מקור דברי הימים ב כ״ט
1 יְחִזְקִיָּ֣הוּ מָלַ֗ךְ בֶּן־עֶשְׂרִ֤ים וְחָמֵשׁ֙ שָׁנָ֔ה וְעֶשְׂרִ֤ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלָ֑͏ִם וְשֵׁ֣ם אִמּ֔וֹ אֲבִיָּ֖ה בַּת־זְכַרְיָֽהוּ׃
2 וַיַּ֥עַשׂ הַיָּשָׁ֖ר בְּעֵינֵ֣י יְהֹוָ֑ה כְּכֹ֥ל אֲשֶׁר־עָשָׂ֖ה דָּוִ֥יד אָבִֽיו׃
3 ה֣וּא בַשָּׁנָה֩ הָרִאשׁוֹנָ֨ה לְמׇלְכ֜וֹ בַּחֹ֣דֶשׁ הָרִאשׁ֗וֹן פָּתַ֛ח אֶת־דַּלְת֥וֹת בֵּית־יְהֹוָ֖ה וַֽיְחַזְּקֵֽם׃
4 וַיָּבֵ֥א אֶת־הַכֹּהֲנִ֖ים וְאֶת־הַלְוִיִּ֑ם וַיַּאַסְפֵ֖ם לִרְח֥וֹב הַמִּזְרָֽח׃
5 וַיֹּ֥אמֶר לָהֶ֖ם שְׁמָע֣וּנִי הַלְוִיִּ֑ם עַתָּ֣ה הִֽתְקַדְּשׁ֗וּ וְקַדְּשׁוּ֙ אֶת־בֵּ֤ית יְהֹוָה֙ אֱלֹהֵ֣י אֲבֹתֵיכֶ֔ם וְהוֹצִ֥יאוּ אֶת־הַנִּדָּ֖ה מִן־הַקֹּֽדֶשׁ׃
6 כִּֽי־מָעֲל֣וּ אֲבֹתֵ֗ינוּ וְעָשׂ֥וּ הָרַ֛ע בְּעֵינֵ֥י יְהֹוָֽה־אֱלֹהֵ֖ינוּ וַיַּעַזְבֻ֑הוּ וַיַּסֵּ֧בּוּ פְנֵיהֶ֛ם מִמִּשְׁכַּ֥ן יְהֹוָ֖ה וַיִּתְּנוּ־עֹֽרֶף׃
7 גַּ֣ם סָגְר֞וּ דַּלְת֣וֹת הָאוּלָ֗ם וַיְכַבּוּ֙ אֶת־הַנֵּר֔וֹת וּקְטֹ֖רֶת לֹ֣א הִקְטִ֑ירוּ וְעֹלָה֙ לֹא־הֶעֱל֣וּ בַקֹּ֔דֶשׁ לֵאלֹהֵ֖י יִשְׂרָאֵֽל׃
8 וַֽיְהִי֙ קֶ֣צֶף יְהֹוָ֔ה עַל־יְהוּדָ֖ה וִירוּשָׁלָ֑͏ִם וַיִּתְּנֵ֤ם לזועה לְזַעֲוָה֙ לְשַׁמָּ֣ה וְלִשְׁרֵקָ֔ה כַּאֲשֶׁ֛ר אַתֶּ֥ם רֹאִ֖ים בְּעֵינֵיכֶֽם׃
9 וְהִנֵּ֛ה נָפְל֥וּ אֲבוֹתֵ֖ינוּ בֶּחָ֑רֶב וּבָנֵ֨ינוּ וּבְנוֹתֵ֧ינוּ וְנָשֵׁ֛ינוּ בַּשְּׁבִ֖י עַל־זֹֽאת׃
10 עַתָּה֙ עִם־לְבָבִ֔י לִכְר֣וֹת בְּרִ֔ית לַיהֹוָ֖ה אֱלֹהֵ֣י יִשְׂרָאֵ֑ל וְיָשֹׁ֥ב מִמֶּ֖נּוּ חֲר֥וֹן אַפּֽוֹ׃
11 בָּנַ֕י עַתָּ֖ה אַל־תִּשָּׁל֑וּ כִּֽי־בָכֶ֞ם בָּחַ֣ר יְהֹוָ֗ה לַעֲמֹ֤ד לְפָנָיו֙ לְשָׁ֣רְת֔וֹ וְלִהְי֥וֹת ל֖וֹ מְשָׁרְתִ֥ים וּמַקְטִרִֽים׃ פ
12 וַיָּקֻ֣מוּ הַ֠לְוִיִּ֠ם מַ֣חַת בֶּן־עֲמָשַׂ֞י וְיוֹאֵ֣ל בֶּן־עֲזַרְיָ֘הוּ֮ מִן־בְּנֵ֣י הַקְּהָתִי֒ וּמִן־בְּנֵ֣י מְרָרִ֔י קִ֚ישׁ בֶּן־עַבְדִּ֔י וַעֲזַרְיָ֖הוּ בֶּן־יְהַלֶּלְאֵ֑ל ס        וּמִן־הַגֵּ֣רְשֻׁנִּ֔י יוֹאָח֙ בֶּן־זִמָּ֔ה וְעֵ֖דֶן בֶּן־יוֹאָֽח׃
13 וּמִן־בְּנֵי֙ אֱלִ֣יצָפָ֔ן שִׁמְרִ֖י ויעואל וִיעִיאֵ֑ל וּמִן־בְּנֵ֣י אָסָ֔ף זְכַרְיָ֖הוּ וּמַתַּנְיָֽהוּ׃ ס
14 וּמִן־בְּנֵ֥י הֵימָ֖ן יחואל יְחִיאֵ֣ל וְשִׁמְעִ֑י ס        וּמִן־בְּנֵ֣י יְדוּת֔וּן שְׁמַֽעְיָ֖ה וְעֻזִּיאֵֽל׃
15 וַיַּאַסְפ֤וּ אֶת־אֲחֵיהֶם֙ וַיִּֽתְקַדְּשׁ֔וּ וַיָּבֹ֥אוּ כְמִצְוַת־הַמֶּ֖לֶךְ בְּדִבְרֵ֣י יְהֹוָ֑ה לְטַהֵ֖ר בֵּ֥ית יְהֹוָֽה׃
16 וַיָּבֹ֣אוּ הַ֠כֹּהֲנִ֠ים לִפְנִ֣ימָה בֵית־יְהֹוָה֮ לְטַהֵר֒ וַיּוֹצִ֗יאוּ אֵ֤ת כׇּל־הַטֻּמְאָה֙ אֲשֶׁ֤ר מָֽצְאוּ֙ בְּהֵיכַ֣ל יְהֹוָ֔ה לַחֲצַ֖ר בֵּ֣ית יְהֹוָ֑ה וַֽיְקַבְּלוּ֙ הַלְוִיִּ֔ם לְהוֹצִ֥יא לְנַחַל־קִדְר֖וֹן חֽוּצָה׃
17 וַ֠יָּחֵ֠לּוּ בְּאֶחָ֞ד לַחֹ֣דֶשׁ הָרִאשׁוֹן֮ לְקַדֵּשׁ֒ וּבְי֧וֹם שְׁמוֹנָ֣ה לַחֹ֗דֶשׁ בָּ֚אוּ לְאוּלָ֣ם יְהֹוָ֔ה וַיְקַדְּשׁ֥וּ אֶת־בֵּית־יְהֹוָ֖ה לְיָמִ֣ים שְׁמוֹנָ֑ה וּבְי֨וֹם שִׁשָּׁ֥ה עָשָׂ֛ר לַחֹ֥דֶשׁ הָרִאשׁ֖וֹן כִּלּֽוּ׃ ס
18 וַיָּב֤וֹאֽוּ פְנִ֙ימָה֙ אֶל־חִזְקִיָּ֣הוּ הַמֶּ֔לֶךְ וַיֹּ֣אמְר֔וּ טִהַ֖רְנוּ אֶת־כׇּל־בֵּ֣ית יְהֹוָ֑ה אֶת־מִזְבַּ֤ח הָעוֹלָה֙ וְאֶת־כׇּל־כֵּלָ֔יו וְאֶת־שֻׁלְחַ֥ן הַֽמַּעֲרֶ֖כֶת וְאֶת־כׇּל־כֵּלָֽיו׃
19 וְאֵ֣ת כׇּל־הַכֵּלִ֗ים אֲשֶׁ֣ר הִזְנִ֩יחַ֩ הַמֶּ֨לֶךְ אָחָ֧ז בְּמַלְכוּת֛וֹ בְּמַעֲל֖וֹ הֵכַ֣נּוּ וְהִקְדָּ֑שְׁנוּ וְהִנָּ֕ם לִפְנֵ֖י מִזְבַּ֥ח יְהֹוָֽה׃ ס
20 וַיַּשְׁכֵּם֙ יְחִזְקִיָּ֣הוּ הַמֶּ֔לֶךְ וַיֶּאֱסֹ֕ף אֵ֖ת שָׂרֵ֣י הָעִ֑יר וַיַּ֖עַל בֵּ֥ית יְהֹוָֽה׃
21 וַיָּבִ֣יאוּ פָֽרִים־שִׁבְעָה֩ וְאֵילִ֨ים שִׁבְעָ֜ה וּכְבָשִׂ֣ים שִׁבְעָ֗ה וּצְפִירֵ֨י עִזִּ֤ים שִׁבְעָה֙ לְחַטָּ֔את עַל־הַמַּמְלָכָ֥ה וְעַל־הַמִּקְדָּ֖שׁ וְעַל־יְהוּדָ֑ה וַיֹּ֗אמֶר לִבְנֵ֤י אַֽהֲרֹן֙ הַכֹּ֣הֲנִ֔ים לְהַעֲל֖וֹת עַל־מִזְבַּ֥ח יְהֹוָֽה׃
22 וַֽיִּשְׁחֲטוּ֙ הַבָּקָ֔ר וַיְקַבְּל֤וּ הַכֹּֽהֲנִים֙ אֶת־הַדָּ֔ם וַֽיִּזְרְק֖וּ הַמִּזְבֵּ֑חָה וַיִּשְׁחֲט֣וּ הָאֵלִ֗ים וַיִּזְרְק֤וּ הַדָּם֙ הַמִּזְבֵּ֔חָה וַֽיִּשְׁחֲטוּ֙ הַכְּבָשִׂ֔ים וַיִּזְרְק֥וּ הַדָּ֖ם הַמִּזְבֵּֽחָה׃
23 וַיַּגִּ֙ישׁוּ֙ אֶת־שְׂעִירֵ֣י הַחַטָּ֔את לִפְנֵ֥י הַמֶּ֖לֶךְ וְהַקָּהָ֑ל וַיִּסְמְכ֥וּ יְדֵיהֶ֖ם עֲלֵיהֶֽם׃
24 וַיִּשְׁחָטוּם֙ הַכֹּ֣הֲנִ֔ים וַֽיְחַטְּא֤וּ אֶת־דָּמָם֙ הַמִּזְבֵּ֔חָה לְכַפֵּ֖ר עַל־כׇּל־יִשְׂרָאֵ֑ל כִּ֤י לְכׇל־יִשְׂרָאֵל֙ אָמַ֣ר הַמֶּ֔לֶךְ הָעוֹלָ֖ה וְהַחַטָּֽאת׃
25 וַיַּעֲמֵ֨ד אֶת־הַלְוִיִּ֜ם בֵּ֣ית יְהֹוָ֗ה בִּמְצִלְתַּ֙יִם֙ בִּנְבָלִ֣ים וּבְכִנֹּר֔וֹת בְּמִצְוַ֥ת דָּוִ֛יד וְגָ֥ד חֹזֵֽה־הַמֶּ֖לֶךְ וְנָתָ֣ן הַנָּבִ֑יא כִּ֧י בְיַד־יְהֹוָ֛ה הַמִּצְוָ֖ה בְּיַד־נְבִיאָֽיו׃
26 וַיַּעַמְד֤וּ הַלְוִיִּם֙ בִּכְלֵ֣י דָוִ֔יד וְהַכֹּהֲנִ֖ים בַּחֲצֹצְרֽוֹת׃ פ
27 וַיֹּ֙אמֶר֙ חִזְקִיָּ֔הוּ לְהַעֲל֥וֹת הָעֹלָ֖ה לְהַמִּזְבֵּ֑חַ וּבְעֵ֞ת הֵחֵ֣ל הָעוֹלָ֗ה הֵחֵ֤ל שִׁיר־יְהֹוָה֙ וְהַחֲצֹ֣צְר֔וֹת וְעַ֨ל־יְדֵ֔י כְּלֵ֖י דָּוִ֥יד מֶלֶךְ־יִשְׂרָאֵֽל׃
28 וְכׇל־הַקָּהָל֙ מִֽשְׁתַּחֲוִ֔ים וְהַשִּׁ֣יר מְשׁוֹרֵ֔ר וְהַחֲצֹצְר֖וֹת מחצצרים מַחְצְרִ֑ים הַכֹּ֕ל עַ֖ד לִכְל֥וֹת הָעֹלָֽה׃
29 וּכְכַלּ֖וֹת לְהַעֲל֑וֹת כָּֽרְע֗וּ הַמֶּ֛לֶךְ וְכׇֽל־הַנִּמְצְאִ֥ים אִתּ֖וֹ וַיִּֽשְׁתַּחֲוֽוּ׃
30 וַ֠יֹּ֠אמֶר יְחִזְקִיָּ֨הוּ הַמֶּ֤לֶךְ וְהַשָּׂרִים֙ לַלְוִיִּ֔ם לְהַלֵּל֙ לַֽיהֹוָ֔ה בְּדִבְרֵ֥י דָוִ֖יד וְאָסָ֣ף הַחֹזֶ֑ה וַֽיְהַלְלוּ֙ עַד־לְשִׂמְחָ֔ה וַֽיִּקְּד֖וּ וַיִּֽשְׁתַּחֲוֽוּ׃ פ
31 וַיַּ֨עַן יְחִזְקִיָּ֜הוּ וַיֹּ֗אמֶר עַתָּה֙ מִלֵּאתֶ֤ם יֶדְכֶם֙ לַֽיהֹוָ֔ה גֹּ֧שׁוּ וְהָבִ֛יאוּ זְבָחִ֥ים וְתוֹד֖וֹת לְבֵ֣ית יְהֹוָ֑ה וַיָּבִ֤יאוּ הַקָּהָל֙ זְבָחִ֣ים וְתוֹד֔וֹת וְכׇל־נְדִ֥יב לֵ֖ב עֹלֽוֹת׃
32 וַיְהִ֞י מִסְפַּ֣ר הָעֹלָה֮ אֲשֶׁ֣ר הֵבִ֣יאוּ הַקָּהָל֒ בָּקָ֣ר שִׁבְעִ֔ים אֵילִ֥ים מֵאָ֖ה כְּבָשִׂ֣ים מָאתָ֑יִם לְעֹלָ֥ה לַֽיהֹוָ֖ה כׇּל־אֵֽלֶּה׃
33 וְֽהַקֳּדָשִׁ֑ים בָּקָר֙ שֵׁ֣שׁ מֵא֔וֹת וְצֹ֖אן שְׁלֹ֥שֶׁת אֲלָפִֽים׃
34 רַ֤ק הַכֹּֽהֲנִים֙ הָי֣וּ לִמְעָ֔ט וְלֹ֣א יָכְל֔וּ לְהַפְשִׁ֖יט אֶת־כׇּל־הָעֹל֑וֹת וַֽיְחַזְּק֞וּם אֲחֵיהֶ֣ם הַלְוִיִּ֗ם עַד־כְּל֤וֹת הַמְּלָאכָה֙ וְעַ֣ד יִתְקַדְּשׁ֣וּ הַכֹּהֲנִ֔ים כִּ֤י הַלְוִיִּם֙ יִשְׁרֵ֣י לֵבָ֔ב לְהִתְקַדֵּ֖שׁ מֵהַכֹּהֲנִֽים׃
35 וְגַם־עֹלָ֨ה לָרֹ֜ב בְּחֶלְבֵ֧י הַשְּׁלָמִ֛ים וּבַנְּסָכִ֖ים לָֽעֹלָ֑ה וַתִּכּ֖וֹן עֲבוֹדַ֥ת בֵּית־יְהֹוָֽה׃
36 וַיִּשְׂמַ֤ח יְחִזְקִיָּ֙הוּ֙ וְכׇל־הָעָ֔ם עַ֛ל הַהֵכִ֥ין הָאֱלֹהִ֖ים לָעָ֑ם כִּ֥י בְּפִתְאֹ֖ם הָיָ֥ה הַדָּבָֽר׃ פ
פירוש רש"י על דברי הימים ב כ״ט
1 וַיְחַזְּקֵם. לְפִי שֶׁאָחָז קִצֵּץ אֶת כָּל כְּלֵי בֵית הָאֱלֹהִים:
2 וְהוֹצִיאוּ אֶת הַנִּדָּה. עֲבוֹדַת כּוֹכָבִים, אֶת הַמֵּת לֹא נֶאֱמַר כָּאן, כִּי אִם נִדָּה, וּמָאוּס יוֹתֵר מִן הַמֵּת הַמֻּטָּל שָׁלֵם; דֻּגְמָא: ״כְּטֻמְאַת הַנִּדָּה״ יחזקאל לו:יז – כִּי דַּם נִדָּה מָאוּס וּמְסֹרָח:
3 וַיְכַבּוּ אֶת הַנֵּרוֹת וּקְטֹרֶת לֹא הִקְטִירוּ וְעֹלָה לֹא הֶעֱלוּ בַקֹּדֶשׁ לֵאלֹהֵי יִשְׂרָאֵל. אֲבָל לֵאלֹהִים אֲחֵרִים עָשׂוּ בָמוֹת לְכָל עִיר וָעִיר לְקַטֵּר לָהֶם דברי הימים ב כח:כה:
4 אַל תִּשָּׁלוּ. לְשׁוֹן שְׁגָגָה:
5 וַיָּבֹאוּ הַכֹּהֲנִים לִפְנִימָה. כִּי לֹא עַל הַלְוִיִּם לִיכָּנֵס פְּנִימָה:
6 לַחֲצַר בֵּית ה׳. מְקוֹם מַעֲמַד הַלְוִיִּם, כְּאוֹמְרוֹ: וַיְקַבְּלוּ הַלְוִיִּם וְגוֹ׳ וַיָּחֵלּוּ בְּאֶחָד לַחֹדֶשׁ:
7 וַיְקַדְּשׁוּ אֶת בֵּית ה׳ לְיָמִים שְׁמוֹנָה. לְכָךְ עִכְּבוּ בַּטָּהֳרָה לְטַהֵר כָּל כָּךְ, לְפִי שֶׁאָחָז צִיֵּר כָּל הַכְּתָלִים צַלְמֵי מַשְׂכִּית, כְּדִכְתִיב: ״צַלְמֵי כַשְׂדִּים חֲקוּקִים בַּשָּׁשַׁר״ יחזקאל כג:יד, וְעִכְּבוּ שְׁמוֹנָה יָמִים עַד שֶׁהִשְׁחִיתוּ דְּמוּת הַצְּלָמִים מִן הַכְּתָלִים, וּבְיוֹם שִׁשָּׁה עָשָׂר לַחֹדֶשׁ כִּלּוּ הַכֹּל, הַבַּיִת וְהָעֲזָרָה:
8 הֵכַנּוּ וְהִקְדָּשְׁנוּ. מְפֹרָשׁ בַּעֲבוֹדָה זָרָה בְּפֶרֶק רַבִּי יִשְׁמָעֵאל עבודה זרה נב:: כֵּלִים שֶׁשִּׁמְּשׁוּ בְּבֵית חוֹנְיוֹ מַהוּ וְכוּ׳, עַד אֵיתִיבֵיהּ: אֲשֶׁר הִזְנִיחַ אָחָז הֵכַנּוּ וְהִקְדָּשְׁנוּ; מַאי לָאו הֵכַנּוּ – דְּאַטְבְּלִינְהוּ; הִקְדַּשְׁנוּ – דְּאַקְדְּשִׁינְהוּ. אָמַר לוֹ: בָּרוּךְ אַתָּה לַשָּׁמַיִם שֶׁהֶחֱזַרְתָּ לִי אֲבֵדָתִי: הֵכַנּוּ – שֶׁגְּנָזוּם, וְהִקְדָּשְׁנוּ – שֶׁהִקְדַּשְׁנוּ אֲחֵרִים תַּחְתֵּיהֶם:
9 וּצְפִירֵי עִזִּים וְגוֹ׳. הוֹרָאַת שָׁעָה הָיְתָה:
10 עַל מִזְבַּח ה׳. וְלֹא עַל אוֹתָן מִזְבְּחוֹת שֶׁעָשָׂה אָחָז אָבִיו דברי הימים ב כח:כה:
11 לְכַפֵּר עַל כָּל יִשְׂרָאֵל. שֶׁחָטְאוּ בַּעֲבוֹדַת כּוֹכָבִים; כֵּן אָמַר הַמֶּלֶךְ: תְּהִי הָעוֹלָה וְהַחַטָּאת עֲבוּר כָּל יִשְׂרָאֵל. בְּפָרָשַׁת שְׁלַח לְךָ כְּתִיב ״וְעָשׂוּ כָל הָעֵדָה פַּר וְגוֹ׳״ במדבר טו:כד, וּכְתִיב ״וְהִקְרִיבוּ הַקָּהָל פַּר בֶּן בָּקָר לְחַטָּאת״ ויקרא ד:יד, וְכָאן כְּתִיב וַיָּבִיאוּ פָּרִים… וְאֵילִים… וּצְפִירֵי עִזִּים שִׁבְעָה אֶלָּא הוֹרָאַת שָׁעָה הָיְתָה ירושלמי הוריות א:ח:
12 כִּי בְיַד ה׳ הַמִּצְוָה בְּיַד נְבִיאָיו. לְשׁוֹרֵר הַלְוִיִּם בִּכְלֵי שִׁיר; לֹא כָתוּב בַּתּוֹרָה שֶׁיְּהֵא קָרְבָּן טָעוּן שִׁירָה, אֶלָּא מִצְוַת ה׳ שֶׁצִּוָּה בְּיַד נְבִיאָיו לְשׁוֹרֵר עַל הַקָּרְבָּן. וְרַבּוֹתֵינוּ פֵּרְשׁוּ בְּמַסֶּכֶת עֲרָכִין יא.: מִנַּיִן שֶׁהַלְוִיִּם טְעוּנִין לְשׁוֹרֵר בִּכְלֵי שִׁיר, דִּכְתִיב ״עֲבוֹדַת עֲבוֹדָה״ במדבר ד:מז – אֵיזוֹהִי עֲבוֹדָה שֶׁצְּרִיכָה עֲבוֹדָה אַחֶרֶת עִמָּהּ? הֱוֵי אוֹמֵר: זֶה הַשִּׁיר בִּכְלֵי שִׁיר. ״וַעֲבוֹדַת מַשָּׂא״ שם – נָכוֹן לְפָרֵשׁ עַל הַשִּׁיר, כְּדִכְתִיב ״וּכְנַנְיָהוּ שַׂר הַלְוִיִּם בְּמַשָּׂא… כִּי מֵבִין הוּא״ דברי הימים א טו:כב, שֶׁהָיָה מְמֻנֶּה לְהָרִים קוֹל הַנִּגּוּן שֶׁל שִׁיר:
13 וְהַכֹּהֲנִים בַּחֲצֹצְרוֹת. כְּכָתוּב ״וּבְנֵי אַהֲרֹן הַכֹּהֲנִים יִתְקְעוּ בַּחֲצוֹצְרוֹת״ במדבר י:ח:
14 לְהַלֵּל לַה׳ בְּדִבְרֵי דָוִד. זֶה ״הוֹדוּ לַה׳ קִרְאוּ בִשְׁמוֹ״ דברי הימים א טז:ח, כַּכָּתוּב לְמַעְלָה ״בַּיּוֹם הַהוּא אָז נָתַן דָּוִד בָּרֹאשׁ לְהוֹדוֹת וְגוֹ׳״ דברי הימים א טז:ז:
15 וַיָּבִיאוּ הַקָּהָל זְבָחִים וְתוֹדוֹת. דָּבָר הַמֻּתָּר לַבְּעָלִים בַּאֲכִילָה:
16 וְכָל נְדִיב לֵב עֹלוֹת. קְצָת מֵהֶם, מִי שֶׁהִתְנַדֵּב לִבּוֹ הֵבִיאוּ עֹלוֹת, וְלֹא כֻלָּם, לְפִי שֶׁאֵין לַבְּעָלִים הֶתֵּר אֲכִילָה בָּהֶם:
17 וְהַקֳּדָשִׁים. קָדָשִׁים קַלִּים: זְבָחִים וּשְׁלָמִים, מַה שֶּׁהַבְּעָלִים נֶהֱנִים בָּהֶם:
18 רַק הַכֹּהֲנִים הָיוּ לִמְעָט. כְּלוֹמַר: אוֹתָן שֶׁהִקְדִּישׁוּ הָיוּ עֲדַיִן לִמְעָט, וַיְּחַזְּקוּם אֲחֵיהֶם הַלְוִיִּם עַד כְּלוֹת הַמְּלָאכָה וְעַד יִתְקַדְּשׁוּ הַכֹּהֲנִים. וְאִם תֹּאמַר: הֵיאַךְ יִתְקַדְּשׁוּ הַלְוִיִּם וְלֹא יִתְקַדְּשׁוּ הַכֹּהֲנִים?! וּמְפָרֵשׁ, לְפִי כִּי הַלְוִיִּם יִשְׁרֵי לֵבָב לְהִתְקַדֵּשׁ מֵהַכֹּהֲנִים, וְיָשְׁרוּ לִבָּם הַלְוִיִּם לְהִתְקַדֵּשׁ יוֹתֵר מֵהַכֹּהֲנִים. וְהָיוּ הַכֹּהֲנִים וְהַלְוִיִּם וְכָל יִרְאֵי הַשֵּׁם מִתְחַפְּשִׂים וּמִתְנַכְּרִים וְאַף מִסְתַּתְּרִים כָּל יְמֵי הַמְּלָכִים הָרְשָׁעִים, וּכְשֶׁבָּא חִזְקִיָּהוּ שֶׁהָיָה צַדִּיק לֹא הָיוּ יְכוֹלִים מִיָּד לְהִתְקַדֵּשׁ וּלְטַהֵר, שֶׁזֶּה בַּשָּׁנָה רִאשׁוֹנָה הָיָה לְמָלְכוֹ, וְהָיוּ בָּאִים וּמִתְקַדְּשִׁים עַל יָד; כְּדִכְתִיב ״בַּעֲלֹץ צַדִּיקִים רַבָּה תִפְאָרֶת וּבְקוּם רְשָׁעִים יְחֻפַּשׂ אָדָם״ משלי כח:יב, וּכְתִיב ״בְּקוּם רְשָׁעִים יִסָּתֵר אָדָם וּבְאָבְדָם יִרְבּוּ צַדִּיקִים״ משלי כח:כח – כְּלוֹמַר: בְּקוּם רָשָׁע, אָחָז, יִסָּתֵר אָדָם, וּבְאָבְדָם יִרְבּוּ צַדִּיקִים, חִזְקִיָּה וְסִיעָתוֹ:
19 עַל הַהֵכִין הָאֱלֹהִים לָעָם. לְעָבְדוֹ וְלַעֲשׂוֹת רְצוֹנוֹ, דּוּגְמָא דִּלְמַטָּה: ״כָּל לְבָבוֹ הֵכִין לִדְרוֹשׁ וְגוֹ׳״ דברי הימים ב ל:יט. וְגַם שָׂמְחוּ, כִּי בְּפִתְאֹם הָיָה הַדָּבָר עֲלֵיהֶם בְּשָׁנָה רִאשׁוֹנָה לְמָלְכוֹ, לָשׁוּב אֶל ה׳, וְשָׁבוּ מִיָּד: