מקור דברי הימים ב כ״ה
1 בֶּן־עֶשְׂרִ֨ים וְחָמֵ֤שׁ שָׁנָה֙ מָלַ֣ךְ אֲמַצְיָ֔הוּ וְעֶשְׂרִ֤ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלָ֑͏ִם וְשֵׁ֣ם אִמּ֔וֹ יְהוֹעַדָּ֖ן מִירוּשָׁלָֽיִם׃
2 וַיַּ֥עַשׂ הַיָּשָׁ֖ר בְּעֵינֵ֣י יְהֹוָ֑ה רַ֕ק לֹ֖א בְּלֵבָ֥ב שָׁלֵֽם׃
3 וַיְהִ֕י כַּאֲשֶׁ֛ר חָזְקָ֥ה הַמַּמְלָכָ֖ה עָלָ֑יו וַֽיַּהֲרֹג֙ אֶת־עֲבָדָ֔יו הַמַּכִּ֖ים אֶת־הַמֶּ֥לֶךְ אָבִֽיו׃
4 וְאֶת־בְּנֵיהֶ֖ם לֹ֣א הֵמִ֑ית כִּ֣י כַכָּת֣וּב בַּתּוֹרָ֡ה בְּסֵ֣פֶר מֹשֶׁה֩ אֲשֶׁר־צִוָּ֨ה יְהֹוָ֜ה לֵאמֹ֗ר לֹא־יָמ֨וּתוּ אָב֤וֹת עַל־בָּנִים֙ וּבָנִים֙ לֹא־יָמ֣וּתוּ עַל־אָב֔וֹת כִּ֛י אִ֥ישׁ בְּחֶטְא֖וֹ יָמֽוּתוּ׃
5 וַיִּקְבֹּ֤ץ אֲמַצְיָ֙הוּ֙ אֶת־יְהוּדָ֔ה וַיַּעֲמִידֵ֣ם לְבֵית־אָב֗וֹת לְשָׂרֵ֤י הָאֲלָפִים֙ וּלְשָׂרֵ֣י הַמֵּא֔וֹת לְכׇל־יְהוּדָ֖ה וּבִנְיָמִ֑ן וַֽיִּפְקְדֵ֗ם לְמִבֶּ֨ן עֶשְׂרִ֤ים שָׁנָה֙ וָמַ֔עְלָה וַיִּמְצָאֵ֗ם שְׁלֹשׁ־מֵא֨וֹת אֶ֤לֶף בָּחוּר֙ יוֹצֵ֣א צָבָ֔א אֹחֵ֖ז רֹ֥מַח וְצִנָּֽה׃
6 וַיִּשְׂכֹּ֣ר מִיִּשְׂרָאֵ֗ל מֵ֥אָה אֶ֛לֶף גִּבּ֥וֹר חָ֖יִל בְּמֵאָ֥ה כִכַּר־כָּֽסֶף׃
7 וְאִ֣ישׁ הָאֱלֹהִ֗ים בָּ֤א אֵלָיו֙ לֵאמֹ֔ר הַמֶּ֕לֶךְ אַל־יָב֥וֹא עִמְּךָ֖ צְבָ֣א יִשְׂרָאֵ֑ל כִּ֣י אֵ֤ין יְהֹוָה֙ עִם־יִשְׂרָאֵ֔ל כֹּ֖ל בְּנֵ֥י אֶפְרָֽיִם׃
8 כִּ֚י אִם־בֹּ֣א אַתָּ֔ה עֲשֵׂ֖ה חֲזַ֣ק לַמִּלְחָמָ֑ה יַכְשִֽׁילְךָ֤ הָאֱלֹהִים֙ לִפְנֵ֣י אוֹיֵ֔ב כִּ֥י יֶשׁ־כֹּ֛חַ בֵּאלֹהִ֖ים לַעְז֥וֹר וּלְהַכְשִֽׁיל׃
9 וַיֹּ֤אמֶר אֲמַצְיָ֙הוּ֙ לְאִ֣ישׁ הָאֱלֹהִ֔ים וּמַֽה־לַּעֲשׂוֹת֙ לִמְאַ֣ת הַכִּכָּ֔ר אֲשֶׁ֥ר נָתַ֖תִּי לִגְד֣וּד יִשְׂרָאֵ֑ל וַיֹּ֙אמֶר֙ אִ֣ישׁ הָאֱלֹהִ֔ים יֵ֚שׁ לַֽיהֹוָ֔ה לָ֥תֶת לְךָ֖ הַרְבֵּ֥ה מִזֶּֽה׃
10 וַיַּבְדִּילֵ֣ם אֲמַצְיָ֗הוּ לְהַגְּדוּד֙ אֲשֶׁר־בָּ֤א אֵלָיו֙ מֵאֶפְרַ֔יִם לָלֶ֖כֶת לִמְקוֹמָ֑ם וַיִּ֨חַר אַפָּ֤ם מְאֹד֙ בִּֽיהוּדָ֔ה וַיָּשׁ֥וּבוּ לִמְקוֹמָ֖ם בׇּחֳרִי־אָֽף׃ ס
11 וַאֲמַצְיָ֙הוּ֙ הִתְחַזַּ֔ק וַיִּנְהַג֙ אֶת־עַמּ֔וֹ וַיֵּ֖לֶךְ גֵּ֣יא הַמֶּ֑לַח וַיַּ֥ךְ אֶת־בְּנֵֽי־שֵׂעִ֖יר עֲשֶׂ֥רֶת אֲלָפִֽים׃
12 וַעֲשֶׂ֨רֶת אֲלָפִ֜ים חַיִּ֗ים שָׁבוּ֙ בְּנֵ֣י יְהוּדָ֔ה וַיְבִיא֖וּם לְרֹ֣אשׁ הַסָּ֑לַע וַיַּשְׁלִיכ֥וּם מֵֽרֹאשׁ־הַסֶּ֖לַע וְכֻלָּ֥ם נִבְקָֽעוּ׃
13 וּבְנֵ֣י הַגְּד֗וּד אֲשֶׁ֨ר הֵשִׁ֤יב אֲמַצְיָ֙הוּ֙ מִלֶּ֤כֶת עִמּוֹ֙ לַמִּלְחָמָ֔ה וַֽיִּפְשְׁטוּ֙ בְּעָרֵ֣י יְהוּדָ֔ה מִשֹּׁמְר֖וֹן וְעַד־בֵּ֣ית חוֹר֑וֹן וַיַּכּ֤וּ מֵהֶם֙ שְׁלֹ֣שֶׁת אֲלָפִ֔ים וַיָּבֹ֖זּוּ בִּזָּ֥ה רַבָּֽה׃ פ
14 וַיְהִ֗י אַחֲרֵ֨י ב֤וֹא אֲמַצְיָ֙הוּ֙ מֵהַכּ֣וֹת אֶת־אֲדוֹמִ֔ים וַיָּבֵ֗א אֶת־אֱלֹהֵי֙ בְּנֵ֣י שֵׂעִ֔יר וַיַּעֲמִידֵ֥ם ל֖וֹ לֵאלֹהִ֑ים וְלִפְנֵיהֶ֥ם יִֽשְׁתַּחֲוֶ֖ה וְלָהֶ֥ם יְקַטֵּֽר׃
15 וַיִּֽחַר־אַ֥ף יְהֹוָ֖ה בַּאֲמַצְיָ֑הוּ וַיִּשְׁלַ֤ח אֵלָיו֙ נָבִ֔יא וַיֹּ֣אמֶר ל֗וֹ לָ֤מָּה דָרַ֙שְׁתָּ֙ אֶת־אֱלֹהֵ֣י הָעָ֔ם אֲשֶׁ֛ר לֹא־הִצִּ֥ילוּ אֶת־עַמָּ֖ם מִיָּדֶֽךָ׃
16 וַיְהִ֣י בְּדַבְּר֣וֹ אֵלָ֗יו וַיֹּ֤אמֶר לוֹ֙ הַלְיוֹעֵ֤ץ לַמֶּ֙לֶךְ֙ נְתַנּ֔וּךָ חֲדַל־לְךָ֖ לָ֣מָּה יַכּ֑וּךָ וַיֶּחְדַּ֣ל הַנָּבִ֗יא וַיֹּ֙אמֶר֙ יָדַ֗עְתִּי כִּֽי־יָעַ֤ץ אֱלֹהִים֙ לְהַשְׁחִיתֶ֔ךָ כִּֽי־עָשִׂ֣יתָ זֹּ֔את וְלֹ֥א שָׁמַ֖עְתָּ לַעֲצָתִֽי׃ פ
17 וַיִּוָּעַ֗ץ אֲמַצְיָ֙הוּ֙ מֶ֣לֶךְ יְהוּדָ֔ה וַ֠יִּשְׁלַ֠ח אֶל־יוֹאָ֨שׁ בֶּן־יְהוֹאָחָ֧ז בֶּן־יֵה֛וּא מֶ֥לֶךְ יִשְׂרָאֵ֖ל לֵאמֹ֑ר לך לְכָ֖ה נִתְרָאֶ֥ה פָנִֽים׃
18 וַיִּשְׁלַ֞ח יוֹאָ֣שׁ מֶֽלֶךְ־יִשְׂרָאֵ֗ל אֶל־אֲמַצְיָ֣הוּ מֶלֶךְ־יְהוּדָה֮ לֵאמֹר֒ הַח֜וֹחַ אֲשֶׁ֣ר בַּלְּבָנ֗וֹן שָׁ֠לַ֠ח אֶל־הָאֶ֜רֶז אֲשֶׁ֤ר בַּלְּבָנוֹן֙ לֵאמֹ֔ר תְּנָֽה־אֶת־בִּתְּךָ֥ לִבְנִ֖י לְאִשָּׁ֑ה וַֽתַּעֲבֹ֞ר חַיַּ֤ת הַשָּׂדֶה֙ אֲשֶׁ֣ר בַּלְּבָנ֔וֹן וַתִּרְמֹ֖ס אֶת־הַחֽוֹחַ׃
19 אָמַ֗רְתָּ הִנֵּ֤ה הִכִּ֙יתָ֙ אֶת־אֱד֔וֹם וּנְשָׂאֲךָ֥ לִבְּךָ֖ לְהַכְבִּ֑יד עַתָּה֙ שְׁבָ֣ה בְּבֵיתֶ֔ךָ לָ֤מָּה תִתְגָּרֶה֙ בְּרָעָ֔ה וְנָ֣פַלְתָּ֔ אַתָּ֖ה וִיהוּדָ֥ה עִמָּֽךְ׃
20 וְלֹא־שָׁמַ֣ע אֲמַצְיָ֔הוּ כִּ֤י מֵהָֽאֱלֹהִים֙ הִ֔יא לְמַ֖עַן תִּתָּ֣ם בְּיָ֑ד כִּ֣י דָֽרְשׁ֔וּ אֵ֖ת אֱלֹהֵ֥י אֱדֽוֹם׃
21 וַיַּ֨עַל יוֹאָ֤שׁ מֶֽלֶךְ־יִשְׂרָאֵל֙ וַיִּתְרָא֣וּ פָנִ֔ים ה֖וּא וַאֲמַצְיָ֣הוּ מֶלֶךְ־יְהוּדָ֑ה בְּבֵ֥ית שֶׁ֖מֶשׁ אֲשֶׁ֥ר לִיהוּדָֽה׃
22 וַיִּנָּ֥גֶף יְהוּדָ֖ה לִפְנֵ֣י יִשְׂרָאֵ֑ל וַיָּנֻ֖סוּ אִ֥ישׁ לְאֹהָלָֽיו׃
23 וְאֵת֩ אֲמַצְיָ֨הוּ מֶלֶךְ־יְהוּדָ֜ה בֶּן־יוֹאָ֣שׁ בֶּן־יְהוֹאָחָ֗ז תָּפַ֛שׂ יוֹאָ֥שׁ מֶלֶךְ־יִשְׂרָאֵ֖ל בְּבֵ֣ית שָׁ֑מֶשׁ וַיְבִיאֵ֙הוּ֙ יְר֣וּשָׁלַ֔͏ִם וַיִּפְרֹ֞ץ בְּחוֹמַ֣ת יְרוּשָׁלַ֗͏ִם מִשַּׁ֤עַר אֶפְרַ֙יִם֙ עַד־שַׁ֣עַר הַפּוֹנֶ֔ה אַרְבַּ֥ע מֵא֖וֹת אַמָּֽה׃
24 וְכׇֽל־הַזָּהָ֣ב וְהַכֶּ֡סֶף וְאֵ֣ת כׇּל־הַ֠כֵּלִ֠ים הַנִּמְצְאִ֨ים בְּבֵית־הָאֱלֹהִ֜ים עִם־עֹבֵ֣ד אֱד֗וֹם וְאֶת־אֽוֹצְרוֹת֙ בֵּ֣ית הַמֶּ֔לֶךְ וְאֵ֖ת בְּנֵ֣י הַתַּעֲרֻב֑וֹת וַיָּ֖שׇׁב שֹׁמְרֽוֹן׃ פ
25 וַיְחִ֨י אֲמַצְיָ֤הוּ בֶן־יוֹאָשׁ֙ מֶ֣לֶךְ יְהוּדָ֔ה אַחֲרֵ֣י מ֔וֹת יוֹאָ֥שׁ בֶּן־יְהוֹאָחָ֖ז מֶ֣לֶךְ יִשְׂרָאֵ֑ל חֲמֵ֥שׁ עֶשְׂרֵ֖ה שָׁנָֽה׃
26 וְיֶ֙תֶר֙ דִּבְרֵ֣י אֲמַצְיָ֔הוּ הָרִאשֹׁנִ֖ים וְהָאַחֲרוֹנִ֑ים הֲלֹא֙ הִנָּ֣ם כְּתוּבִ֔ים עַל־סֵ֥פֶר מַלְכֵֽי־יְהוּדָ֖ה וְיִשְׂרָאֵֽל׃
27 וּמֵעֵ֗ת אֲשֶׁר־סָ֤ר אֲמַצְיָ֙הוּ֙ מֵאַחֲרֵ֣י יְהֹוָ֔ה וַיִּקְשְׁר֨וּ עָלָ֥יו קֶ֛שֶׁר בִּירוּשָׁלַ֖͏ִם וַיָּ֣נׇס לָכִ֑ישָׁה וַיִּשְׁלְח֤וּ אַחֲרָיו֙ לָכִ֔ישָׁה וַיְמִיתֻ֖הוּ שָֽׁם׃
28 וַיִּשָּׂאֻ֖הוּ עַל־הַסּוּסִ֑ים וַֽיִּקְבְּר֥וּ אֹת֛וֹ עִם־אֲבֹתָ֖יו בְּעִ֥יר יְהוּדָֽה׃
פירוש רש"י על דברי הימים ב כ״ה
1 כִּי אֵין ה׳ עִם יִשְׂרָאֵל כֹּל בְּנֵי אֶפְרָיִם. לְפִי שֶׁיָּרָבְעָם מִשֵּׁבֶט אֶפְרַיִם, וְהוּא הָיָה הָרִאשׁוֹן שֶׁהֶחֱטִיא אֶת יִשְׂרָאֵל, וּבְכָל דּוֹר וָדוֹר אַחֲרָיו הָיָה לָהֶם לְמוֹקֵשׁ, שֶׁהָיוּ עוֹבְדִין לְעֶגְלֵי זָהָב שֶׁל יָרָבְעָם דברי הימים ב יג:ח:
2 כִּי אִם בֹּא אַתָּה. פִּתְרוֹן: אִם לֹא תַאֲמִין בִּדְבָרַי, הֲלֹא תְנַסֶּה; בֹּא אַתָּה וַעֲשֵׂה וַחֲזַק לַמִּלְחָמָה:
3 לַעְזֹר וּלְהַכְשִׁיל. פִּתְרוֹן: יֶשׁ לוֹ כֹּחַ וּגְבוּרָה לַעְזֹר לְךָ בְּלֹא חַיִל שֶׁל אֶפְרַיִם, וּלְהַכְשִׁיל אוֹתְךָ אִם תּוֹלִיכֵם עִמְּךָ:
4 וְכֻלָּם נִבְקָעוּ. וַיְהִי אַחֲרֵי בֹא וְגוֹ׳. בְּאֵיכָה רַבָּתִי איכה רבה פתיחתא יד עָלָיו נֶאֱמַר ״וְרָגַז וְשָׂחַק וְאֵין נָחַת״ משלי כט:ט:
5 וַיִּפְשְׁטוּ בְּעָרֵי יְהוּדָה מִשֹּׁמְרוֹן וְעַד בֵּית חוֹרוֹן. לְאַחַר שֶׁחָזְרוּ לִמְקוֹמָם, כְּדִלְעֵיל וַיִּחַר אַפָּם מְאֹד בִּיהוּדָה וַיָּשׁוּבוּ לִמְקוֹמָם; שֶׁאִם לֹא כֵן, אֶלָּא מִיָּד שֶׁנִּבְדְּלוּ מֵאֲמַצְיָה פָּשְׁטוּ בְּעָרֵי יְהוּדָה, הָיָה לוֹ לוֹמַר: וַיִּפְשְׁטוּ בְּעָרֵי יְהוּדָה מִבֵּית חוֹרוֹן עַד שׁוֹמְרוֹן:
6 כִּי יָעַץ אֱלֹהִים לְהַשְׁחִיתֶךָ. כְּלוֹמַר: אִם אֵין אַתָּה שׁוֹמֵעַ לַעֲצָתִי לֵילֵךְ בְּדֶרֶךְ יְשָׁרָה, דַּע לְךָ, אַתָּה הַמֶּלֶךְ, כִּי יָעַץ ה׳ לְהַשְׁחִיתֶךָ, הוֹאִיל כִּי עָשִׂיתָ זֹּאת וְלֹא שָׁמַעְתָּ לַעֲצָתִי. וּמַה הִיא הָעֵצָה? שֶׁהִשִּׂיאֲךָ לְהִתְגָּרוֹת בְּמֶלֶךְ יִשְׂרָאֵל וְלִיפּוֹל לְפָנָיו, כְּדִכְתִיב וַיִּוָּעֵץ אֲמַצְיָה מֶלֶךְ יְהוּדָה וַיִּשְׁלַח אֶל יוֹאָשׁ וְגוֹ׳:
7 לְךָ נִתְרָאֶה פָנִים. לְהַרְאוֹת גְּבוּרָתֵינוּ עַל סוּסִים בָּרְמָחִים:
8 הַחוֹחַ אֲשֶׁר בַּלְּבָנוֹן. שֶׁהוּא שְׁפַל רוּחַ:
9 שָׁלַח אֶל הָאֶרֶז. שֶׁהוּא שַׂר גָּדוֹל מִכָּל הָאִילָנוֹת:
10 וַתַּעֲבֹר וַתִּרְמוֹס. וְלֹא רָצָה הָאֶרֶז לְהָרְגוֹ, כִּי זִילוּת הוּא בְּעֵינָיו לִטְרֹף הַחוֹחַ, אֶלָּא עָבְרָה עָלָיו וּרְמָסַתּוֹ לְבִזָּיוֹן, כִּי הֵיאַךְ נְשָׂאוֹ לִבּוֹ לִשְׁלֹחַ בִּזָּיוֹן גָּדוֹל כָּזֶה לְאֶרֶז גָּבוֹהַּ; אַף אַתָּה כְּחוֹחַ, שֶׁאֵין לְךָ רַק שְׁנֵי שְׁבָטִים, וְעַתָּה עֲבָדַי יְקוּמוּן עָלֶיךָ וְיִרְמְסוּךָ כְּשֶׁיִּשְׁמְעוּ הַבִּזָּיוֹן הַזֶּה:
11 וּנְשָׂאֲךָ לִבְּךָ. לִרְדֹּף אַחַר הַכָּבוֹד, וְרוֹצֶה אַתָּה לְהִתְכַּבֵּד אַף בִּי; וּבִמְלָכִים: ״הִכָּבֵד וְשֵׁב בְּבֵיתֶךָ״ מלכים ב יד:י:
12 כִּי מֵהָאֱלֹהִים הִיא לְמַעַן תִּתָּם בְּיָד. כְּלוֹמַר: בִּידֵיהֶם; כְּדִלְעֵיל יָדַעְתִּי כִּי יָעַץ אֱלֹהִים לְהַשְׁחִיתֶךָ:
13 בְּבֵית שֶׁמֶשׁ. הָיְתָה הַמִּלְחָמָה, וְהֻצְרַךְ לוֹמַר, שֶׁלֹּא תֹאמַר: כְּשֶׁתְּפָשׂוּ אֲמַצְיָה, לָמָּה הֱבִיאוֹ לִירוּשָׁלַיִם וְלֹא לְשׁוֹמְרוֹן? לְפִי שֶׁהָיָה בֵּית שֶׁמֶשׁ סָמוּךְ לִירוּשָׁלַיִם:
14 וַיִּפְרֹץ בְּחוֹמַת. שֶׁאָמַר: מֵעַתָּה לֹא יִמְרֹד בִּי, כִּי לֹא גָבַהּ לִבּוֹ דברי הימים ב כו:טז כָּל כָּךְ לִמְרֹד, הוֹאִיל וְנִפְרְצָה הַחוֹמָה:
15 הַנִּמְצְאִים בְּבֵית הָאֱלֹהִים עִם עֹבֵד אֱדוֹם. כִּי הוּא וּבָנָיו נְגִידִים עַל הָאוֹצָרוֹת כָּל יְמֵיהֶם, כְּדִלְעֵיל דברי הימים א כו:טו:
16 וְאֶת בְּנֵי הַתַּעֲרֻבוֹת. שֶׁלֹּא הִנִּיחוּ יִשְׂרָאֵל אֶת אֲמַצְיָהוּ לִהְיוֹת עוֹד מֶלֶךְ בִּירוּשָׁלַיִם, עַד שֶׁנָּתַן בְּנֵי הַשָּׂרִים עֵרָבוֹן שֶׁלֹּא יִמְרְדוּ עוֹד בּוֹ; וְכֵן תִּרְגֵּם יוֹנָתָן אוֹתוֹ בִּמְלָכִים מלכים ב יד:יד: ״בְּנֵי רַבְרְבַיָּא״. וְרַבֵּינוּ יוֹסֵף פֵּרֵשׁ תַּעֲרֻבוֹת – אוֹתָן הַתַּעֲרֻבוֹת שֶׁהָיָה לוֹ לַמֶּלֶךְ נְתוּנִים בְּעֵרָבוּת שֶׁלֹּא יִמְרְדוּ אֲבוֹתָם בּוֹ. וְלֹא נִרְאֶה לִי, כִּי לֹא מָצִינוּ שֶׁגָּבְרָה יַד יְהוּדָה כָּל כָּךְ עַל אֲחֵרִים שֶׁיְּהוּ צְרִיכִים לִיתֵּן לִיהוּדָה בְּנֵיהֶם לְעֵרָבוֹן:
17 וּמֵעֵת אֲשֶׁר סָר אֲמַצְיָהוּ מֵאַחֲרֵי ה׳. וְנָפַל לִפְנֵי מֶלֶךְ יִשְׂרָאֵל מִיָּד וַיִּקְשְׁרוּ עָלָיו קֶשֶׁר בִּירוּשָׁלִַם לְהָרְגוֹ, כִּי הָיָה לִבָּם דָּוֶה אִישׁ עַל בְּנוֹ וְעַל אָחִיו וְעַל קְרוֹבוֹ שֶׁנֶּהֶרְגוּ עַל יָדוֹ, לְפִי שֶׁנִּתְגָּרָה בְּמֶלֶךְ יִשְׂרָאֵל:
18 וַיָּנָס לָכִישָׁה. עִיר מִבְצָר אֲשֶׁר נִלְחַם עָלֶיהָ סַנְחֵרִיב מלכים ב יח:יד, וְנָס לָכִישָׁה וַיְהִי שָׁם ט״ו שָׁנִים, עַד שֶׁשָּׁלְחוּ אַחֲרָיו לָכִישָׁה וַיְמִיתֻהוּ שָׁם. וְאוֹתָן חֲמֵשׁ עֶשְׂרֵה שָׁנָה שֶׁהָיָה בְלָכִישׁ מָלְכָה יְכָלְיָהוּ אֵם עֻזִּיָּהוּ תַּחְתָּיו. אַךְ קָשֶׁה לִי; וּבְפֵירוּשׁ ר׳ יוֹסֵף זַצַ״ל מלכים ב יד:יז-כב רָאִיתִי: גַּם אוֹתָן חֲמֵשׁ עֶשְׂרֵה שָׁנִים שֶׁהָיָה בְלָכִישׁ מָלַךְ עֻזִּיָּהוּ בְּנוֹ תַּחְתָּיו – וְלֹא נָכוֹן לְפוֹתְרוֹ כֵּן, שֶׁהֲרֵי כְּתִיב בְּסָמוּךְ: ״וְהוּא בֶּן שֵׁשׁ עֶשְׂרֵה שָׁנָה״ דברי הימים ב כו:ג – נִמְצָא שֶׁלֹּא הָיָה בִּזְמַן שֶׁבָּרַח אָבִיו אֶלָּא בֶּן שָׁנָה; וְעוֹד, שֶׁאִם כֵּן, הָיָה לוֹ לוֹמַר: וַיִּקְחוּ אֶת עֻזִּיָּהוּ וַיַּמְלִיכוּ תַּחַת אָבִיו בְּחַיָּיו; אֶלָּא מַשְׁמַע שֶׁלֹּא מָלַךְ בְּחַיֵּי אָבִיו: