶׁר יִסָּמֵךְ אִישׁ עַל הַקָּנֶה הָרָצוּץ הַנִּשְׁבָּר, וְהַקְּרוּמִיּוֹת בָּאִים בְכַפּוֹ וְנוֹקְבִין אוֹתָהּ, כֵּן פַּרְעֹה לַבּוֹטְחִים בּוֹ; סוֹפָן לִהְיוֹת עֶזְרָתוֹ לְרָעָתָן:
9 אֲשֶׁר הֵסִיר חִזְקִיָּהוּ אֶת בָּמֹתָיו. בִּעֵר אֶת כָּל בָּתֵּי עֲבוֹדָה זָרָה וּמִזְבְּחוֹת וּבָמוֹת, וְהִזְקִיק אֶת כָּל יְהוּדָה לְהִשְׁתַּחֲווֹת לִפְנֵי מִזְבֵּחַ אֶחָד:
10 הִתְעָרֶב נָא. בְּדָבָר זֶה, אִם תּוּכַל לְקַיְּמָן. לְשׁוֹן ׳עֵרָבוֹן׳, שֶׁקּוֹרִין גי״ר בלע״ז:
11 וְאֵיךְ תָּשִׁיב. אֲפִלּוּ פְּנֵי פַחַת אַחַד שֶׁהוּא מֵעַבְדֵי אֲדוֹנִי הַקְּטַנִּים, שֶׁהַקָּטָן בְּרָאשֵׁי גְּיָסוֹת שֶׁלּוֹ מְמֻנֶּה עַל אֲלָפִים אִישׁ מכילתא בשלח שירה ב:
12 אַחַד עַבְדֵי. אֶחָד מֵעַבְדֵי, כְּמוֹ ״אַחַד הַשִּׂיחִם״ בראשית כא:טו, ״אַחַד הָרֵיקִים״ שמואל ב ו:כ:
13 הֲמִבַּלְעֲדֵי ה׳. שֶׁלֹּא מֵרְשׁוּתוֹ:
14 ה׳ אָמַר אֵלַי. כְּבָר נִבְּאוּ הַנְּבִיאִים: ״יִשָּׂא אֶת חֵיל דַּמֶּשֶׂק וְאֶת שְׁלַל שׁוֹמְרוֹן לִפְנֵי מֶלֶךְ אַשּׁוּר״ ישעיהו ח:ד, וְהוּא טָעָה לוֹמַר: ״כַּאֲשֶׁר עָשִׂיתִי לְשׁוֹמְרוֹן כֵּן אֶעֱשֶׂה לִירוּשָׁלִָם״ ישעיהו י:יא:
15 כִּי שֹׁמְעִים אֲנָחְנוּ. מַכִּירִים אֲנַחְנוּ אוֹתוֹ לָשׁוֹן. שׁוֹמְעִים – איטנדנ״ט בלע״ז:
16 וְאַל תְּדַבֵּר אֵלֵינוּ יְהוּדִית. שֶׁכָּל הָעָם מַכִּירִים בְּלָשׁוֹן יְהוּדִית, וְהֵם מִתְפַּחֲדִים מִדְּבָרֶיךָ. לְפִי שֶׁאָמַר לָהֶם ״אִמְרוּ נָא אֶל חִזְקִיָּה״ ישעיהו לו:ד, סָבְרוּ שֶׁלֹּא בָּא לְהַפְחִיד הָעָם. וְרַבְשָׁקֵה יִשְׂרָאֵל מוּמָר הָיָה, כִּסְבוּרִים הֵם אַף שֶׁמִּצְוַת רַבּוֹ עַל רַבְשָׁקֵה, אֲבָל לִבּוֹ נִמְשָׁךְ לְמִשְׁפַּחְתּוֹ וְיִכָּמְרוּ נִחוּמָיו:
17 הַאֶל אֲדֹנֶיךָ תְּמִיהָה הוּא, לְכָךְ נָקוּד חֲטַף פַּתַּח. וְכִי אֶל שְׁנֵיכֶם לְבַדְּכֶם שְׁלָחַנִי אֲדֹנִי? הֲלוֹא אֶל כֻּלָּם שְׁלָחַנִי, וּלְכָךְ בָּאתִי, שֶׁכָּל הָעָם יִשְׁמְעוּ וְיִרְאוּ, וְאַל יְסִיתֵם חִזְקִיָּהוּ לִמְרוֹד:
18 לֶאֱכֹל אֶת צוֹאָתָם. אַף הֵם בְּרָעָב הַמָּצוֹר:
19 יֹאכְלוּ אֶת חֹרֵיהֶם. רְעִי הַיּוֹצֵא דֶּרֶךְ הַנֶּקֶב שֶׁלָּהֶם, וְלָשׁוֹן נָאֶה תִּקְּנוּ סוֹפְרִים לִקְרוֹתוֹ צוֹאָתָם. כָּךְ שָׁנוּ רַבּוֹתֵינוּ מגילה כה ב: מִקְרָאוֹת הַכְּתוּבִים לִגְנַאי קוֹרִין אוֹתוֹ לְשֶׁבַח, כְּמוֹ דברים כח:כז ״בַּעֲפוֹלִים״ – ״בַּטְּחוֹרִים״, דברים כח:ל ״יִשְׁגָּלֶנָּה״ – ״יִשְׁכָּבֶנָּה״, ״חוֹרֵיהֶם״ – ״צוֹאָתָם״:
20 שִׁינֵיהֶם. מֵימֵי רַגְלֵיהֶם, שִׁינֵיהֶם צוֹאָה לַחָה. שִׁינֵי דְכַרְכַּשְׁתָּא שבת פב א הִיא הַחַלְחֹלֶת חולין נ א שֶׁקּוֹרִין טבחי״א בלע״ז, עוֹמֶדֶת עַל יְדֵי שָׁלֹשׁ שִׁנַּיִם:
21 יַשִּׁא. יַתְעֶה:
22 עֲשׂוּ אִתִּי בְרָכָה. צְאוּ אֵלַי לְשָׁלוֹם וּבָרְכוּנִי, וְהָבִיאוּ אֵלַי תְּשׁוּרַת שָׁלוֹם:
23 בְּרָכָה. שלו״ד בלע״ז, כמו: ״וַיְבָרֶךְ יַעֲקֹב אֶת פַּרְעֹה״ בראשית מז:י:
24 וְאִכְלוּ אִישׁ גַּפְנוֹ. וְאֵלֵךְ מֵעֲלֵיכֶם וְשְׁבוּ בְּשָׁלוֹם עַד שֶׁאֶמְצָא אֶרֶץ טוֹבָה כְּאַרְצְכֶם, וְאַגְלֶה אֶתְכֶם שָׁם; כִּי כֵּן דַּרְכּוֹ, לְהַעֲבִיר הָאֻמּוֹת מֵאֶרֶץ אֶל אֶרֶץ, כְּמוֹ שֶׁנֶּאֱמַר ישעיהו י:יג ״וְאָסִיר גְּבוּלוֹת עַמִּים״:
25 אֶל אֶרֶץ כְּאַרְצְכֶם. אָמַר רַבִּי שִׁמְעוֹן בֶּן יוֹחַאי: שׁוֹטֶה הָיָה זֶה, מָשָׁל לְמֶלֶךְ וְכוּ׳ בְּסִפְרֵי פָּרָשַׁת וְהָיָה עֵקֶב דברים ז יב. הָיָה לוֹ לוֹמַר ״אֶל אֶרֶץ יָפָה מֵאַרְצְכֶם״, אֶלָּא שֶׁלֹּא הָיָה יָכוֹל לְסַפֵּר בִּגְנוּתָהּ:
26 וְכִי הִצִּילוּ אֶת שֹׁמְרוֹן מִיָּדִי. וּבְנֵי שׁוֹמְרוֹן הָיוּ עוֹבְדִים לֵאלֹהֵי אֲרָם שְׁכֵינֵיהֶם, וַחֲמָת הִיא מֵאֲרָם:
27 קְרוּעֵי בְגָדִים. עַל שֶׁשָּׁמְעוּ גִּדּוּפֵי הַשֵּׁם סנהדרין ס א, וְהִיא כְּמוֹ בִּרְכַּת הַשֵּׁם: