מקור דברי הימים ב ל״ד
1 בֶּן־שְׁמוֹנֶ֥ה שָׁנִ֖ים יֹאשִׁיָּ֣הוּ בְמׇלְכ֑וֹ וּשְׁלֹשִׁ֤ים וְאַחַת֙ שָׁנָ֔ה מָלַ֖ךְ בִּירוּשָׁלָֽ͏ִם׃
2 וַיַּ֥עַשׂ הַיָּשָׁ֖ר בְּעֵינֵ֣י יְהֹוָ֑ה וַיֵּ֗לֶךְ בְּדַרְכֵי֙ דָּוִ֣יד אָבִ֔יו וְלֹא־סָ֖ר יָמִ֥ין וּשְׂמֹֽאול׃
3 וּבִשְׁמוֹנֶ֨ה שָׁנִ֜ים לְמׇלְכ֗וֹ וְהוּא֙ עוֹדֶ֣נּוּ נַ֔עַר הֵחֵ֕ל לִדְר֕וֹשׁ לֵאלֹהֵ֖י דָּוִ֣יד אָבִ֑יו וּבִשְׁתֵּ֧ים עֶשְׂרֵ֣ה שָׁנָ֗ה הֵחֵל֙ לְטַהֵ֗ר אֶת־יְהוּדָה֙ וִיר֣וּשָׁלַ֔͏ִם מִן־הַבָּמוֹת֙ וְהָ֣אֲשֵׁרִ֔ים וְהַפְּסִלִ֖ים וְהַמַּסֵּכֽוֹת׃
4 וַיְנַתְּצ֣וּ לְפָנָ֗יו אֵ֚ת מִזְבְּח֣וֹת הַבְּעָלִ֔ים וְהַחַמָּנִ֛ים אֲשֶׁר־לְמַ֥עְלָה מֵעֲלֵיהֶ֖ם גִּדֵּ֑עַ וְ֠הָאֲשֵׁרִ֠ים וְהַפְּסִלִ֤ים וְהַמַּסֵּכוֹת֙ שִׁבַּ֣ר וְהֵדַ֔ק וַיִּזְרֹק֙ עַל־פְּנֵ֣י הַקְּבָרִ֔ים הַזֹּבְחִ֖ים לָהֶֽם׃
5 וְעַצְמוֹת֙ כֹּֽהֲנִ֔ים שָׂרַ֖ף עַל־מִזְבְּחוֹתָ֑ם מזבחותים וַיְטַהֵ֥ר אֶת־יְהוּדָ֖ה וְאֶת־יְרוּשָׁלָֽ͏ִם׃
6 וּבְעָרֵ֨י מְנַשֶּׁ֧ה וְאֶפְרַ֛יִם וְשִׁמְע֖וֹן וְעַד־נַפְתָּלִ֑י בחר בתיהם בְּחַרְבֹתֵיהֶ֖ם סָבִֽיב׃
7 וַיְנַתֵּ֣ץ אֶת־הַֽמִּזְבְּח֗וֹת וְאֶת־הָאֲשֵׁרִ֤ים וְהַפְּסִלִים֙ כִּתַּ֣ת לְהֵדַ֔ק וְכׇל־הַחַמָּנִ֥ים גִּדַּ֖ע בְּכׇל־אֶ֣רֶץ יִשְׂרָאֵ֑ל וַיָּ֖שׇׁב לִירוּשָׁלָֽ͏ִם׃ פ
8 וּבִשְׁנַ֨ת שְׁמוֹנֶ֤ה עֶשְׂרֵה֙ לְמׇלְכ֔וֹ לְטַהֵ֥ר הָאָ֖רֶץ וְהַבָּ֑יִת שָׁ֠לַ֠ח אֶת־שָׁפָ֨ן בֶּן־אֲצַלְיָ֜הוּ וְאֶת־מַעֲשֵׂיָ֣הוּ שַׂר־הָעִ֗יר וְ֠אֵ֠ת יוֹאָ֤ח בֶּן־יֽוֹאָחָז֙ הַמַּזְכִּ֔יר לְחַזֵּ֕ק אֶת־בֵּ֖ית יְהֹוָ֥ה אֱלֹהָֽיו׃
9 וַיָּבֹ֜אוּ אֶל־חִלְקִיָּ֣הוּ הַכֹּהֵ֣ן הַגָּד֗וֹל וַֽיִּתְּנוּ֮ אֶת־הַכֶּ֘סֶף֮ הַמּוּבָ֣א בֵית־אֱלֹהִים֒ אֲשֶׁ֣ר אָסְפֽוּ־הַלְוִיִּם֩ שֹׁמְרֵ֨י הַסַּ֜ף מִיַּ֧ד מְנַשֶּׁ֣ה וְאֶפְרַ֗יִם וּמִכֹּל֙ שְׁאֵרִ֣ית יִשְׂרָאֵ֔ל וּמִכׇּל־יְהוּדָ֖ה וּבִנְיָמִ֑ן וישבי וַיָּשׁ֖וּבוּ יְרוּשָׁלָֽ͏ִם׃
10 וַֽיִּתְּנ֗וּ עַל־יַד֙ עֹשֵׂ֣ה הַמְּלָאכָ֔ה הַמֻּפְקָדִ֖ים בְּבֵ֣ית יְהֹוָ֑ה וַיִּתְּנ֨וּ אֹת֜וֹ עוֹשֵׂ֣י הַמְּלָאכָ֗ה אֲשֶׁ֤ר עֹשִׂים֙ בְּבֵ֣ית יְהֹוָ֔ה לִבְדּ֥וֹק וּלְחַזֵּ֖ק הַבָּֽיִת׃
11 וַֽיִּתְּנ֗וּ לֶחָֽרָשִׁים֙ וְלַבֹּנִ֔ים לִקְנוֹת֙ אַבְנֵ֣י מַחְצֵ֔ב וְעֵצִ֖ים לַֽמְחַבְּר֑וֹת וּלְקָרוֹת֙ אֶת־הַבָּ֣תִּ֔ים אֲשֶׁ֥ר הִשְׁחִ֖יתוּ מַלְכֵ֥י יְהוּדָֽה׃ ס
12 וְהָאֲנָשִׁים֩ עֹשִׂ֨ים בֶּאֱמוּנָ֜ה בַּמְּלָאכָ֗ה וַעֲלֵיהֶ֣ם מֻ֠פְקָדִ֠ים יַ֣חַת וְעֹבַדְיָ֤הוּ הַלְוִיִּם֙ מִן־בְּנֵ֣י מְרָרִ֔י וּזְכַרְיָ֧ה וּמְשֻׁלָּ֛ם מִן־בְּנֵ֥י הַקְּהָתִ֖ים לְנַצֵּ֑חַ וְהַ֨לְוִיִּ֔ם כׇּל־מֵבִ֖ין בִּכְלֵי־שִֽׁיר׃
13 וְעַ֣ל הַסַּבָּלִ֗ים וּֽמְנַצְּחִים֙ לְכֹל֙ עֹשֵׂ֣ה מְלָאכָ֔ה לַעֲבוֹדָ֖ה וַעֲבוֹדָ֑ה וּמֵֽהַלְוִיִּ֔ם סוֹפְרִ֥ים וְשֹׁטְרִ֖ים וְשׁוֹעֲרִֽים׃
14 וּבְהוֹצִיאָ֣ם אֶת־הַכֶּ֔סֶף הַמּוּבָ֖א בֵּ֣ית יְהֹוָ֑ה מָצָא֙ חִלְקִיָּ֣הוּ הַכֹּהֵ֔ן אֶת־סֵ֥פֶר תּוֹרַת־יְהֹוָ֖ה בְּיַד־מֹשֶֽׁה׃
15 וַיַּ֣עַן חִלְקִיָּ֗הוּ וַיֹּ֙אמֶר֙ אֶל־שָׁפָ֣ן הַסּוֹפֵ֔ר סֵ֧פֶר הַתּוֹרָ֛ה מָצָ֖אתִי בְּבֵ֣ית יְהֹוָ֑ה וַיִּתֵּ֧ן חִלְקִיָּ֛הוּ אֶת־הַסֵּ֖פֶר אֶל־שָׁפָֽן׃
16 וַיָּבֵ֨א שָׁפָ֤ן אֶת־הַסֵּ֙פֶר֙ אֶל־הַמֶּ֔לֶךְ וַיָּ֨שֶׁב ע֧וֹד אֶת־הַמֶּ֛לֶךְ דָּבָ֖ר לֵאמֹ֑ר כֹּ֛ל אֲשֶׁר־נִתַּ֥ן בְּיַד־עֲבָדֶ֖יךָ הֵ֥ם עֹשִֽׂים׃
17 וַיַּתִּ֕יכוּ אֶת־הַכֶּ֖סֶף הַנִּמְצָ֣א בְּבֵית־יְהֹוָ֑ה וַֽיִּתְּנ֗וּהוּ עַל־יַד֙ הַמֻּפְקָדִ֔ים וְעַל־יַ֖ד עוֹשֵׂ֥י הַמְּלָאכָֽה׃
18 וַיַּגֵּ֞ד שָׁפָ֤ן הַסּוֹפֵר֙ לַמֶּ֣לֶךְ לֵאמֹ֔ר סֵ֚פֶר נָ֣תַן לִ֔י חִלְקִיָּ֖הוּ הַכֹּהֵ֑ן וַיִּקְרָא־ב֥וֹ שָׁפָ֖ן לִפְנֵ֥י הַמֶּֽלֶךְ׃
19 וַֽיְהִי֙ כִּשְׁמֹ֣עַ הַמֶּ֔לֶךְ אֵ֖ת דִּבְרֵ֣י הַתּוֹרָ֑ה וַיִּקְרַ֖ע אֶת־בְּגָדָֽיו׃
20 וַיְצַ֣ו הַמֶּ֡לֶךְ אֶת־חִלְקִיָּ֡הוּ וְאֶת־אֲחִיקָ֣ם בֶּן־שָׁ֠פָ֠ן וְאֶת־עַבְדּ֨וֹן בֶּן־מִיכָ֜ה וְאֵ֣ת שָׁפָ֣ן הַסּוֹפֵ֗ר וְאֵ֛ת עֲשָׂיָ֥ה עֶֽבֶד־הַמֶּ֖לֶךְ לֵאמֹֽר׃
21 לְכוּ֩ דִרְשׁ֨וּ אֶת־יְהֹוָ֜ה בַּעֲדִ֗י וּבְעַד֙ הַנִּשְׁאָר֙ בְּיִשְׂרָאֵ֣ל וּבִיהוּדָ֔ה עַל־דִּבְרֵ֥י הַסֵּ֖פֶר אֲשֶׁ֣ר נִמְצָ֑א כִּֽי־גְדוֹלָ֤ה חֲמַת־יְהֹוָה֙ אֲשֶׁ֣ר נִתְּכָ֣ה בָ֔נוּ עַל֩ אֲשֶׁ֨ר לֹֽא־שָׁמְר֤וּ אֲבוֹתֵ֙ינוּ֙ אֶת־דְּבַ֣ר יְהֹוָ֔ה לַעֲשׂ֕וֹת כְּכׇל־הַכָּת֖וּב עַל־הַסֵּ֥פֶר הַזֶּֽה׃
22 וַיֵּ֨לֶךְ חִלְקִיָּ֜הוּ וַאֲשֶׁ֣ר הַמֶּ֗לֶךְ אֶל־חֻלְדָּ֨ה הַנְּבִיאָ֜ה אֵ֣שֶׁת שַׁלֻּ֣ם בֶּן־תׇּקְהַ֗ת תוקהת בֶּן־חַסְרָה֙ שׁוֹמֵ֣ר הַבְּגָדִ֔ים וְהִ֛יא יוֹשֶׁ֥בֶת בִּירוּשָׁלַ֖͏ִם בַּמִּשְׁנֶ֑ה וַיְדַבְּר֥וּ אֵלֶ֖יהָ כָּזֹֽאת׃
23 וַתֹּ֣אמֶר לָהֶ֔ם כֹּֽה־אָמַ֥ר יְהֹוָ֖ה אֱלֹהֵ֣י יִשְׂרָאֵ֑ל אִמְר֣וּ לָאִ֔ישׁ אֲשֶׁר־שָׁלַ֥ח אֶתְכֶ֖ם אֵלָֽי׃ ס
24 כֹּ֚ה אָמַ֣ר יְהֹוָ֔ה הִנְנִ֨י מֵבִ֥יא רָעָ֛ה עַל־הַמָּק֥וֹם הַזֶּ֖ה וְעַל־יֽוֹשְׁבָ֑יו אֵ֤ת כׇּל־הָֽאָלוֹת֙ הַכְּתוּב֣וֹת עַל־הַסֵּ֔פֶר אֲשֶׁ֣ר קָֽרְא֔וּ לִפְנֵ֖י מֶ֥לֶךְ יְהוּדָֽה׃
25 תַּ֣חַת אֲשֶׁ֣ר עֲזָב֗וּנִי ויקטירו וַֽיְקַטְּרוּ֙ לֵאלֹהִ֣ים אֲחֵרִ֔ים לְמַ֙עַן֙ הַכְעִיסֵ֔נִי בְּכֹ֖ל מַעֲשֵׂ֣י יְדֵיהֶ֑ם וְתִתַּ֧ךְ חֲמָתִ֛י בַּמָּק֥וֹם הַזֶּ֖ה וְלֹ֥א תִכְבֶּֽה׃
26 וְאֶל־מֶ֣לֶךְ יְהוּדָ֗ה הַשֹּׁלֵ֤חַ אֶתְכֶם֙ לִדְר֣וֹשׁ בַּיהֹוָ֔ה כֹּ֥ה תֹאמְר֖וּ אֵלָ֑יו ס        כֹּֽה־אָמַ֤ר יְהֹוָה֙ אֱלֹהֵ֣י יִשְׂרָאֵ֔ל הַדְּבָרִ֖ים אֲשֶׁ֥ר שָׁמָֽעְתָּ׃
27 יַ֠עַן רַךְ־לְבָ֨בְךָ֜ וַתִּכָּנַ֣ע מִלִּפְנֵ֣י אֱלֹהִ֗ים בְּשׇׁמְעֲךָ֤ אֶת־דְּבָרָיו֙ עַל־הַמָּק֤וֹם הַזֶּה֙ וְעַל־יֹ֣שְׁבָ֔יו וַתִּכָּנַ֣ע לְפָנַ֔י וַתִּקְרַ֥ע אֶת־בְּגָדֶ֖יךָ וַתֵּ֣בְךְּ לְפָנָ֑י וְגַם־אֲנִ֥י שָׁמַ֖עְתִּי נְאֻם־יְהֹוָֽה׃
28 הִנְנִ֨י אֹסִפְךָ֜ אֶל־אֲבֹתֶ֗יךָ וְנֶאֱסַפְתָּ֣ אֶל־קִבְרוֹתֶ֘יךָ֮ בְּשָׁלוֹם֒ וְלֹא־תִרְאֶ֣ינָה עֵינֶ֔יךָ בְּכֹל֙ הָרָעָ֔ה אֲשֶׁ֨ר אֲנִ֥י מֵבִ֛יא עַל־הַמָּק֥וֹם הַזֶּ֖ה וְעַל־יֹֽשְׁבָ֑יו וַיָּשִׁ֥יבוּ אֶת־הַמֶּ֖לֶךְ דָּבָֽר׃ ס
29 וַיִּשְׁלַ֖ח הַמֶּ֑לֶךְ וַיֶּאֱסֹ֕ף אֶת־כׇּל־זִקְנֵ֥י יְהוּדָ֖ה וִירוּשָׁלָֽ͏ִם׃
30 וַיַּ֣עַל הַמֶּ֣לֶךְ בֵּית־יְ֠הֹוָ֠ה וְכׇל־אִ֨ישׁ יְהוּדָ֜ה וְיֹשְׁבֵ֣י יְרוּשָׁלַ֗͏ִם וְהַכֹּֽהֲנִים֙ וְהַלְוִיִּ֔ם וְכׇל־הָעָ֖ם מִגָּד֣וֹל וְעַד־קָטָ֑ן וַיִּקְרָ֣א בְאׇזְנֵיהֶ֗ם אֶת־כׇּל־דִּבְרֵי֙ סֵ֣פֶר הַבְּרִ֔ית הַנִּמְצָ֖א בֵּ֥ית יְהֹוָֽה׃
31 וַיַּעֲמֹ֨ד הַמֶּ֜לֶךְ עַל־עׇמְד֗וֹ וַיִּכְרֹ֣ת אֶֽת־הַבְּרִית֮ לִפְנֵ֣י יְהֹוָה֒ לָלֶ֜כֶת אַחֲרֵ֣י יְהֹוָ֗ה וְלִשְׁמ֤וֹר אֶת־מִצְוֺתָיו֙ וְעֵדְוֺתָ֣יו וְחֻקָּ֔יו בְּכׇל־לְבָב֖וֹ וּבְכׇל־נַפְשׁ֑וֹ לַעֲשׂוֹת֙ אֶת־דִּבְרֵ֣י הַבְּרִ֔ית הַכְּתוּבִ֖ים עַל־הַסֵּ֥פֶר הַזֶּֽה׃
32 וַיַּעֲמֵ֕ד אֵ֛ת כׇּל־הַנִּמְצָ֥א בִירוּשָׁלַ֖͏ִם וּבִנְיָמִ֑ן וַֽיַּעֲשׂוּ֙ יוֹשְׁבֵ֣י יְרוּשָׁלַ֔͏ִם כִּבְרִ֥ית אֱלֹהִ֖ים אֱלֹהֵ֥י אֲבוֹתֵיהֶֽם׃
33 וַיָּ֨סַר יֹאשִׁיָּ֜הוּ אֶת־כׇּל־הַתֹּעֵב֗וֹת מִֽכׇּל־הָאֲרָצוֹת֮ אֲשֶׁ֣ר לִבְנֵ֣י יִשְׂרָאֵל֒ וַֽיַּעֲבֵ֗ד אֵ֤ת כׇּל־הַנִּמְצָא֙ בְּיִשְׂרָאֵ֔ל לַעֲב֖וֹד אֶת־יְהֹוָ֣ה אֱלֹהֵיהֶ֑ם כׇּל־יָמָ֕יו לֹ֣א סָ֔רוּ מֵאַחֲרֵ֕י יְהֹוָ֖ה אֱלֹהֵ֥י אֲבוֹתֵיהֶֽם׃ ס
פירוש רש"י על דברי הימים ב ל״ד
1 וְהוּא עוֹדֶנּוּ נַעַר הֵחֵל לִדְרוֹשׁ. פִּתְרוֹן: אַף עַל פִּי שֶׁהָיָה נַעַר הֵחֵל לִדְרוֹשׁ אלֹהֵי דָּוִיד אָבִיו; דּוּגְמַת ״וְהוּא נַעַר אֶת בְּנֵי בִלְהָה… וַיָּבֵא יוֹסֵף אֶת דִּבָּתָם רָעָה״ בראשית לז:ב – וְאֵין תֵּימַהּ בַּדָּבָר, אֲבָל אִם הָיָה בֶּן שְׁלֹשִׁים שָׁנָה לֹא הָיָה עוֹשֶׂה; וְזֶה תֵּימַהּ, שֶׁהָיָה נַעַר, וְאַף עַל פִּי כֵּן הֵחֵל לִדְרוֹשׁ וְגוֹ׳:
2 הֵחֵל לְטַהֵר אֶת יְהוּדָה וִירוּשָׁלִַם. מִן הַבָּמוֹת וְהָאֲשֵׁרִים שֶׁעָשָׂה מְנַשֶּׁה וְחִדְּשָׁם אָמוֹן בְּנוֹ, כִּדְלְמַעְלָה דברי הימים ב לג:ג ״וַיָּשָׁב וַיִּבֶן אֶת הַבָּמוֹת אֲשֶׁר נִתֵּץ יְחִזְקִיָּהוּ אָבִיו וְגוֹ׳״:
3 וְהַחַמָּנִים. צוּרוֹת חַמָּה:
4 אֲשֶׁר לְמַעְלָה. שֶׁהוֹשִׁיבוּ לְמַעְלָה מֵהֶם, גָּבוֹהַּ כְּנֶגֶד הַחַמָּה, וּמִשְׁתַּחֲוִים לוֹ. כָּל זֶה עָשָׂה מְנַשֶּׁה, כְּדִכְתִיב לְעֵיל ״וַיִּשְׁתַּחֲוֶה לְכָל צְבָא הַשָּׁמַיִם וַיַּעֲבֹד אוֹתָם״ דברי הימים ב לג:ג:
5 וַיִּזְרֹק עַל פְּנֵי הַקְּבָרִים. כָּאן נִתְקַיֵּים מַה שֶּׁאָמַר לְיָרָבְעָם: ״כֹּה אָמַר ה׳ הִנֵּה בֵן נוֹלָד לְבֵית דָּוִד יֹאשִׁיָּהוּ שְׁמוֹ וְזָבַח עָלֶיךָ עַצְמוֹת אָדָם אֶת כֹּהֲנֵי הַבָּמוֹת הַמַּקְטִרִים״ מלכים א יג:ב:
6 וּבְעָרֵי מְנַשֶּׁה וְאֶפְרַיִם וְגוֹ׳. מֵאוֹתָן עוֹלְלוֹת שֶׁנִּשְׁתַּיְּרוּ מֵחֶרֶב וּמִשְּׁבִי סַנְחֵרִיב מלכים ב יז:ו:
7 בְּחַרְבֹתֵיהֶם. בְּהַר בָּתֵּיהֶם כְּתִיב, לְפִי שֶׁלֹּא הָיוּ כִּי אִם עוֹלֵלוֹת מְעַט, נִתְיָרְאוּ לֵישֵׁב בַּשְּׁפֵלָה, כִּי אִם לִקְבֹּעַ בְּהַר בָּתֵּיהֶם:
8 הַמַּזְכִּיר. בְּכָל מָקוֹם שֶׁכָּתוּב סוֹפֵר כָּתוּב בְּסָמוּךְ מַזְכִּיר, שֶׁהָיָה לְכָל מֶלֶךְ סוֹפֵר לִכְתֹּב כָּל הַמְּאוֹרָע לוֹ בַּמַּלְכוּת, בֵּין טוֹב בֵּין רַע, וַיְהִי לוֹ מַזְכִּיר יוֹשֵׁב אֵצֶל הַסּוֹפֵר לְהַזְכִּיר כָּל דָּבָר וְדָבָר, וְהַסּוֹפֵר כּוֹתֵב עַל פִּיו:
9 אֲשֶׁר אָסְפוּ הַלְוִיִּם שֹׁמְרֵי הַסַּף וְגוֹ׳. בְּחַרְבוֹתֵיהֶם סָבִיב:
10 לִבְדּוֹק וּלְחַזֵּק. ״לִרְאוֹת אֶת עֶרְוַת הָאָרֶץ״ בראשית מב:ט מְתַרְגְּמִינָן: ״וּלְמֶחֱזֵי יָת בִּדְקָא דְאַרְעָא״:
11 וְעֵצִים לַמְחַבְּרוֹת. שְׁפַּנְגִי״ן בִּלְשׁוֹן אַשְׁכְּנַ״ז:
12 וּלְקָרוֹת. טְרַבִי״ר בְּלַעַ״ז:
13 לְנַצֵּחַ. רוֹמִי״שׁ טְרִי״ר בְּלַעַ״ז, וְכֵן עזרא ג:ט ״לְנַצֵּחַ עַל הַמְּלָאכָה״, וְכֵן ״שֵׁשׁ מֵאוֹת מְנַצְּחִים״ לְעֵיל דברי הימים ב ב:יז:
14 וְהַלְוִיִּם כָּל מֵבִין. בְּכָל מָקוֹם אָמוּר לְעִנְיַן שִׁירָה הֲבָנָה, וְכֵן לְמַעְלָה כְּשֶׁהִפִּילוּ גּוֹרָלוֹת כְּתִיב ״כַּקָּטֹן כַּגָּדוֹל מֵבִין עִם תַּלְמִיד״ דברי הימים א כה:ח, וְכֵן ״כָּל הַמֵּבִין בִּכְלֵי שִׁיר״, וּכְתִיב ״וּכְנַנְיָהוּ שַׂר הַלְוִיִּם וְגוֹמֵר כִּי מֵבִין הוּא״ דברי הימים א טו:כב, וְהָיָה מְמֻנֶּה עֲלֵיהֶם לְיַסֵּר ״בַּמַּשָּׂא״ הֵיאַךְ יִשָּׂאוּ, כִּי מֵבִין הוּא:
15 וּמֵהַלְוִיִּם סוֹפְרִים. לִכְתּוֹב אֶת הַכֶּסֶף הַמּוּבָא בֵּית ה׳, וְהֵיאַךְ גָּבוּ אוֹתוֹ:
16 וְשׁוֹטְרִים. בַּמְּלָאכָה:
17 אֶת סֵפֶר תּוֹרַת ה׳ בְּיַד מֹשֶׁה. מִשְׁנֵה תּוֹרָה דברים:
18 וַיִּתֵּן חִלְקִיָּהוּ אֶת הַסֵּפֶר אֶל שָׁפָן. שֶׁהֲרֵי עַל הַסּוֹפֵר לִקְרוֹת אֶת הַכֹּל לִפְנֵי הַמֶּלֶךְ:
19 וַיָּשֶׁב עוֹד אֶת הַמֶּלֶךְ דָּבָר. שֶׁמִּתְּחִלָּה הֵשִׁיב לַמֶּלֶךְ שְׁלִיחוּתוֹ, שֶׁשְּׁלָחוֹ הַמֶּלֶךְ לְחַזֵּק בֵּית ה׳ אֱלֹהָיו, כְּמוֹ שֶׁכָּתוּב לְמַעְלָה שָׁלַח אֶת שָׁפָן בֶּן אֲצַלְיָהוּ וְגוֹ׳:
20 וַיַּתִּיכוּ. וַיַּצִּיקוּ; כְּמוֹ ״וַיִּצֹק שֶׁמֶן״ בראשית כח:יח וּמְתַרְגְּמִינָן: ״וְאַתִּיךְ״ תרגום אונקלוס:
21 וַיַּגֵּד שָׁפָן הַסּוֹפֵר. אַחַר שֶׁהֵשִׁיב הַמֶּלֶךְ דָּבָר מִשְּׁלִיחוּתוֹ, הִגִּיד לוֹ שְׁלִיחוּת שֶׁל חִלְקִיָּהוּ הַכֹּהֵן וַיִּקְרָא אֶת הַסֵּפֶר לְפָנָיו:
22 וַיִּקְרַע אֶת בְּגָדָיו. כְּשֶׁשָּׁמַע שֶׁהָיוּ קוֹרִין ״יוֹלֵךְ ה׳ אוֹתְךָ וְאֶת מַלְכְּךָ וְגוֹמֵר״ דברים כח:לו, וְדָרַשׁ בְּעַצְמוֹ ״אֲשֶׁר תָּקִים עָלֶיךָ״ דברים כח:לו – הָעָם הִמְלִיכוּ וְלֹא נָבִיא עַל פִּי הַדִּבּוּר יומא נב::
23 אֲשֶׁר נִתְּכָה בָנוּ. לְפִי שֶׁהַחֵמָה הִיא אֵשׁ, נוֹפֵל עָלֶיהָ לְשׁוֹן נִתּוּךְ, וְדֻגְמָתוֹ לְמַטָּה וְתִתַּךְ חֲמָתִי בַּמָּקוֹם הַזֶּה וְלֹא תִכְבֶּה:
24 אֶל חוּלְדָּה הַנְּבִיאָה. רַבּוֹתֵינוּ דָּרְשׁוּ מגלה יד:: לְפִי כִּי הָאִשָּׁה רַחֲמָנִית יוֹתֵר מִן הָאִישׁ, לָכֵן לֹא שָׁלַח אֶל יִרְמְיָהוּ הַנָּבִיא:
25 שׁוֹמֵר הַבְּגָדִים. אִם תִּרְצֶה לוֹמַר: אוֹ בִּגְדֵי כְהֻנָּה אוֹ בִּגְדֵי מַלְכוּת:
26 יוֹשֶׁבֶת בִּירוּשָׁלִַם בַּמִּשְׁנֶה. שְׁנֵי חוֹמוֹת הָיוּ לָעִיר, וְהִיא יוֹשֶׁבֶת בֵּין שְׁנֵי הַחוֹמוֹת. וְתַרְגּוּמוֹ: ״בֵּית אוּלְפָנָא״ – פֵּירוּשׁ: בִּמְקוֹם תּוֹרָה, כִּי לִשְׁכָּה אַחַת הָיְתָה לָהּ לְחוּלְדָּה, סְמוּכָה לְלִשְׁכַּת הַגָּזִית; לִשְׁכַּת חוּלְדָּה הָיְתָה פְּתוּחָה לַחוּץ וּסְתוּמָה כְּלַפֵּי סַנְהֶדְרִין שֶׁבְּלִשְׁכַּת הַגָּזִית, כָּךְ כָּתוּב בְּמַסֶּכֶת מִדּוֹת מדות א:ג – מִפְּנֵי צְנִיעוּת:
27 אִמְרוּ לָאִישׁ. לְפִי שֶׁרָצָה לְהַפְסִיק חֲזוֹן הָעָם עַל הַמָּקוֹם הַזֶּה וְעַל יוֹשְׁבָיו, וּכְשֶׁשִּׁלֵּם אוֹתוֹ חֲזוֹן, אָז מְבָאֵר הֵטֵיב: וְאֶל מֶלֶךְ יְהוּדָה הַשּׁוֹלֵחַ אֶתְכֶם, וּמְקַצֵּר נְבוּאַת הַמָּקוֹם וְיוֹשְׁבָיו וּמְסַלְּקוֹ, וְתוֹפְשׂוֹ בִּנְבוּאַת הַמֶּלֶךְ שֶׁהוּא מְרֻבָּה:
28 וְנֶאֱסַפְתָּ אֶל קִבְרוֹתֶיךָ בְּשָׁלוֹם. וַהֲלֹא נֶהֱרַג דברי הימים ב לה:כג-כד! אֶלָּא בְּשָׁלוֹם מִזֶּה שֶׁלֹּא תִרְאֶינָה עֵינֶיךָ בְּכֹל הָרָעָה אֲשֶׁר אֲנִי מֵבִיא עַל הַמָּקוֹם הַזֶּה וְעַל יֹשְׁבָיו, כְּלוֹמַר: חֻרְבַּן הַבַּיִת:
29 סֵפֶר הַבְּרִית. הֲרֵי כָּל הַחֲרָדָה שֶׁחָרַד הַמֶּלֶךְ עַל שֶׁנִּמְצָא כָתוּב ״יוֹלֵךְ ה׳ אוֹתְךָ״ דברים כח:לו, וְרָאָה שֶׁקָּרְאָה הַתּוֹרָה אוֹתָהּ בְּרִית, ״אֵלֶּה דִבְרֵי הַבְּרִית״ דברים כח:סט, וּלְכָךְ אַף הוּא כָּרַת בְּרִית. וְרָאָה כָתוּב בְּסָמוּךְ אַחֲרָיו ״וּשְׁמַרְתֶּם אֶת דִּבְרֵי וְגוֹ׳ וַעֲשִׂיתֶם אוֹתָם״ דברים כט:ח, גַּם רָאָה יֹאשִׁיָּהוּ כָּתוּב בְּסָמוּךְ ״אַתֶּם נִצָּבִים הַיּוֹם כֻּלְּכֶם וְגוֹ׳״, עַד ״טַפְּכֶם נְשֵׁיכֶם״, עַד ״לְעָבְרְךָ בִּבְרִית״, עַד ״כֹּרֵת עִמְּךָ הַיּוֹם״ דברים כט:ט-יא, אָמַר: אַף בְּאוֹתוֹ דֻגְמָא אֶכְרוֹת אַף אֲנִי בְּרִית, שֶׁשָּׁם כָּתוּב ״אַתֶּם נִצָּבִים וְגוֹ׳״, אַף אֲנִי ״וַיַּעֲמֹד כָּל הָעָם הַנִּמְצָא בִּירוּשָׁלִַם״ – מִקָּטֹן וְעַד גָּדוֹל:
30 בְּכָל לְבָבוֹ וּבְכָל נַפְשׁוֹ וְגוֹ׳. אֲשֶׁר מָצָא שָׁם כָּתוּב דברים ל:ב ״וְשַׁבְתָּ עַד ה׳ אֱלֹהֶיךָ בְּכָל לְבָבְךָ וּבְכָל נַפְשֶׁךָ״:
31 וַיַּעֲמֹד הַמֶּלֶךְ עַל עָמְדוֹ. לְשׁוֹן ״נִצָּבִים״ דברים כט:ט:
32 כְּבְרִית אֱלֹהִים אֱלֹהֵי אֲבוֹתֵיהֶם. כְּכָל אוֹתָן שֶׁכָּתוּב שָׁם ״אֱלֹהֵי אֲבוֹתֵיהֶם״, לְפִיכָךְ כְּתִיב כָּאן אֱלֹהֵי אֲבוֹתֵיהֶם, שֶׁכָּרַת לַאֲבוֹתָם בַּמִּדְבָּר. וְכָל בְּרִית שֶׁלְּשָׁם – עַל עֲבוֹדַת כּוֹכָבִים, דִּכְתִיב ״וַתִּרְאוּ אֶת שִׁקּוּצֵיהֶם וְגוֹ׳״ דברים כט:טז, עַד ״פּוֹנֶה הַיּוֹם מֵעִם ה׳״ דברים כט:יז, לְפִיכָךְ וַיָּסַר יֹאשִׁיָּהוּ אֶת כָּל הַתּוֹעֵבוֹת וְגוֹ׳: