1 וַיִּשְׁלַ֨ח יְחִזְקִיָּ֜הוּ עַל־כׇּל־יִשְׂרָאֵ֣ל וִיהוּדָ֗ה וְגַֽם־אִגְּרוֹת֙ כָּתַב֙ עַל־אֶפְרַ֣יִם וּמְנַשֶּׁ֔ה לָב֥וֹא לְבֵית־יְהֹוָ֖ה בִּירוּשָׁלָ֑͏ִם לַעֲשׂ֣וֹת פֶּ֔סַח לַיהֹוָ֖ה אֱלֹהֵ֥י יִשְׂרָאֵֽל׃
2 וַיִּוָּעַ֨ץ הַמֶּ֧לֶךְ וְשָׂרָ֛יו וְכׇל־הַקָּהָ֖ל בִּירוּשָׁלָ֑͏ִם לַעֲשׂ֥וֹת הַפֶּ֖סַח בַּחֹ֥דֶשׁ הַשֵּׁנִֽי׃
3 כִּ֣י לֹ֧א יָכְל֛וּ לַעֲשֹׂת֖וֹ בָּעֵ֣ת הַהִ֑יא כִּ֤י הַכֹּֽהֲנִים֙ לֹֽא־הִתְקַדְּשׁ֣וּ לְמַדַּ֔י וְהָעָ֖ם לֹא־נֶאֶסְפ֥וּ לִירוּשָׁלָֽ͏ִם׃
5 וַיַּעֲמִ֣ידוּ דָבָ֗ר לְהַעֲבִ֨יר ק֤וֹל בְּכׇל־יִשְׂרָאֵל֙ מִבְּאֵֽר־שֶׁ֣בַע וְעַד־דָּ֔ן לָב֞וֹא לַעֲשׂ֥וֹת פֶּ֛סַח לַיהֹוָ֥ה אֱלֹהֵֽי־יִשְׂרָאֵ֖ל בִּירוּשָׁלָ֑͏ִם כִּ֣י לֹ֥א לָרֹ֛ב עָשׂ֖וּ כַּכָּתֽוּב׃
6 וַיֵּלְכוּ֩ הָרָצִ֨ים בָּאִגְּר֜וֹת מִיַּ֧ד הַמֶּ֣לֶךְ וְשָׂרָ֗יו בְּכׇל־יִשְׂרָאֵל֙ וִֽיהוּדָ֔ה וּכְמִצְוַ֥ת הַמֶּ֖לֶךְ לֵאמֹ֑ר בְּנֵ֣י יִשְׂרָאֵ֗ל שׁ֚וּבוּ אֶל־יְהֹוָ֗ה אֱלֹהֵי֙ אַבְרָהָם֙ יִצְחָ֣ק וְיִשְׂרָאֵ֔ל וְיָשֹׁב֙ אֶל־הַפְּלֵיטָ֔ה הַנִּשְׁאֶ֣רֶת לָכֶ֔ם מִכַּ֖ף מַלְכֵ֥י אַשּֽׁוּר׃
7 וְאַל־תִּֽהְי֗וּ כַּאֲבֽוֹתֵיכֶם֙ וְכַ֣אֲחֵיכֶ֔ם אֲשֶׁ֣ר מָעֲל֔וּ בַּיהֹוָ֖ה אֱלֹהֵ֣י אֲבוֹתֵיהֶ֑ם וַיִּתְּנֵ֣ם לְשַׁמָּ֔ה כַּאֲשֶׁ֖ר אַתֶּ֥ם רֹאִֽים׃
8 עַתָּ֕ה אַל־תַּקְשׁ֥וּ עׇרְפְּכֶ֖ם כַּאֲבוֹתֵיכֶ֑ם תְּנוּ־יָ֣ד לַיהֹוָ֗ה וּבֹ֤אוּ לְמִקְדָּשׁוֹ֙ אֲשֶׁ֣ר הִקְדִּ֣ישׁ לְעוֹלָ֔ם וְעִבְדוּ֙ אֶת־יְהֹוָ֣ה אֱלֹהֵיכֶ֔ם וְיָשֹׁ֥ב מִכֶּ֖ם חֲר֥וֹן אַפּֽוֹ׃
9 כִּ֣י בְשׁוּבְכֶ֞ם עַל־יְהֹוָ֗ה אֲחֵיכֶ֨ם וּבְנֵיכֶ֤ם לְרַֽחֲמִים֙ לִפְנֵ֣י שֽׁוֹבֵיהֶ֔ם וְלָשׁ֖וּב לָאָ֣רֶץ הַזֹּ֑את כִּֽי־חַנּ֤וּן וְרַחוּם֙ יְהֹוָ֣ה אֱלֹהֵיכֶ֔ם וְלֹֽא־יָסִ֤יר פָּנִים֙ מִכֶּ֔ם אִם־תָּשׁ֖וּבוּ אֵלָֽיו׃ ס
10 וַיִּהְי֨וּ הָרָצִ֜ים עֹבְרִ֨ים מֵעִ֧יר לָעִ֛יר בְּאֶרֶץ־אֶפְרַ֥יִם וּמְנַשֶּׁ֖ה וְעַד־זְבֻל֑וּן וַיִּֽהְיוּ֙ מַשְׂחִיקִ֣ים עֲלֵיהֶ֔ם וּמַלְעִגִ֖ים בָּֽם׃
12 גַּ֣ם בִּיהוּדָ֗ה הָֽיְתָה֙ יַ֣ד הָאֱלֹהִ֔ים לָתֵ֥ת לָהֶ֖ם לֵ֣ב אֶחָ֑ד לַעֲשׂ֞וֹת מִצְוַ֥ת הַמֶּ֛לֶךְ וְהַשָּׂרִ֖ים בִּדְבַ֥ר יְהֹוָֽה׃
13 וַיֵּאָסְפ֤וּ יְרוּשָׁלַ֙͏ִם֙ עַם־רָ֔ב לַעֲשׂ֛וֹת אֶת־חַ֥ג הַמַּצּ֖וֹת בַּחֹ֣דֶשׁ הַשֵּׁנִ֑י קָהָ֖ל לָרֹ֥ב מְאֹֽד׃
14 וַיָּקֻ֕מוּ וַיָּסִ֙ירוּ֙ אֶת־הַֽמִּזְבְּח֔וֹת אֲשֶׁ֖ר בִּירוּשָׁלָ֑͏ִם וְאֵ֤ת כׇּל־הַֽמְקַטְּרוֹת֙ הֵסִ֔ירוּ וַיַּשְׁלִ֖יכוּ לְנַ֥חַל קִדְרֽוֹן׃
15 וַיִּשְׁחֲט֣וּ הַפֶּ֔סַח בְּאַרְבָּעָ֥ה עָשָׂ֖ר לַחֹ֣דֶשׁ הַשֵּׁנִ֑י וְהַכֹּהֲנִ֨ים וְהַלְוִיִּ֤ם נִכְלְמוּ֙ וַיִּֽתְקַדְּשׁ֔וּ וַיָּבִ֥יאוּ עֹל֖וֹת בֵּ֥ית יְהֹוָֽה׃
16 וַיַּעַמְד֤וּ עַל־עׇמְדָם֙ כְּמִשְׁפָּטָ֔ם כְּתוֹרַ֖ת מֹשֶׁ֣ה אִישׁ־הָאֱלֹהִ֑ים הַכֹּֽהֲנִים֙ זֹרְקִ֣ים אֶת־הַדָּ֔ם מִיַּ֖ד הַלְוִיִּֽם׃
17 כִּי־רַבַּ֥ת בַּקָּהָ֖ל אֲשֶׁ֣ר לֹא־הִתְקַדָּ֑שׁוּ וְהַלְוִיִּ֞ם עַל־שְׁחִיטַ֣ת הַפְּסָחִ֗ים לְכֹל֙ לֹ֣א טָה֔וֹר לְהַקְדִּ֖ישׁ לַיהֹוָֽה׃
18 כִּ֣י מַרְבִּ֣ית הָעָ֡ם רַ֠בַּ֠ת מֵאֶפְרַ֨יִם וּמְנַשֶּׁ֜ה יִשָּׂשכָ֤ר וּזְבֻלוּן֙ לֹ֣א הִטֶּהָ֔רוּ כִּֽי־אָכְל֥וּ אֶת־הַפֶּ֖סַח בְּלֹ֣א כַכָּת֑וּב כִּי֩ הִתְפַּלֵּ֨ל יְחִזְקִיָּ֤הוּ עֲלֵיהֶם֙ לֵאמֹ֔ר יְהֹוָ֥ה הַטּ֖וֹב יְכַפֵּ֥ר בְּעַֽד׃
19 כׇּל־לְבָב֣וֹ הֵכִ֔ין לִדְר֛וֹשׁ הָאֱלֹהִ֥ים יְהֹוָ֖ה אֱלֹהֵ֣י אֲבוֹתָ֑יו וְלֹ֖א כְּטׇהֳרַ֥ת הַקֹּֽדֶשׁ׃ ס
21 וַיַּעֲשׂ֣וּ בְנֵֽי־יִ֠שְׂרָאֵ֠ל הַנִּמְצְאִ֨ים בִּירוּשָׁלַ֜͏ִם אֶת־חַ֧ג הַמַּצּ֛וֹת שִׁבְעַ֥ת יָמִ֖ים בְּשִׂמְחָ֣ה גְדוֹלָ֑ה וּֽמְהַלְלִ֣ים לַ֠יהֹוָ֠ה י֣וֹם בְּי֞וֹם הַלְוִיִּ֧ם וְהַכֹּהֲנִ֛ים בִּכְלֵי־עֹ֖ז לַיהֹוָֽה׃ ס
22 וַיְדַבֵּ֣ר יְחִזְקִיָּ֗הוּ עַל־לֵב֙ כׇּל־הַלְוִיִּ֔ם הַמַּשְׂכִּילִ֥ים שֵֽׂכֶל־ט֖וֹב לַיהֹוָ֑ה וַיֹּאכְל֤וּ אֶת־הַמּוֹעֵד֙ שִׁבְעַ֣ת הַיָּמִ֔ים מְזַבְּחִים֙ זִבְחֵ֣י שְׁלָמִ֔ים וּמִ֨תְוַדִּ֔ים לַיהֹוָ֖ה אֱלֹהֵ֥י אֲבוֹתֵיהֶֽם׃ ס
23 וַיִּוָּֽעֲצוּ֙ כׇּל־הַקָּהָ֔ל לַעֲשׂ֕וֹת שִׁבְעַ֥ת יָמִ֖ים אֲחֵרִ֑ים וַיַּעֲשׂ֥וּ שִׁבְעַת־יָמִ֖ים שִׂמְחָֽה׃
24 כִּ֣י חִזְקִיָּ֣הוּ מֶֽלֶךְ־יְ֠הוּדָ֠ה הֵרִ֨ים לַקָּהָ֜ל אֶ֣לֶף פָּרִים֮ וְשִׁבְעַ֣ת אֲלָפִ֣ים צֹאן֒ ס וְהַשָּׂרִ֞ים הֵרִ֤ימוּ לַקָּהָל֙ פָּרִ֣ים אֶ֔לֶף וְצֹ֖אן עֲשֶׂ֣רֶת אֲלָפִ֑ים וַיִּֽתְקַדְּשׁ֥וּ כֹהֲנִ֖ים לָרֹֽב׃
25 וַֽיִּשְׂמְח֣וּ כׇּל־קְהַ֣ל יְהוּדָ֗ה וְהַכֹּֽהֲנִים֙ וְהַלְוִיִּ֔ם וְכׇל־הַקָּהָ֖ל הַבָּאִ֣ים מִיִּשְׂרָאֵ֑ל וְהַגֵּרִ֗ים הַבָּאִים֙ מֵאֶ֣רֶץ יִשְׂרָאֵ֔ל וְהַיּוֹשְׁבִ֖ים בִּיהוּדָֽה׃
26 וַתְּהִ֥י שִׂמְחָֽה־גְדוֹלָ֖ה בִּירוּשָׁלָ֑͏ִם כִּ֠י מִימֵ֞י שְׁלֹמֹ֤ה בֶן־דָּוִיד֙ מֶ֣לֶךְ יִשְׂרָאֵ֔ל לֹ֥א כָזֹ֖את בִּירוּשָׁלָֽ͏ִם׃ ס
27 וַיָּקֻ֜מוּ הַכֹּהֲנִ֤ים הַלְוִיִּם֙ וַיְבָרְכ֣וּ אֶת־הָעָ֔ם וַיִּשָּׁמַ֖ע בְּקוֹלָ֑ם וַתָּב֧וֹא תְפִלָּתָ֛ם לִמְע֥וֹן קׇדְשׁ֖וֹ לַשָּׁמָֽיִם׃ פ
1 וְגַם אִגְּרוֹת כָּתַב עַל אֶפְרַיִם וּמְנַשֶּׁה וְגוֹ׳. כִּי עֲדַיִן לֹא גָלוּ, כִּי זֶה הָיָה בְּשָׁנָה רִאשׁוֹנָה לְמָלְכוֹ, וְהֵם לֹא גָלוּ כִּי אִם בְּשֵׁשׁ לְמָלְכוֹ, כְּדִכְתִיב ״וַיִּלְכְּדֻהָ בִּקְצֵה שָׁלֹשׁ שָׁנִים בִּשְׁנַת שֵׁשׁ לְחִזְקִיָּה״ וְ״הִיא שְׁנַת תֵּשַׁע לְהוֹשֵׁעַ מֶלֶךְ יִשְׂרָאֵל״ מלכים ב יח:י, כַּאֲשֶׁר תִּמְצָא כָתוּב בְּסוֹף הַסֵּפֶר:
3 כִּי הַכֹּהֲנִים לֹא הִתְקַדְּשׁוּ לְמַדַּי. הִתְקַדְּשׁוּ לִהְיוֹת דַּי לְיִשְׂרָאֵל בָּהֶם לְהַקְרִיב פִּסְחֵיהֶם; וְאֵין צָרִיךְ לוֹמַר שֶׁלֹּא הָיוּ יְכוֹלִים לַעֲשׂוֹתוֹ בְּנִיסָן, שֶׁהֲרֵי לֹא כָּלוּ לְקַדֵּשׁ אֶת הַבַּיִת עַד שִׁשָּׁה עָשָׂר בְּנִיסָן דברי הימים ב כט:יז. וְכֵן פִּתְרוֹן כִּי לֹא יָכְלוּ לַעֲשׂוֹתוֹ בָּעֵת הַהִיא – כְּלוֹמַר: אֲפִילּוּ אִם לֹא עִכְּבוּ טָהֳרַת הַבַּיִת, שֶׁלֹּא כָּלוּ עַד שִׁשָּׁה עָשָׂר בְּנִיסָן, לֹא הָיִינוּ יְכוֹלִין לַעֲשׂוֹתוֹ עַתָּה, לְפִי כִּי הַכֹּהֲנִים לֹא הִתְקַדְּשׁוּ לְמַדָּי:
7 וְיָשֹׁב אֶל הַפְּלֵיטָה הַנִּשְׁאֶרֶת לָכֶם מִכַּף מַלְכֵי אַשּׁוּר. אַף עַל פִּי שֶׁלֹּא הָגְלוּ עֲדַיִן, קוֹרֵא לָהֶם פְּלֵיטָה, כִּי הָיָה נֶחְשָׁב בְּעֵינֵיהֶם כַּאֲשֶׁר גָּלוּ כְּבָר; וְעוֹד, כִּי מַלְכֵי אַשּׁוּר תָּפְשׂוּ הַכֹּל בִּימֵי אָחָז. וּמַה שֶּׁהָיָה בְּעֵינֵיהֶם כְּאִלּוּ גָּלוּ, לְפִי כִּי שֵׁשׁ שָׁנִים הָיוּ יִשְׂרָאֵל לְמֶלֶךְ אַשּׁוּר עֲבָדִים נוֹשְׂאֵי מִנְחָה, וְהָיָה מוֹשֵׁל בָּהֶם וּמוֹלִיכָן בַּגּוֹלָה וְעוֹשֶׂה בָּהֶם כִּרְצוֹנוֹ, וְזֶה הָיָה בְּתוֹךְ אוֹתָן שֵׁשׁ שָׁנִים; וּכְבָר גָּלוּ כַּמָּה פְּעָמִים בִּימֵי מַלְכֵי יִשְׂרָאֵל וְאָחָז, וְהֵם יוֹדְעִים: מִיָּד כְּשֶׁיִּמְרְדוּ יִשְׂרָאֵל בְּמֶלֶךְ אַשּׁוּר – יוֹלִיכֵם בַּגּוֹלָה; וְלָהֶם קוֹרֵא פְּלֵיטַת אַשּׁוּר, לְפִי שֶׁלֹּא מָשַׁל בָּהֶם וְלֹא בְּכָל אֶרֶץ יְהוּדָה:
8 וְאַל תִּהְיוּ כַּאֲבוֹתֵיכֶם וְכַאֲחֵיכֶם. פִּתְרוֹן: וְאִם תֹּאמַר עֲדַיִן בּוֹטְחִים אָנוּ שֶׁיַּעֲלֶה מֵעָלֵינוּ מֶלֶךְ אַשּׁוּר – אַל תִּהְיוּ כַּאֲבוֹתֵיכֶם, כָּל דּוֹר וָדוֹר שֶׁהָיָה לִפְנֵיכֶם; וּמָה אֵרַע לָהֶם כְּשֶׁעָזְבוּ אֶת ה׳ וַיִּמְעֲלוּ בּוֹ מַעַל? וַיִּתְּנֵם לְשַׁמָּה כַּאֲשֶׁר אַתֶּם רֹאִים:
9 עַתָּה אַל תַּקְשׁוּ עָרְפְּכֶם וְגוֹ׳ בְּשׁוּבְכֶם עַל ה׳ אֲחֵיכֶם וּבְנֵיכֶם יִהְיוּ לְרַחֲמִים לִפְנֵי שׁוֹבֵיהֶם וְלָשׁוּב לָאָרֶץ הַזֹּאת. אֲפִילּוּ אוֹתָן קְצָת שֶׁגָּלוּ כְּבָר, שֶׁהָיוּ נִלְחָמִים עִם יִשְׂרָאֵל וַיִּכְלוּ לָהֶם, וּמוֹלִיכִין אֶת בְּנֵיהֶם וְאֶת בְּנוֹתֵיהֶם בַּשִּׁבְיָה. וְאִם תָּשׁוּבוּ אֵלָיו, יִתְּנֵם לְרַחֲמִים לִפְנֵי שׁוֹבֵיהֶם לְשׁוּבָם לָאָרֶץ הַזֹּאת, כִּי חַנּוּן וְרַחוּם ה׳ אֱלֹהֵיכֶם:
11 וְהַכֹּהֲנִים וְהַלְוִיִּם נִכְלְמוּ. שֶׁעִכְּבוּ לְהִתְקַדֵּשׁ, וּלְפִיכָךְ עִכְּבוּ כָּל כָּךְ מִלָּבוֹא עַד עַתָּה; כִּי לֹא יוּכְלוּ לְהַאֲמִין בַּדָּבָר הַזֶּה קוֹדֶם לָכֵן, לְפִי שֶׁהִזְנִיחָן אָחָז מִכַּהֵן דברי הימים ב יא:יד, וְכָךְ הָיוּ אוֹמְרִים: אֶפְשָׁר אֶתְמוֹל עָבַד אָחָז עֲבוֹדַת כּוֹכָבִים, וּבְנוֹ יְחִזְקִיָּהוּ לְאַלְתַּר בְּשָׁנָה רִאשׁוֹנָה מִיָּד בַּחֹדֶשׁ הָרִאשׁוֹן – וְיֹאמַר לַכֹּהֲנִים וְלַלְוִיִּם לַעֲבֹד לָאֵל אֶחָד לְבַדּוֹ, וְיִצְטָרֵךְ לָנוּ! וּלְכָךְ נִתְעַצְּלוּ וְנִתְרַשְּׁלוּ מִלָּבֹא. וְגַם שְׁאָר יְהוּדָה שֶׁלְּפָנָיו הִזְנִיחַ אָחָז, וּכְשֶׁחָקְרוּ וְהֵבִינוּ בַּדָּבָר שֶׁהַכֹּל הָיָה לְשֵׁם שָׁמַיִם, בָּאוּ וַיִּתְקַדְּשׁוּ כֻּלָּם:
12 הַכֹּהֲנִים זֹרְקִים. כִּי מִקַּבָּלָה וְאֵילָךְ מִצְוַת כְּהֻנָּה. וְאַל תִּתְמַהּ לָמָּה לֹא שָׁחֲטוּ בְּעָלִים עַצְמָם, לְפִי שֶׁכָּתוּב בְּסָמוּךְ: כִּי רַבַּת בַּקָּהָל אֲשֶׁר לֹא הִתְקַדָּשׁוּ; וְהַלְוִיִּם הָיוּ עַל שְׁחִיטַת פִּסְחֵיהֶם:
14 כִּי אָכְלוּ אֶת הַפֶּסַח בְּלֹא כַכָּתוּב. שֶׁלֹּא כַּהֲלָכָה, שֶׁאֲכָלוּהוּ בְּטֻמְאָה, כִּי הִתְפַּלֵּל יְחִזְקִיָּהוּ עֲלֵיהֶם וְגוֹ׳:
15 כָּל לְבָבוֹ הֵכִין. כָּךְ מְפֹרָשׁ בִּבְרַיְתָא דְּרַבִּי אֱלִיעֶזֶר בְּנוֹ שֶׁל רַבִּי יוֹסֵי הַגְּלִילִי הַמַּתְחֶלֶת: בְּכָל מָקוֹם שֶׁאַתָּה מוֹצֵא דִּבְרֵי רַבִּי אֱלִיעֶזֶר בְּנוֹ שֶׁל רַבִּי יוֹסֵי הַגְּלִילִי בָּאַגָּדָה עֲשֵׂה אָזְנְךָ כַּאֲפַרְכֶּסֶת, שֶׁנֶּאֱמַר ״לְהַקְשִׁיב אָזְנְךָ לַתְּבוּנָה״ משלי ב:ב; מִשְּׁלֹשִׁים וּשְׁתַּיִם מִדּוֹת הָאַגָּדָה נִדְרָשׁ וְזֶה אֶחָד מֵהֶם: נֶחְלָק הַסֵּדֶר, כְּגוֹן זֶה: ה׳ הַטּוֹב יְכַפֵּר בְּעַד כָּל מִי שֶׁכָּל לְבָבוֹ הֵכִין לִדְרוֹשׁ הָאֱלֹהִים – לַעֲשׂוֹת פִּסְחוֹ, לְהַקְרִיב קָרְבָּנוֹ אַף עַל פִּי שֶׁלֹּא עָשׂוּ בְּטָהֳרַת הַקֹּדֶשׁ, כִּי לֹא טָהֵרוּ. וִיהוּדָה כֻּלָּם נִטְהֲרוּ, לְפִי שֶׁהָיוּ קְרוֹבִים לִירוּשָׁלַיִם וְהָיוּ יְכוֹלִים לְטַהֵר וּלְהִתְקַדֵּשׁ וְלָשׁוּב לִירוּשָׁלַיִם, אֲבָל רַבַּת מֵאֶפְרַיִם וּמְנַשֶּׁה יִשָּׂשכָר זְבוּלֻן אֵין לָהֶם כָּל כָּךְ פֶּשַׁע בַּדָּבָר, לְפִי שֶׁהָיָה לָהֶם הַדָּבָר רָחוֹק עַל יְדֵי אִגְּרוֹת, לֹא הָיָה לָהֶם לְהַמְתִּין וּלְאַחֵר מִלָּבוֹא עַד שֶׁיִּתְקַדְּשׁוּ, לְפִיכָךְ בָּאוּ וְלֹא נִטְהֲרוּ; וּלְפִי שֶׁלֹּא הָיְתָה פְּשִׁיעָתָם, לְפִיכָךְ תְּכַפֵּר בַּעֲדָם. וְכֵן ״יְשֻׂשׂוּם מִדְבָּר וְצִיָּה וְגוֹמֵר״ ישעיה לה:א הוּא נֶחְלָק הַסִּדּוּר:
17 הַמַּשְׂכִּילִים שֵׂכֶל טוֹב לַה׳. לְעִנְיַן שִׁירָה נוֹפֵל לוֹמַר לְשׁוֹן שֵׂכֶל, כְּמוֹ שֶׁנֶּאֱמַר ״וַיִּפֹּל הַגּוֹרָל מִזְרָחָה לְשֶׁלֶמְיָהוּ וּזְכַרְיָהוּ בְנוֹ יוֹעֵץ בְּשֵׂכֶל וְגוֹמֵר״ דברי הימים א כו:יד. וְדִבֵּר חִזְקִיָּהוּ עַל לִבָּם תַּנְחוּמִים וּדְבָרִים טוֹבִים, לְחַזְּקָם וְלַעֲזֹר לָהֶם כְּדֵי שֶׁיְּחַזְּקוּ אַף הֵם בְּשִׁיר שֵׂכֶל טוֹב לַה׳:
18 מִתְוַדִּים לַה׳. עַל זֶבַח תּוֹדָה, וּמוֹדִים לַה׳ עַל הַנֵּס שֶׁעָשָׂה לָהֶם, שֶׁזֶּבַח תּוֹדָה עַל נֵס הוּא בָּא:
22 כִּי מִימֵי שְׁלֹמֹה בֶן דָּוִד מֶלֶךְ יִשְׂרָאֵל לֹא הָיְתָה כָזֹאת בִּירוּשָׁלִָם. שֶׁמָּא עַם רַב יוֹתֵר הָיוּ בָּאִין לָרֶגֶל לִירוּשָׁלַיִם בִּימֵי שְׁלֹמֹה, אֲבָל שִׂמְחָה גְדוֹלָה לֹא הָיְתָה בִּירוּשָׁלִָם כָזֹאת מִימוֹת שְׁלֹמֹה, כִּי בְּיוֹתֵר שָׂמְחוּ עַל מַה שֶׁאִם הָיוּ כָּל רֶגֶל וָרֶגֶל מְקֻבָּצִים בִּירוּשָׁלַיִם לְפִי שֶׁלֹּא הָיָה לָהֶם חִדּוּשׁ אֵין לָהֶם שִׂמְחָה, אֲבָל עַתָּה, שֶׁכָּל יְמֵי אָחָז וּמַלְכֵי יְהוּדָה הָרְשָׁעִים לֹא עָלוּ לָרֶגֶל לִירוּשָׁלַיִם, וְעַתָּה הוּרְשׁוּ לַעֲלוֹת לִירוּשָׁלַיִם, שָׂמְחוּ שִׂמְחָה גְדוֹלָה. וּלְפִי שֶׁהָיָה כַּמָּה שָׁנִים שֶׁלֹּא עָלוּ לִירוּשָׁלַיִם עַד עַתָּה, הוּקְטַן בְּעֵינֵיהֶם שִׁבְעָה יָמִים דְּחַג הַמַּצּוֹת, וְהוֹסִיפוּ עוֹד שִׁבְעָה יָמִים כְּדֵי לִשְׂמֹחַ בָּהֶם, וְשָׂמְחוּ שִׂמְחָה גְדוֹלָה:
23 וַיְבָרְכוּ אֶת הָעָם. אִם תִּרְצֶה לוֹמַר: בֵּרְכָם בָּזֶה שֶׁבִּקְשׁוּ לָשׁוּב מֵאֶרֶץ שׁוֹבֵיהֶם, וַיִּשָּׁמַע ה׳ בְּקוֹלָם וַיְשִׁיבֵם אָז. דָּבָר אַחֵר: וַיִּשָּׁמַע בְּקוֹלָם. וְכֵן כָּתוּב לְמַעְלָה וַיִּשְׁמַע ה׳ אֶל יְחִזְקִיָּהוּ וַיִּרְפָּא אֶת הָעָם:
