מקור דברי הימים ב כ״ז
1 בֶּן־עֶשְׂרִ֨ים וְחָמֵ֤שׁ שָׁנָה֙ יוֹתָ֣ם בְּמׇלְכ֔וֹ וְשֵׁשׁ־עֶשְׂרֵ֣ה שָׁנָ֔ה מָלַ֖ךְ בִּירוּשָׁלָ֑͏ִם וְשֵׁ֣ם אִמּ֔וֹ יְרוּשָׁ֖ה בַּת־צָדֽוֹק׃
2 וַיַּ֨עַשׂ הַיָּשָׁ֜ר בְּעֵינֵ֣י יְהֹוָ֗ה כְּכֹ֤ל אֲשֶׁר־עָשָׂה֙ עֻזִּיָּ֣הוּ אָבִ֔יו רַ֕ק לֹא־בָ֖א אֶל־הֵיכַ֣ל יְהֹוָ֑ה וְע֥וֹד הָעָ֖ם מַשְׁחִיתִֽים׃
3 ה֗וּא בָּנָ֛ה אֶת־שַׁ֥עַר בֵּית־יְהֹוָ֖ה הָעֶלְי֑וֹן וּבְחוֹמַ֥ת הָעֹ֛פֶל בָּנָ֖ה לָרֹֽב׃
4 וְעָרִ֥ים בָּנָ֖ה בְּהַר־יְהוּדָ֑ה וּבֶחֳרָשִׁ֣ים בָּנָ֔ה בִּירָנִיּ֖וֹת וּמִגְדָּלִֽים׃
5 וְ֠ה֠וּא נִלְחַ֞ם עִם־מֶ֣לֶךְ בְּנֵֽי־עַמּוֹן֮ וַיֶּחֱזַ֣ק עֲלֵיהֶם֒ וַיִּתְּנוּ־ל֨וֹ בְנֵי־עַמּ֜וֹן בַּשָּׁנָ֣ה הַהִ֗יא מֵאָה֙ כִּכַּר־כֶּ֔סֶף וַעֲשֶׂ֨רֶת אֲלָפִ֤ים כֹּרִים֙ חִטִּ֔ים וּשְׂעוֹרִ֖ים עֲשֶׂ֣רֶת אֲלָפִ֑ים זֹ֗את הֵשִׁ֤יבוּ לוֹ֙ בְּנֵ֣י עַמּ֔וֹן וּבַשָּׁנָ֥ה הַשֵּׁנִ֖ית וְהַשְּׁלִשִֽׁית׃
6 וַיִּתְחַזֵּ֖ק יוֹתָ֑ם כִּ֚י הֵכִ֣ין דְּרָכָ֔יו לִפְנֵ֖י יְהֹוָ֥ה אֱלֹהָֽיו׃
7 וְיֶ֙תֶר֙ דִּבְרֵ֣י יוֹתָ֔ם וְכׇל־מִלְחֲמֹתָ֖יו וּדְרָכָ֑יו הִנָּ֣ם כְּתוּבִ֔ים עַל־סֵ֥פֶר מַלְכֵֽי־יִשְׂרָאֵ֖ל וִיהוּדָֽה׃
8 בֶּן־עֶשְׂרִ֧ים וְחָמֵ֛שׁ שָׁנָ֖ה הָיָ֣ה בְמׇלְכ֑וֹ וְשֵׁשׁ־עֶשְׂרֵ֣ה שָׁנָ֔ה מָלַ֖ךְ בִּירוּשָׁלָֽ͏ִם׃
9 וַיִּשְׁכַּ֤ב יוֹתָם֙ עִם־אֲבֹתָ֔יו וַיִּקְבְּר֥וּ אֹת֖וֹ בְּעִ֣יר דָּוִ֑יד וַיִּמְלֹ֛ךְ אָחָ֥ז בְּנ֖וֹ תַּחְתָּֽיו׃ פ
פירוש רש"י על דברי הימים ב כ״ז
1 כְּכֹל אֲשֶׁר עָשָׂה עֻזִּיָּהוּ אָבִיו. הַטּוֹבוֹת שֶׁעָשָׂה אָבִיו; וְזֶהוּ שֶׁאָמַר רַבִּי שִׁמְעוֹן בֶּן יוֹחַאי בְּמַסֶּכֶת סוּכָּה מה, ב: אִלְמָלֵא יִהְיֶה אַבְרָהָם אָבִינוּ מְקַבֵּל עָלָיו כָּל עֲוֹנוֹת הַדּוֹרוֹת עַד לוֹ, אֲנִי הָיִיתִי מְקַבֵּל עָלַי חֲטָאֵי הַדּוֹרוֹת מֵאַבְרָהָם עַד לִי, וְאִם הָיָה יוֹתָם בֶּן עֻזִּיָּהוּ עִמִּי, הָיִינוּ מְקַבְּלִין עָלֵינוּ מֵאַבְרָהָם וְעַד סוֹף הַדּוֹרוֹת. שֶׁבְּכָל הַמְּלָכִים שֶׁלְּפָנָיו וּלְאַחֲרָיו מָצִינוּ בָהֶם חֵטְא, חוּץ מִיּוֹתָם: דָּוִד – ״רַק בְּאוּרִיָּה הַחִתִּי״ מלכים א טו:ה; שְׁלֹמֹה – ״נָשָׁיו הִטּוּ לְבָבוֹ״ מלכים א יא:ד, וּרְחַבְעָם – ״עָזַב אֶת תּוֹרַת ה׳״ דברי הימים ב יב:א; אֲבִיָּה – וַיֵּלֶךְ בְּכָל חַטֹּאת אָבִיו מלכים א טו:ג; אָסָא – הוֹצִיא ״כֶּסֶף וְזָהָב מֵאוֹצְרוֹת בֵּית ה׳״ דברי הימים ב טז:ב, וְנָתַן הַנָּבִיא ״בֵּית הַמַּהְפֶּכֶת״ דברי הימים ב טז:י; יְהוֹשָׁפָט – נִתְחַבֵּר לָרָשָׁע דברי הימים ב כ:לה; יְהוֹרָם – הָרַג אֶחָיו דברי הימים ב כא:ד; אֲחַזְיָהוּ – ״אִמּוֹ יוֹעַצְתּוֹ לְהַרְשִׁיעַ״ דברי הימים ב כב:ג; יוֹאָשׁ – הָרַג זְכַרְיָה וְנַעֲשָׂה קָדֵשׁ דברי הימים ב כד; אֲמַצְיָה – הִשְׁתַּחֲוָה לִפְסִילֵי שֵׂעִיר דברי הימים ב כה:יד; עֻזִּיָּהוּ – נִכְנַס לַהֵיכָל לְהַקְטִיר דברי הימים ב כו:טז-יט; אָחָז – הָלַךְ בְּדַרְכֵי מֶלֶךְ יִשְׂרָאֵל וְגַם עָשָׂה מַצֵּבוֹת לַבְּעָלִים דברי הימים ב כח:ב; חִזְקִיָּה – ״גָּבַהּ לִבּוֹ וַיְהִי עָלָיו קֶצֶף״ דברי הימים ב לב:כה, וְעַל שְׁלֹשָׁה לֹא הוֹדוּ לוֹ משנה פסחים ד,ט; מְנַשֶּׁה – עָשָׂה ״הָרַע בְּעֵינֵי ה׳״ דברי הימים ב לג:ב; יֹאשִׁיָּהוּ – לֹא שָׁמַע דִּבְרֵי נְבוּאָה ״מִפִּי אֱלֹהִים״ דברי הימים ב לה:כב; צִדְקִיָּהוּ – עָשָׂה הָרַע בְּעֵינֵי ה׳ וְלֹא נִכְנַע מִפְּנֵי יִרְמְיָה דברי הימים ב לו:יב; אֲבָל יוֹתָם – לֹא נִמְצָא בּוֹ שׁוּם דֹּפִי כָּךְ אָמַר לִי רַבִּי אֶלְעָזָר בַּר מֹשֶׁה:
2 וְעוֹד הָעָם מַשְׁחִיתִים. כְּדִכְתִיב ״עוֹד הָעָם מְזַבְּחִים וּמְקַטְּרִים״ מלכים ב טו:לה:
3 וּבְחוֹמַת הָעֹפֶל. דֻּגְמָא ישעיהו לב:יד ״עֹפֶל וָבַחַן הָיָה״, בּוֹנֶה מְצוּדוֹת:
4 וּבֶחֳרָשִׁים בָּנָה בִּירָנִיּוֹת. לְשׁוֹן בִּירָה גְּדוֹלָה: