מקור דברי הימים א כ״א
1 וַיַּעֲמֹ֥ד שָׂטָ֖ן עַל־יִשְׂרָאֵ֑ל וַיָּ֙סֶת֙ אֶת־דָּוִ֔יד לִמְנ֖וֹת אֶת־יִשְׂרָאֵֽל׃
2 וַיֹּ֨אמֶר דָּוִ֤יד אֶל־יוֹאָב֙ וְאֶל־שָׂרֵ֣י הָעָ֔ם לְכ֗וּ סִפְרוּ֙ אֶת־יִשְׂרָאֵ֔ל מִבְּאֵ֥ר שֶׁ֖בַע וְעַד־דָּ֑ן וְהָבִ֣יאוּ אֵלַ֔י וְאֵדְעָ֖ה אֶת־מִסְפָּרָֽם׃
3 וַיֹּ֣אמֶר יוֹאָ֗ב יוֹסֵף֩ יְהֹוָ֨ה עַל־עַמּ֤וֹ כָּהֵם֙ מֵאָ֣ה פְעָמִ֔ים הֲלֹא֙ אֲדֹנִ֣י הַמֶּ֔לֶךְ כֻּלָּ֥ם לַאדֹנִ֖י לַעֲבָדִ֑ים לָ֣מָּה יְבַקֵּ֥שׁ זֹאת֙ אֲדֹנִ֔י לָ֛מָּה יִֽהְיֶ֥ה לְאַשְׁמָ֖ה לְיִשְׂרָאֵֽל׃
4 וּדְבַר־הַמֶּ֖לֶךְ חָזַ֣ק עַל־יוֹאָ֑ב וַיֵּצֵ֣א יוֹאָ֗ב וַיִּתְהַלֵּךְ֙ בְּכׇל־יִשְׂרָאֵ֔ל וַיָּבֹ֖א יְרוּשָׁלָֽ͏ִם׃
5 וַיִּתֵּ֥ן יוֹאָ֛ב אֶת־מִסְפַּ֥ר מִפְקַד־הָעָ֖ם אֶל־דָּוִ֑יד וַיְהִ֣י כׇֽל־יִשְׂרָאֵ֡ל אֶ֣לֶף אֲלָפִים֩ וּמֵאָ֨ה אֶ֤לֶף אִישׁ֙ שֹׁ֣לֵֽף חֶ֔רֶב וִיהוּדָ֕ה אַרְבַּע֩ מֵא֨וֹת וְשִׁבְעִ֥ים אֶ֛לֶף אִ֖ישׁ שֹׁ֥לֵֽף־חָֽרֶב׃
6 וְלֵוִי֙ וּבִנְיָמִ֔ן לֹ֥א פָקַ֖ד בְּתוֹכָ֑ם כִּֽי־נִתְעַ֥ב דְּבַר־הַמֶּ֖לֶךְ אֶת־יוֹאָֽב׃
7 וַיֵּ֙רַע֙ בְּעֵינֵ֣י הָאֱלֹהִ֔ים עַל־הַדָּבָ֖ר הַזֶּ֑ה וַיַּ֖ךְ אֶת־יִשְׂרָאֵֽל׃ ס
8 וַיֹּ֤אמֶר דָּוִיד֙ אֶל־הָ֣אֱלֹהִ֔ים חָטָ֣אתִֽי מְאֹ֔ד אֲשֶׁ֥ר עָשִׂ֖יתִי אֶת־הַדָּבָ֣ר הַזֶּ֑ה וְעַתָּ֗ה הַֽעֲבֶר־נָא֙ אֶת־עֲו֣וֹן עַבְדְּךָ֔ כִּ֥י נִסְכַּ֖לְתִּי מְאֹֽד׃ פ
9 וַיְדַבֵּ֤ר יְהֹוָה֙ אֶל־גָּ֔ד חֹזֵ֥ה דָוִ֖יד לֵאמֹֽר׃
10 לֵךְ֩ וְדִבַּרְתָּ֨ אֶל־דָּוִ֜יד לֵאמֹ֗ר כֹּ֚ה אָמַ֣ר יְהֹוָ֔ה שָׁל֕וֹשׁ אֲנִ֖י נֹטֶ֣ה עָלֶ֑יךָ בְּחַר־לְךָ֛ אַחַ֥ת מֵהֵ֖נָּה וְאֶעֱשֶׂה־לָּֽךְ׃
11 וַיָּ֥בֹא גָ֖ד אֶל־דָּוִ֑יד וַיֹּ֥אמֶר ל֛וֹ כֹּה־אָמַ֥ר יְהֹוָ֖ה קַבֶּל־לָֽךְ׃
12 אִם־שָׁל֨וֹשׁ שָׁנִ֜ים רָעָ֗ב וְאִם־שְׁלֹשָׁ֨ה חֳדָשִׁ֜ים נִסְפֶּ֥ה מִפְּנֵֽי־צָרֶ֘יךָ֮ וְחֶ֣רֶב אוֹיְבֶ֣יךָ לְמַשֶּׂ֒גֶת֒ וְאִם־שְׁלֹ֣שֶׁת יָ֠מִ֠ים חֶ֣רֶב יְהֹוָ֤ה וְדֶ֙בֶר֙ בָּאָ֔רֶץ וּמַלְאַ֣ךְ יְהֹוָ֔ה מַשְׁחִ֖ית בְּכׇל־גְּב֣וּל יִשְׂרָאֵ֑ל וְעַתָּ֣ה רְאֵ֔ה מָה־אָשִׁ֥יב אֶת־שֹׁלְחִ֖י דָּבָֽר׃ ס
13 וַיֹּ֧אמֶר דָּוִ֛יד אֶל־גָּ֖ד צַר־לִ֣י מְאֹ֑ד אֶפְּלָה־נָּ֣א בְיַד־יְהֹוָ֗ה כִּֽי־רַבִּ֤ים רַחֲמָיו֙ מְאֹ֔ד וּבְיַד־אָדָ֖ם אַל־אֶפֹּֽל׃
14 וַיִּתֵּ֧ן יְהֹוָ֛ה דֶּ֖בֶר בְּיִשְׂרָאֵ֑ל וַיִּפֹּל֙ מִיִּשְׂרָאֵ֔ל שִׁבְעִ֥ים אֶ֖לֶף אִֽישׁ׃
15 וַיִּשְׁלַח֩ הָאֱלֹהִ֨ים מַלְאָ֥ךְ לִֽירוּשָׁלַ֘͏ִם֮ לְהַשְׁחִיתָהּ֒ וּכְהַשְׁחִ֗ית רָאָ֤ה יְהֹוָה֙ וַיִּנָּ֣חֶם עַל־הָרָעָ֔ה וַיֹּ֨אמֶר לַמַּלְאָ֤ךְ הַמַּשְׁחִית֙ רַ֔ב עַתָּ֖ה הֶ֣רֶף יָדֶ֑ךָ וּמַלְאַ֤ךְ יְהֹוָה֙ עֹמֵ֔ד עִם־גֹּ֖רֶן אׇרְנָ֥ן הַיְבוּסִֽי׃ ס
16 וַיִּשָּׂ֨א דָוִ֜יד אֶת־עֵינָ֗יו וַיַּ֞רְא אֶת־מַלְאַ֤ךְ יְהֹוָה֙ עֹמֵ֗ד בֵּ֤ין הָאָ֙רֶץ֙ וּבֵ֣ין הַשָּׁמַ֔יִם וְחַרְבּ֤וֹ שְׁלוּפָה֙ בְּיָד֔וֹ נְטוּיָ֖ה עַל־יְרוּשָׁלָ֑͏ִם וַיִּפֹּ֨ל דָּוִ֧יד וְהַזְּקֵנִ֛ים מְכֻסִּ֥ים בַּשַּׂקִּ֖ים עַל־פְּנֵיהֶֽם׃
17 וַיֹּ֣אמֶר דָּוִ֣יד אֶֽל־הָאֱלֹהִ֡ים הֲלֹא֩ אֲנִ֨י אָמַ֜רְתִּי לִמְנ֣וֹת בָּעָ֗ם וַאֲנִי־ה֤וּא אֲשֶׁר־חָטָ֙אתִי֙ וְהָרֵ֣עַ הֲרֵע֔וֹתִי וְאֵ֥לֶּה הַצֹּ֖אן מֶ֣ה עָשׂ֑וּ יְהֹוָ֣ה אֱלֹהַ֗י תְּהִ֨י נָ֤א יָֽדְךָ֙ בִּ֚י וּבְבֵ֣ית אָבִ֔י וּֽבְעַמְּךָ֖ לֹ֥א לְמַגֵּפָֽה׃ ס
18 וּמַלְאַ֧ךְ יְהֹוָ֛ה אָמַ֥ר אֶל־גָּ֖ד לֵאמֹ֣ר לְדָוִ֑יד כִּ֣י יַעֲלֶ֣ה דָוִ֗יד לְהָקִ֤ים מִזְבֵּ֙חַ֙ לַֽיהֹוָ֔ה בְּגֹ֖רֶן אׇרְנָ֥ן הַיְבֻסִֽי׃
19 וַיַּ֤עַל דָּוִיד֙ בִּדְבַר־גָּ֔ד אֲשֶׁ֥ר דִּבֶּ֖ר בְּשֵׁ֥ם יְהֹוָֽה׃
20 וַיָּ֣שׇׁב אׇרְנָ֗ן וַיַּרְא֙ אֶת־הַמַּלְאָ֔ךְ וְאַרְבַּ֧עַת בָּנָ֛יו עִמּ֖וֹ מִֽתְחַבְּאִ֑ים וְאׇרְנָ֖ן דָּ֥שׁ חִטִּֽים׃
21 וַיָּבֹ֥א דָוִ֖יד עַד־אׇרְנָ֑ן וַיַּבֵּ֤ט אׇרְנָן֙ וַיַּ֣רְא אֶת־דָּוִ֔יד וַיֵּצֵא֙ מִן־הַגֹּ֔רֶן וַיִּשְׁתַּ֧חוּ לְדָוִ֛יד אַפַּ֖יִם אָֽרְצָה׃
22 וַיֹּ֨אמֶר דָּוִ֜יד אֶל־אׇרְנָ֗ן תְּנָה־לִּי֙ מְק֣וֹם הַגֹּ֔רֶן וְאֶבְנֶה־בּ֥וֹ מִזְבֵּ֖חַ לַֽיהֹוָ֑ה בְּכֶ֤סֶף מָלֵא֙ תְּנֵ֣הוּ לִ֔י וְתֵעָצַ֥ר הַמַּגֵּפָ֖ה מֵעַ֥ל הָעָֽם׃
23 וַיֹּ֨אמֶר אׇרְנָ֤ן אֶל־דָּוִיד֙ קַֽח־לָ֔ךְ וְיַ֛עַשׂ אֲדֹנִ֥י הַמֶּ֖לֶךְ הַטּ֣וֹב בְּעֵינָ֑יו רְאֵה֩ נָתַ֨תִּי הַבָּקָ֜ר לָעֹל֗וֹת וְהַמּוֹרִגִּ֧ים לָעֵצִ֛ים וְהַחִטִּ֥ים לַמִּנְחָ֖ה הַכֹּ֥ל נָתָֽתִּי׃
24 וַיֹּ֨אמֶר הַמֶּ֤לֶךְ דָּוִיד֙ לְאׇרְנָ֔ן לֹ֕א כִּֽי־קָנֹ֥ה אֶקְנֶ֖ה בְּכֶ֣סֶף מָלֵ֑א כִּ֠י לֹא־אֶשָּׂ֤א אֲשֶׁר־לְךָ֙ לַיהֹוָ֔ה וְהַעֲל֥וֹת עוֹלָ֖ה חִנָּֽם׃
25 וַיִּתֵּ֥ן דָּוִ֛יד לְאׇרְנָ֖ן בַּמָּק֑וֹם שִׁקְלֵ֣י זָהָ֔ב מִשְׁקָ֖ל שֵׁ֥שׁ מֵאֽוֹת׃
26 וַיִּ֩בֶן֩ שָׁ֨ם דָּוִ֤יד מִזְבֵּ֙חַ֙ לַֽיהֹוָ֔ה וַיַּ֥עַל עֹל֖וֹת וּשְׁלָמִ֑ים וַיִּקְרָא֙ אֶל־יְהֹוָ֔ה וַֽיַּעֲנֵ֤הוּ בָאֵשׁ֙ מִן־הַשָּׁמַ֔יִם עַ֖ל מִזְבַּ֥ח הָעֹלָֽה׃ ס
27 וַיֹּ֤אמֶר יְהֹוָה֙ לַמַּלְאָ֔ךְ וַיָּ֥שֶׁב חַרְבּ֖וֹ אֶל־נְדָנָֽהּ׃
28 בָּעֵ֣ת הַהִ֔יא בִּרְא֤וֹת דָּוִיד֙ כִּֽי־עָנָ֣הוּ יְהֹוָ֔ה בְּגֹ֖רֶן אׇרְנָ֣ן הַיְבוּסִ֑י וַיִּזְבַּ֖ח שָֽׁם׃
29 וּמִשְׁכַּ֣ן יְ֠הֹוָ֠ה אֲשֶׁר־עָשָׂ֨ה מֹשֶׁ֧ה בַמִּדְבָּ֛ר וּמִזְבַּ֥ח הָעוֹלָ֖ה בָּעֵ֣ת הַהִ֑יא בַּבָּמָ֖ה בְּגִבְעֽוֹן׃
30 וְלֹא־יָכֹ֥ל דָּוִ֛יד לָלֶ֥כֶת לְפָנָ֖יו לִדְרֹ֣שׁ אֱלֹהִ֑ים כִּ֣י נִבְעַ֔ת מִפְּנֵ֕י חֶ֖רֶב מַלְאַ֥ךְ יְהֹוָֽה׃ ס
פירוש רש"י על דברי הימים א כ״א
1 וַיַּעֲמֹד שָׂטָן עַל יִשְׂרָאֵל. אַף עַל פִּי שֶׁפָּרָשָׁה זוֹ אֵינָהּ לִכְבוֹד דָּוִד נִכְתְּבָה כָּאן, מִשּׁוּם שֶׁנֶּאֱמַר בְּסוֹף הַפָּרָשָׁה שֶׁבָּנָה מִזְבֵּחַ וְעָנָהוּ ה׳ מִן הַשָּׁמַיִם דברי הימים א כא:כו, וְזֶה כְּבוֹד דָּוִד:
2 מִסְפַּר מִפְקַד הָעָם. דּוּגְמַת ״וְכָל פְּקֻדֵיכֶם לְכָל מִסְפַּרְכֶם״ במדבר יד:כט:
3 וַיְהִי כָל יִשְׂרָאֵל אֶלֶף אֲלָפִים וּמֵאָה אֶלֶף וִיהוּדָה אַרְבַּע מֵאוֹת וְשִׁבְעִים אֶלֶף. וּבִשְׁמוּאֵל שמואל ב כד:ט כְּתִיב ״שְׁמֹנָה מֵאוֹת אֶלֶף וְאִישׁ יְהוּדָה ה׳ מֵאוֹת אֶלֶף״, דְּמַשְׁמַע דְּלֹא הָיוּ מִיִּשְׂרָאֵל כָּל כָּךְ כַּאֲשֶׁר נֶאֱמַר כָּאן. אֶלָּא לְפִי שֶׁהַקֶּצֶף הָיָה מֵאֵת הַקָּדוֹשׁ בָּרוּךְ הוּא עַל דָּוִד, לֹא כָּתַב שָׁם מִסְפַּר כֻּלָּם שֶׁמָּנָה. וְאַף יוֹאָב לֹא מָנָה כָּל הַשְּׁבָטִים, כְּמוֹ שֶׁכָּתוּב כִּי נִתְעַב דְּבַר הַמֶּלֶךְ אֶת יוֹאָב. אֲבָל כָּאן, מִשּׁוּם כְּבוֹדוֹ שֶׁל דָּוִד מַזְכִּיר כָּאן מִסְפָּר וְחֶשְׁבּוֹן שֶׁמָּנָה, כִּי זֶהוּ כְּבוֹדוֹ, שֶׁחַיִל כָּבֵד כָּזֶה הָיָה בְּשִׁבְטוֹ. וְכֵן מוֹכִיחַ כְּמוֹ שֶׁפֵּרַשְׁתִּי, שֶׁאֲפִלּוּ אוֹתוֹ קְצָת מִיִּשְׂרָאֵל שֶׁמָּנָה, לֹא כָּתַב כָּל מִסְפָּרָם בִּשְׁמוּאֵל, אֲבָל כָּאן כָּתַב כָּל אוֹתוֹ מִסְפָּר שֶׁמָּנָה, דְּהָא כְּתִיב כָּאן וַיְהִי כָל יִשְׂרָאֵל, וּבִשְׁמוּאֵל לֹא כְּתִיב כָּל. וּבְפֵרוּשׁ מוֹכִיחַ כָּאן לְפָנֵינוּ, כְּדִכְתִיב ״יוֹאָב בֶּן צְרוּיָה הֵחֵל לִמְנוֹת וְלֹא כִלָּה וַיְהִי בָזֹאת קֶצֶף עַל יִשְׂרָאֵל וְלֹא עָלָה הַמִּסְפָּר בְּמִסְפַּר דִּבְרֵי הַיָּמִים לְמֶלֶךְ דָּוִד״ דברי הימים א כז:כד:
4 וְלֵוִי וּבִנְיָמִן לֹא פָקַד בְּתוֹכָם וְגוֹ׳. יוֹאָב הָיָה יוֹדֵעַ שֶׁיִּהְיֶה לְאַשְׁמָה לָעָם לְנֶגֶף, לְפִיכָךְ אָמַר יוֹאָב: יָכוֹל אֲנִי לְהַצִּיל שְׁבָטִים הַלָּלוּ מִן הַמִּנְיָן. לֵוִי, אִם יֹאמַר דָּוִד לָמָּה לֹא מָנִיתָ אֶת לֵוִי, אֲשִׁיבֶנּוּ כִּי ״לֹא הִתְפַּקְּדוּ בְּתוֹךְ בְּנֵי יִשְׂרָאֵל״ במדבר ב:לג, וְכֵן אוֹמַר לְבִנְיָמִין: הֲלֹא בְּפִילֶגֶשׁ בְּגִבְעָה נִגְּפוּ שופטים כ:לה, וְאִם יִתְנַגְּפוּ עַתָּה מַה יִשְׁתַּיֵּר לָהֶם?
5 וְעַתָּה הַעֲבֶר נָא אֶת עֲווֹן עַבְדְּךָ. עָוֹן זֶה מָלֵא בִּשְׁנֵי וָוִי״ן, כְּלוֹמַר: הַעֲבֶר נָא עַל הָעָוֹן הַמָּלֵא שֶׁעָשִׂיתִי. וְאַרְבָּעָע מְלֵאִים הֵן בִּקְרִיאָה, וְזֶה אֶחָד מֵהֶם; וְהַשֵּׁנִי בִּתְהִלִּים: ״הֵן בְּעָוֹון חוֹלָלְתִּי״ תהלים נא:ז, וְכִמְפֹרָשׁ בְּוַיִּקְרָא רַבָּה בְּאִשָּׁה כִּי תַזְרִיעַ ויקרא רבה יד: אֲפִילוּ חָסִיד שֶׁבַּחֲסִידִים אִי אֶפְשׁר שֶׁלֹּא יְהֵא לוֹ אֶחָד בַּעֲבֵירָה בְּלֹא נִתְכַּוֵּין אבא, וַהֲלֹא לֹא נִתְכַּוֵּין אֶלָּא לְצֹרֶךְ עַצְמוֹ; וְהַשְּׁלִישִׁי: ״עֲוֹנוֹתָיו יִלְכְּדֻנּוּ אֶת הָרָשָׁע״ משלי ה:כב – עֲוֹנוֹתָיו הַמְרֻבִּים; וְהָרְבִיעִי: ״וּמָצָאנוּ עָוֹן וְעַתָּה לְכוּ וְנָבוֹאָה וְנַגִּידָה בֵּית הַמֶּלֶךְ״ מלכים ב ז:ט – שֶׁאָמְרוּ: אִם לֹא נֵלֵךְ וְנַגִּיד אֶת בֵּית הַמֶּלֶךְ יִהְיֶה עָוֹן גָּדוֹל, כִּי יָבוֹאוּ עֲלֵיהֶם אוֹיְבִים:
6 צַר לִי מְאֹד. אַתָּה אוֹמֵר: בְּחַר לְךָ הַקַּל שֶׁבָּהֶם, קָשֶׁה לִי וְצַר לִי מְאֹד עָלָיו. מָשָׁל לְאָדָם שֶׁאָמְרוּ לוֹ: הִנְּךָ מֵת, וּבְאֵיזֶה קֶבֶר רְצוֹנְךָ שֶׁתִּקָּבֵר, אֵצֶל אָבִיךָ אוֹ אִמֶּךָ; אָמַר לָהֶם: אוֹי לָאָזְנַיִם שֶׁכָּךְ שׁוֹמְעוֹת:
7 אֶפְּלָה נָּא בְיַד ה׳. בְּדָבָר שֶׁשָּׁוֶה בַּכֹּל, עֲשִׁירִים וַעֲנִיִּים:
8 כִּי רַבִּים רַחֲמָיו. אוּלַי יְרַחֵם, אֲבָל אוֹיְבֵינוּ לֹא יְרַחֲמוּ עָלֵינוּ:
9 נְטוּיָה עַל יְרוּשָׁלִָם. וּמַה שֶּׁכָּתוּב ״וְהִנֵּה אִישׁ עוֹמֵד לְנֶגְדּוֹ וְחַרְבּוֹ שְׁלוּפָה בְּיָדוֹ וְגוֹ׳, הֲלָנוּ אַתָּה אִם לְצָרֵינוּ״ יהושע ה:יג, יְהוֹשֻׁעַ הָיָה עוֹמֵד וַאֲחוֹרָיו כְּנֶגֶד צָרָיו, וּבָא מַלְאָךְ כְּנֶגְדּוֹ, לְפִיכָךְ תָּמַהּ וְאָמַר לוֹ: ״הֲלָנוּ אַתָּה אִם לְצָרֵינוּ״ – לְעֶזְרֵנוּ, הוֹאִיל וְאַתָּה עוֹמֵד לְנֶגְדִּי, אוֹ לְצָרֵינוּ לַעֲזֹר, שֶׁגַּם אַתָּה עוֹמֵד כְּנֶגְדָּן; אֲבָל כָּאן, כֵּיוָן שֶׁרָאָה הַחֶרֶב שֶׁל מַלְאָךְ שֶׁהָיְתָה נְטוּיָה עַל יְרוּשָׁלִָם, יָדַע בְּעַצְמוֹ שֶׁבָּא לִנְגֹּף אֶת יִשְׂרָאֵל:
10 וְאֵלֶּה הַצֹּאן מֶה עָשׂוּ. שֶׁהֵם כְּאוֹתָן הַצֹּאן הַמּוּבָאִים לִשְׁחִיטָה, שֶׁאֵינָן יְכוֹלִין לְהִנָּצֵל מִשְּׁחִיטָה כִּי לִשְׁחִיטָה הֵן עוֹמְדִים:
11 מִתְחַבְּאִים. מִפְּנֵי הַמַּלְאָךְ, לְקַיֵּם הַפָּסוּק ״לֵךְ עַמִּי בֹּא בַחֲדָרֶיךָ וּסְגֹר דְּלָתְךָ בַּעֲדֶךָ חֲבִי כִמְעַט רֶגַע עַד יַעֲבֹר זָעַם״ ישעיה כו:כ, וְאוֹמֵר ״וְאַתֶּם לֹא תֵצְאוּ אִישׁ מִפֶּתַח בֵּיתוֹ עַד בֹּקֶר״ שמות יב:כב:
12 וְאָרְנָן דָּשׁ חִטִּים. לְפִי שֶׁאָמַר לְפָנֵינוּ וְהַחִטִּים לְמִנְחָה, שֶׁלֹּא תִּתְמַהּ: וְכִי הֵיאַךְ הָיוּ לְשָׁם חִטִּים?
13 וְהַמּוֹרִגִּים לָעֵצִים. נְסָרִים שֶׁדָּשִׁין בָּהֶם הַתְּבוּאָה, כְּמוֹ שֶׁשָּׁנִינוּ בַּעֲבוֹדָה זָרָה כד, ב: עֲזִיָּא דְּקִירְקְסָא דְּדַיְישָׁא דִּישְׁתָּא; דּוֹמֶה: ״לְמוֹרַג חָרוּץ חָדָשׁ״ ישעיה מא:טו:
14 שִׁקְלֵי זָהָב מִשְׁקָל שֵׁשׁ מֵאוֹת. וּבְסוֹף שְׁמוּאֵל כְּתִיב ״בְּכֶסֶף שְׁקָלִים חֲמִשִּׁים״ שמואל ב כד:כד! הָא כֵּיצַד? נָטַל מִכָּל שֵׁבֶט וְשֵׁבֶט חֲמִשִּׁים שְׁקָלִים, הֲרֵי שֵׁשׁ מֵאוֹת שְׁקָלִים כְּדֵי שֶׁיִּהְיֶה חֵלֶק לְכָל יִשְׂרָאֵל בַּמִּזְבֵּחַ:
15 וַיֹּאמֶר ה׳ לַמַּלְאָךְ. לְהָשִׁיב חַרְבּוֹ, וַיָּשֶׁב חַרְבּוֹ אֶל נְדָנָהּ; וְכֵן ״וַיֹּאמֶר ה׳ לַדָּג וַיָּקֵא אֶת יוֹנָה וְגוֹ׳״ יונה ב:יא:
16 בָּעֵת הַהִיא בִּרְאוֹת דָּוִיד כִּי עָנָהוּ ה׳. פָּרָשָׁה זוֹ לֹא נִכְתְּבָה בִּשְׁמוּאֵל שמואל ב כד, וּמִשּׁוּם כְּבוֹד דָּוִד נִכְתְּבָה כָּאן, שֶׁעָשָׂה מִזְבֵּחַ; וְכָל פְּסוּקֵי דְּפָרָשָׁה זוֹ דָּבוּק פָּסוּק אֶל פָּסוּק כְּאִלּוּ כֻּלּוֹ פָּסוּק אֶחָד:
17 וּמִזְבַּח הָעוֹלָה. שֶׁל מֹשֶׁה עֲדַיִן בָּעֵת הַהִיא בַּבָּמָה אֲשֶׁר בְּגִבְעוֹן:
18 וְלֹא יָכֹל דָּוִיד. אָז כְּשֶׁהָיָה אוֹתוֹ מַעֲשֶׂה שֶׁצִּוָּה לוֹ הַקָּדוֹשׁ בָּרוּךְ הוּא לְהַעֲלוֹת קָרְבָּן, לֹא הָיָה דָוִד יָכוֹל לָלֶכֶת לְפָנָיו לִדְרֹשׁ אֱלֹהִים; כְּלוֹמַר: לִפְנֵי הַמִּזְבֵּחַ אֲשֶׁר בְּגִבְעוֹן:
19 כִּי נִבְעַת מִפְּנֵי חֶרֶב מַלְאַךְ ה׳. וְהָלַךְ דָּוִד כְּדִבְרֵי ה׳, וּבָנָה מִזְבֵּחַ וְעָנָהוּ ה׳: