מקור דברי הימים א כ״ח
1 וַיַּקְהֵ֣ל דָּוִ֣יד אֶת־כׇּל־שָׂרֵ֣י יִשְׂרָאֵ֡ל שָׂרֵ֣י הַשְּׁבָטִ֣ים וְשָׂרֵ֣י הַמַּחְלְק֣וֹת הַמְשָׁרְתִ֪ים אֶת־הַמֶּ֟לֶךְ וְשָׂרֵ֣י הָאֲלָפִ֣ים וְשָׂרֵ֣י הַמֵּא֡וֹת וְשָׂרֵ֣י כׇל־רְכוּשׁ־וּמִקְנֶה֩ לַמֶּ֨לֶךְ וּלְבָנָ֜יו עִם־הַסָּרִיסִ֧ים וְהַגִּבּוֹרִ֛ים וּֽלְכׇל־גִּבּ֥וֹר חָ֖יִל אֶל־יְרוּשָׁלָֽ͏ִם׃
2 וַיָּ֨קׇם דָּוִ֤יד הַמֶּ֙לֶךְ֙ עַל־רַגְלָ֔יו וַיֹּ֕אמֶר שְׁמָע֖וּנִי אַחַ֣י וְעַמִּ֑י אֲנִ֣י עִם־לְבָבִ֡י לִבְנוֹת֩ בֵּ֨ית מְנוּחָ֜ה לַאֲר֣וֹן בְּרִית־יְהֹוָ֗ה וְלַֽהֲדֹם֙ רַגְלֵ֣י אֱלֹהֵ֔ינוּ וַהֲכִינ֖וֹתִי לִבְנֽוֹת׃
3 וְהָֽאֱלֹהִים֙ אָ֣מַר לִ֔י לֹא־תִבְנֶ֥ה בַ֖יִת לִשְׁמִ֑י כִּ֣י אִ֧ישׁ מִלְחָמ֛וֹת אַ֖תָּה וְדָמִ֥ים שָׁפָֽכְתָּ׃
4 וַיִּבְחַ֡ר יְהֹוָ֣ה אֱלֹהֵי֩ יִשְׂרָאֵ֨ל בִּ֜י מִכֹּ֣ל בֵּית־אָבִ֗י לִהְי֨וֹת לְמֶ֤לֶךְ עַל־יִשְׂרָאֵל֙ לְעוֹלָ֔ם כִּ֤י בִֽיהוּדָה֙ בָּחַ֣ר לְנָגִ֔יד וּבְבֵ֥ית יְהוּדָ֖ה בֵּ֣ית אָבִ֑י וּבִבְנֵ֣י אָבִ֔י בִּ֣י רָצָ֔ה לְהַמְלִ֖יךְ עַל־כׇּל־יִשְׂרָאֵֽל׃
5 וּמִ֨כׇּל־בָּנַ֔י כִּ֚י רַבִּ֣ים בָּנִ֔ים נָ֥תַן לִ֖י יְהֹוָ֑ה וַיִּבְחַר֙ בִּשְׁלֹמֹ֣ה בְנִ֔י לָשֶׁ֗בֶת עַל־כִּסֵּ֛א מַלְכ֥וּת יְהֹוָ֖ה עַל־יִשְׂרָאֵֽל׃
6 וַיֹּ֣אמֶר לִ֔י שְׁלֹמֹ֣ה בִנְךָ֔ הוּא־יִבְנֶ֥ה בֵיתִ֖י וַחֲצֵרוֹתָ֑י כִּֽי־בָחַ֨רְתִּי ב֥וֹ לִי֙ לְבֵ֔ן וַאֲנִ֖י אֶהְיֶה־לּ֥וֹ לְאָֽב׃
7 וַהֲכִינוֹתִ֥י אֶת־מַלְכוּת֖וֹ עַד־לְעוֹלָ֑ם אִם־יֶחֱזַ֗ק לַעֲשׂ֛וֹת מִצְוֺתַ֥י וּמִשְׁפָּטַ֖י כַּיּ֥וֹם הַזֶּֽה׃
8 וְ֠עַתָּ֠ה לְעֵינֵ֨י כׇל־יִשְׂרָאֵ֤ל קְהַל־יְהֹוָה֙ וּבְאׇזְנֵ֣י אֱלֹהֵ֔ינוּ שִׁמְר֣וּ וְדִרְשׁ֔וּ כׇּל־מִצְוֺ֖ת יְהֹוָ֣ה אֱלֹהֵיכֶ֑ם לְמַ֤עַן תִּֽירְשׁוּ֙ אֶת־הָאָ֣רֶץ הַטּוֹבָ֔ה וְהִנְחַלְתֶּ֛ם לִבְנֵיכֶ֥ם אַחֲרֵיכֶ֖ם עַד־עוֹלָֽם׃
9 וְאַתָּ֣ה שְׁלֹמֹֽה־בְנִ֡י דַּע֩ אֶת־אֱלֹהֵ֨י אָבִ֜יךָ וְעׇבְדֵ֗הוּ בְּלֵ֤ב שָׁלֵם֙ וּבְנֶ֣פֶשׁ חֲפֵצָ֔ה כִּ֤י כׇל־לְבָבוֹת֙ דּוֹרֵ֣שׁ יְהֹוָ֔ה וְכׇל־יֵ֥צֶר מַחֲשָׁב֖וֹת מֵבִ֑ין אִֽם־תִּדְרְשֶׁ֙נּוּ֙ יִמָּ֣צֵא לָ֔ךְ וְאִם־תַּעַזְבֶ֖נּוּ יַזְנִיחֲךָ֥ לָעַֽד׃
10 רְאֵ֣ה עַתָּ֗ה כִּֽי־יְהֹוָ֛ה בָּ֧חַר בְּךָ֛ לִבְנֽוֹת־בַּ֥יִת לַמִּקְדָּ֖שׁ חֲזַ֥ק וַעֲשֵֽׂה׃ פ
11 וַיִּתֵּ֣ן דָּוִ֣יד לִשְׁלֹמֹ֣ה בְנ֡וֹ אֶת־תַּבְנִ֣ית הָאוּלָם֩ וְֽאֶת־בָּ֨תָּ֜יו וְגַנְזַכָּ֧יו וַעֲלִיֹּתָ֛יו וַחֲדָרָ֥יו הַפְּנִימִ֖ים וּבֵ֥ית הַכַּפֹּֽרֶת׃
12 וְתַבְנִ֗ית כֹּל֩ אֲשֶׁ֨ר הָיָ֤ה בָר֙וּחַ֙ עִמּ֔וֹ לְחַצְר֧וֹת בֵּית־יְהֹוָ֛ה וּלְכׇל־הַלְּשָׁכ֖וֹת סָבִ֑יב לְאֹֽצְרוֹת֙ בֵּ֣ית הָאֱלֹהִ֔ים וּלְאֹצְר֖וֹת הַקֳּדָשִֽׁים׃
13 וּֽלְמַחְלְקוֹת֙ הַכֹּהֲנִ֣ים וְהַלְוִיִּ֔ם וּֽלְכׇל־מְלֶ֖אכֶת עֲבוֹדַ֣ת בֵּית־יְהֹוָ֑ה וּֽלְכׇל־כְּלֵ֖י עֲבוֹדַ֥ת בֵּית־יְהֹוָֽה׃
14 לַזָּהָ֤ב בַּמִּשְׁקָל֙ לַזָּהָ֔ב לְכׇל־כְּלֵ֖י עֲבוֹדָ֣ה וַעֲבוֹדָ֑ה לְכֹ֨ל כְּלֵ֤י הַכֶּ֙סֶף֙ בְּמִשְׁקָ֔ל לְכׇל־כְּלֵ֖י עֲבוֹדָ֥ה וַעֲבוֹדָֽה׃
15 וּמִשְׁקָ֞ל לִמְנֹר֣וֹת הַזָּהָ֗ב וְנֵרֹֽתֵיהֶם֙ זָהָ֔ב בְּמִשְׁקַל־מְנוֹרָ֥ה וּמְנוֹרָ֖ה וְנֵרֹתֶ֑יהָ וְלִמְנֹר֨וֹת הַכֶּ֤סֶף בְּמִשְׁקָל֙ לִמְנוֹרָ֣ה וְנֵרֹתֶ֔יהָ כַּעֲבוֹדַ֖ת מְנוֹרָ֥ה וּמְנוֹרָֽה׃
16 וְאֶת־הַזָּהָ֥ב מִשְׁקָ֛ל לְשֻׁלְחֲנ֥וֹת הַֽמַּעֲרֶ֖כֶת לְשֻׁלְחַ֣ן וְשֻׁלְחָ֑ן וְכֶ֖סֶף לְשֻׁלְחֲנ֥וֹת הַכָּֽסֶף׃
17 וְהַמִּזְלָג֧וֹת וְהַמִּזְרָק֛וֹת וְהַקְּשָׂוֺ֖ת זָהָ֣ב טָה֑וֹר וְלִכְפוֹרֵ֨י הַזָּהָ֤ב בְּמִשְׁקָל֙ לִכְפ֣וֹר וּכְפ֔וֹר וְלִכְפוֹרֵ֥י הַכֶּ֛סֶף בְּמִשְׁקָ֖ל לִכְפ֥וֹר וּכְפֽוֹר׃
18 וּלְמִזְבַּ֧ח הַקְּטֹ֛רֶת זָהָ֥ב מְזֻקָּ֖ק בַּמִּשְׁקָ֑ל וּלְתַבְנִ֣ית הַמֶּרְכָּבָ֗ה הַכְּרוּבִ֤ים זָהָב֙ לְפֹ֣רְשִׂ֔ים וְסֹכְכִ֖ים עַל־אֲר֥וֹן בְּרִית־יְהֹוָֽה׃
19 הַכֹּ֥ל בִּכְתָ֛ב מִיַּ֥ד יְהֹוָ֖ה עָלַ֣י הִשְׂכִּ֑יל כֹּ֖ל מַלְאֲכ֥וֹת הַתַּבְנִֽית׃ פ
20 וַיֹּ֨אמֶר דָּוִ֜יד לִשְׁלֹמֹ֣ה בְנ֗וֹ חֲזַ֤ק וֶֽאֱמַץ֙ וַעֲשֵׂ֔ה אַל־תִּירָ֖א וְאַל־תֵּחָ֑ת כִּי֩ יְהֹוָ֨ה אֱלֹהִ֤ים אֱלֹהַי֙ עִמָּ֔ךְ לֹ֤א יַרְפְּךָ֙ וְלֹ֣א יַעַזְבֶ֔ךָּ עַד־לִכְל֕וֹת כׇּל־מְלֶ֖אכֶת עֲבוֹדַ֥ת בֵּית־יְהֹוָֽה׃
21 וְהִנֵּ֗ה מַחְלְקוֹת֙ הַכֹּהֲנִ֣ים וְהַלְוִיִּ֔ם לְכׇל־עֲבוֹדַ֖ת בֵּ֣ית הָֽאֱלֹהִ֑ים וְעִמְּךָ֨ בְכׇל־מְלָאכָ֜ה לְכׇל־נָדִ֤יב בַּֽחׇכְמָה֙ לְכׇל־עֲבוֹדָ֔ה וְהַשָּׂרִ֥ים וְכׇל־הָעָ֖ם לְכׇל־דְּבָרֶֽיךָ׃ ס
פירוש רש"י על דברי הימים א כ״ח
1 וַיַּקְהֵל דָּוִיד אֶת כָּל שָׂרֵי יִשְׂרָאֵל. אֵלּוּ הַשָּׂרִים שָׂרֵי שְׁבָטִים, כְּדִכְתִיב ״וְעַל שִׁבְטֵי יִשְׂרָאֵל לָרְאוּבֵנִי״ דה״א כז:טז:
2 וְשָׂרֵי הַמַּחְלְקוֹת. אֵלּוּ שְׁתֵּים עֶשְׂרֵה מַחְלְקוֹת שֶׁל מֶלֶךְ דברי הימים א כז:א, ״וּבְנֵי יִשְׂרָאֵל לְמִסְפָּרָם וְגוֹ׳״:
3 וְשָׂרֵי הָאֲלָפִים. כִּדְלְעֵיל דברי הימים א יג:א:
4 וְשָׂרֵי הַמֵּאוֹת. שׁוֹטְרֵיהֶם:
5 וְשָׂרֵי כָל רְכוּשׁ וּמִקְנֶה לַמֶּלֶךְ. אוֹתָן שֶׁמַּזְכִּיר לְעֵיל דברי הימים א כז:כה-לא, ״עַל אוֹצְרוֹת הַמֶּלֶךְ״ וְ״עַל הַכְּרָמִים״ וְ״עַל הַזֵּיתִים״ וְהַמִּקְנֶה – הַשָּׂרִים שֶׁהָיוּ עַל הַבָּקָר וְעַל הַגְּמַלִּים וְעַל הַצֹּאן; שֶׁכָּל מִין הַבְּהֵמָה קָרוּי מִקְנֶה, כְּדִכְתִיב ״גַּם מִקְנֵה בָּקָר וָצֹאן הַרְבֵּה הָיָה לִי״ דְּקֹהֶלֶת קהלת ב:ז:
6 כָל יִשְׂרָאֵל. כַּגֵּר כָּאֶזְרָח:
7 וּבְאָזְנֵי אֱלֹהֵינוּ. לִפְנֵי אֱלֹהֵינוּ; דּוּגְמָא: ״אַתֶּם נִצָּבִים הַיּוֹם כֻּלְּכֶם לִפְנֵי ה׳ אֱלֹהֵיכֶם״ דברים כט:ט, וְכֵן ״וַיַּעֲמֹד הַמֶּלֶךְ עַל הָעַמּוּד״ אֲשֶׁר ״לִפְנֵי ה׳״ מלכים ב כג:ג:
8 שִׁמְרוּ וְדִרְשׁוּ כָּל מִצְוֺת ה׳ אֱלֹהֵיכֶם. זֶה אָמַר לְכָל יִשְׂרָאֵל יַחַד, אֲבָל לִשְׁלֹמֹה אָמַר לִפְנֵי כָל יִשְׂרָאֵל: וְעָבְדֵהוּ:
9 בְּלֵב שָׁלֵם. בְּלֵבָב שָׁלֵם לֹא נֶאֱמַר, שֶׁיְּהֵא מַשְׁמַע: שְׁנֵי לְבָבוֹת, אֶלָּא בְּלֵב שָׁלֵם, שֶׁלֹּא יִהְיֶה לְךָ אֶלָּא לֵבָב אֶחָד לְאָבִינוּ שֶׁבַּשָּׁמַיִם; וְכֵן יָסַד הַפַּיָּט בקדושתא דמוסף של יום ראשון דראש השנה: ״שְׁנֵי לְבָבוֹת לְךָ כְּאֶחָד לְאֶחָד״. וְדֻגְמָתוֹ: ״וְהָיָה לְבַבְכֶם שָׁלֵם עִם ה׳ אֱלֹהֵינוּ״ מלכים א ח:סא – שְׁלֵמִים לֹא כְתִיב, אֶלָּא ״שָׁלֵם״, כָּל שְׁנֵי לְבוֹתָם יִהְיוּ לֵב אֶחָד שָׁלֵם. וְכֵן מְפֹרָשׁ בִּבְרֵאשִׁית רַבָּה בראשית רבה מח:א: ״וְסַעֲדוּ לִבְּכֶם אַחַר תַּעֲבֹרוּ״ בראשית יח:ה – מְלַמֵּד שֶׁאֵין לַמַּלְאָכִים אֶלָּא לֵב אֶחָד. וְגַם לֶעָתִיד לָבֹא יִהְיֶה כֵּן, כְּדִכְתִיב ״שִׁיתוּ לִבְּכֶם לְחֵילָה״ תהלים מח:יד:
10 כִּי כָל לְבָבוֹת דּוֹרֵשׁ ה׳. כָּאן נוֹפֵל לוֹמַר לְבָבוֹת: כָּל לְבָבוֹת דּוֹרֵשׁ ה׳, בֵּין טוֹב וּבֵין רַע:
11 וְכָל יֵצֶר מַחֲשָׁבוֹת מֵבִין. בִּבְרֵאשִׁית רַבָּה שָׁנִינוּ בראשית רבה ט:ג: קוֹדֶם שֶׁנּוֹצַר יְצִיר מֵבִין הַקָּדוֹשׁ בָּרוּךְ הוּא מַה שֶּׁאָדָם עָתִיד לַחְשׁוֹב:
12 אִם תִּדְרְשֶׁנּוּ יִמָּצֵא לָךְ. לְכָךְ אֲנִי אוֹמֵר וְדִרְשׁוּ כָּל מִצְוֹת ה׳:
13 יַזְנִיחֲךָ לָעַד. יַעַזְבְךָ אֵין כְּתִיב כָּאן, אֶלָּא יַזְנִיחֲךָ, שֶׁהוּא קָשֶׁה מִמֶּנּוּ; כְּמוֹ ״וְהֶאֶזְנִיחוּ״ ישעיה יט:ו; ״זָנַח ה׳ מִזְבְּחוֹ״ איכה ב:ז:
14 כִּי ה׳ בָּחַר בְּךָ לִבְנוֹת בַּיִת לַמִּקְדָּשׁ. לֹא לִבְנוֹת לוֹ לָדוּר בּוֹ, ״כִּי הַשָּׁמַיִם וּשְׁמֵי הַשָּׁמַיִם לֹא יְכַלְכְּלוּהוּ״ דברי הימים ב ב:ה, אֶלָּא לַמִּקְדָּשׁ – לְצֹרֶךְ הָאָרוֹן שֶׁנִּקְרָא מִקְדָּשׁ, דִּכְתִיב ״וְנָסְעוּ הַקְּהָתִים נֹשְׂאֵי הַמִּקְדָּשׁ״ במדבר י:כא, וְהוּא הָאָרוֹן. וְלֹא בָּחַר בְּךָ מִפְּנֵי שֶׁאַתָּה מְשֻׁבָּח מִשְּׁאָר אֲנָשִׁים, אֶלָּא לְמַעֲנוֹ וּלְמַעַן רַחֲמָיו, לְכָךְ חֲזַק וַעֲשֵׂה:
15 תַּבְנִית הָאוּלָם. אָרְכּוֹ וְרָחְבּוֹ וְגָבְהוֹ, כְּדִכְתִיב ״וְהָאוּלָם עַל פְּנֵי הֵיכַל הַבַּיִת וְגוֹ׳״ מלכים א ו:ג:
16 וְגַנְזַכָּיו. מָקוֹם שֶׁאוֹצְרוֹת הַקֳּדָשִׁים מוּנָחִים:
17 אֲשֶׁר הָיָה בָרוּחַ עִמּוֹ. כַּאֲשֶׁר הֶרְאָהוּ שְׁמוּאֵל הָרוֹאֶה, כְּדִכְתִיב לְקַמָּן ״הֵמָּה יִסַּד דָּוִיד וּשְׁמוּאֵל הָרֹאֶה״ דברי הימים א ט:כב. וְרַבּוֹתֵינוּ אָמְרוּ זבחים נד:: ״וַיִּשְׁאַל וַיֹּאמֶר אֵיפֹה שְׁמוּאֵל וְדָוִד וַיֹּאמֶר הִנֵּה בְנָיוֹת בָּרָמָה״ שמואל א יט:כב – עוֹסְקִין הָיוּ בְּבִנְיָנוֹ שֶׁל עוֹלָם, הוּא בֵּית הַמִּקְדָּשׁ, וְלָמַד לוֹ אוֹתָהּ שָׁעָה מַה שֶּׁאֵין תַּלְמִיד וָתִיק יָכוֹל לִלְמֹד בְּכַמָּה שָׁנִים מדרש שמואל כב:ד:
18 סָבִיב לְאוֹצְרוֹת בֵּית הָאֱלֹהִים וּלְאוֹצְרוֹת הַקֳּדָשִׁים. וְלֹא מְפָרֵשׁ אֵיזֶה מֵהַקֳּדָשִׁים ״אֲשֶׁר הִקְדִּישׁ דָּוִיד וְרָאשֵׁי הָאָבוֹת״ דברי הימים א כו:כו שֶׁבְּאוֹתוֹ פֶּרֶק הָיָה מְמֻנִּים עָלָיו עַד שֶׁיִּבְנוּ בֵּית הַמִּקְדָּשׁ, אֲבָל אוֹצָרוֹת אֵלּוּ תָּמִיד הָיוּ, כָּל עוֹד שֶׁהַבִּנְיָן קַיָּם:
19 וּלְמַחְלְקוֹת הַכֹּהֲנִים וְהַלְוִיִּם. שֶׁחָלַק לְעֶשְׂרִים וְאַרְבַּע מִשְׁמָרוֹת כִּדְלְעֵיל דברי הימים א כד:א-יט, כָּל זֶה מָסַר לוֹ:
20 וּלְכָל כְּלֵי עֲבוֹדַת בֵּית ה׳. מִשְׁקַל מָה וְכַמָּה כָּל כְּלִי וּכְלִי, כַּמְפֹרָשׁ:
21 לַזָּהָב בַּמִּשְׁקָל לַזָּהָב לְכָל כְּלֵי עֲבוֹדָה וַעֲבוֹדָה. וְכֵן לְכָל כְּלֵי הַכֶּסֶף בְּמִשְׁקָל:
22 וְנֵרֹתֵיהֶם זָהָב. מִשְׁקָל לְכָל נֵר וָנֵר:
23 בְּמִשְׁקַל מְנוֹרָה וּמְנוֹרָה. כִּי עֲשָׂרָה מְנוֹרוֹת עָשָׂה דברי הימים ב ד:ז:
24 כַּעֲבוֹדַת מְנוֹרָה וּמְנוֹרָה. וּמִשְׁקָל כְּלֵי עֲבוֹדַת מְנוֹרָה, מַלְקָחֶיהָ וּמַחְתּוֹתֶיהָ שמות כה:לח; וְגַם מִשְׁקָל:
25 שֻׁלְחֲנוֹת הַמַּעֲרֶכֶת. לַעֲרֹךְ עָלָיו לֶחֶם הַפָּנִים, לְמִשְׁקַל שֻׁלְחָן וְשֻׁלְחָן, כִּי עֲשָׂרָה שֻׁלְחָנוֹת שֶׁל זָהָב עָשָׂה בַּהֵיכָל דברי הימים ב ד:ח; וּמִשְׁקַל הַכֶּסֶף לַשֻּׁלְחֲנוֹת שֶׁבָּעֲזָרָה שֶׁמַּפְשִׁיטִין עֲלֵיהֶם הַקָּרְבָּנוֹת, וּמִשְׁקַל הַמִּזְלָגוֹת וְהַמִּזְרָקוֹת:
26 וְלִכְפוֹרֵי הַזָּהָב בְּמִשְׁקָל. כְּפוֹרֵי כְּלֵי שָׁרֵת, לְקַנֵּחַ בַּכֵּלִים הַדָּם מֵהֶם; וְדוּגְמָא: בְּפֶרֶק קַמָּא דְּבָבָא מְצִיעָא בבא מציעא כד.: הַהוּא גַּבְרָא דְּכָפַר יְדֵיהּ בִּגְלִימָא דְּחַבְרֵיהּ; וְכָל כַּפָּרָה – לְשׁוֹן קִנּוּחַ וְחִטּוּי הוּא:
27 זָהָב מְזֻקָּק. כְּמוֹ ״כֶּסֶף מְזֻקָּק״ דברי הימים א כט:ד:
28 וּלְתַבְנִית הַמֶּרְכָּבָה. הֵם הַכְּרוּבִים שֶׁהַשְּׁכִינָה רוֹכֶבֶת עֲלֵיהֶם:
29 לְפֹרְשִׂים. כְּלוֹמַר: הַמְפוֹרָשִׂים וְהַסּוֹכְכִים עַל הָאָרוֹן, כְּדַאֲמַר ״וְהָיוּ הַכְּרֻבִים פֹּרְשֵׂי כְנָפַיִם וְגוֹ׳״ שמות כה:כ:
30 הַכֹּל בִּכְתָב. פִּתְרוֹן: הַכֹּל בִּכְתָב סִדֵּר לוֹ, סְכוּם מִשְׁקָל וּמִשְׁקָל שֶׁל כָּל כְּלִי וּכְלִי, שְׁמוּאֵל הָרוֹאֶה שמואל א ט:ט:
31 כָּל מְלַאֲכוֹת הַתַּבְנִית. תַּבְנִית הַבַּיִת חֲכָמַנִי וְהִשְׂכִּילַנִי, כְּמוֹ תַּבְנִית אֹרֶךְ וְרֹחַב וְגֹבַהּ. וְהַכֹּל דָּרַשׁ שְׁמוּאֵל מִן הַתּוֹרָה בְּרוּחַ הַקֹּדֶשׁ, כְּמוֹ שֶׁשָּׁנִינוּ מידות ב:א: הַר הַבַּיִת הָיָה חֲמֵשׁ מֵאוֹת אַמָּה עַל חֲמֵשׁ מֵאוֹת אַמָּה; דָּרַשׁ: ״אֹרֶךְ הֶחָצֵר מֵאָה בָאַמָּה וְרֹחַב חֲמִשִּׁים בַּחֲמִשִּׁים״ שמות כז:יח – חֲמִשִּׁים פְּעָמִים חֲמִשִּׁים הֵם עֶשְׂרִים וַחֲמֵשׁ מֵאוֹת; נִרְאֶה לוֹמַר: חֲתָכָם לְחָמֵשׁ רְצוּעוֹת לִהְיוֹת חֲמֵשׁ מֵאוֹת עַל חֲמֵשׁ מֵאוֹת. וְהוּא מְיֻסָּד בְּסִלּוּק קְרוֹבְץ שֶׁל שַׁבָּת חֲנֻכָּה, הַמַּתְחִיל ״מְנַשֶּׁה אֶת אֶפְרַיִם וְאֶפְרַיִם אֶת מְנַשֶּׁה״. וְהַכֹּל דָּרַשׁ שְׁמוּאֵל בְּרוּחַ הַקֹּדֶשׁ וְלִמֵּד לְדָוִד כֵּן:
32 חֲזַק וֶאֱמַץ. כְּדֵי שֶׁתִּתְקַיֵּם מַלְכוּתְךָ כְּמוֹ שֶׁהִבְטִיחֲךָ הַקָּדוֹשׁ בָּרוּךְ הוּא: וַהֲכִינוֹתִי מַלְכוּתוֹ עַד עוֹלָם אִם יֶחֱזַק לַעֲשׂוֹת מִצְוֹתַי וְגוֹ׳:
33 וְהִנֵּה מַחְלְקוֹת הַכֹּהֲנִים וְהַלְוִיִּם לְכָל עֲבוֹדַת בֵּית הָאֱלֹהִים עִמְּךָ בְּכָל מְלָאכָה. כְּלוֹמַר: הַכֹּל עָרַכְתִּי וְסִדַּרְתִּי וְזִמַּנְתִּי לְךָ, מַחְלְקוֹת וּפוֹעֲלִים, וְאֵין לְךָ לְעַכֵּב כִּי אִם מִיָּד לִבְנוֹת הַבַּיִת:
34 וְהַשָּׂרִים. הַמְּמֻנִּים עַל הַפּוֹעֲלִים וְשׁוֹטְרֵיהֶם:
35 וְכָל הָעָם לְכָל דְּבָרֶיךָ. לַעֲשׂוֹת צִוּוּיֶיךָ: