מקור בראשית מ״א
1 וַיְהִ֕י מִקֵּ֖ץ שְׁנָתַ֣יִם יָמִ֑ים וּפַרְעֹ֣ה חֹלֵ֔ם וְהִנֵּ֖ה עֹמֵ֥ד עַל־הַיְאֹֽר׃
2 וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת יְפ֥וֹת מַרְאֶ֖ה וּבְרִיאֹ֣ת בָּשָׂ֑ר וַתִּרְעֶ֖ינָה בָּאָֽחוּ׃
3 וְהִנֵּ֞ה שֶׁ֧בַע פָּר֣וֹת אֲחֵר֗וֹת עֹל֤וֹת אַחֲרֵיהֶן֙ מִן־הַיְאֹ֔ר רָע֥וֹת מַרְאֶ֖ה וְדַקּ֣וֹת בָּשָׂ֑ר וַֽתַּעֲמֹ֛דְנָה אֵ֥צֶל הַפָּר֖וֹת עַל־שְׂפַ֥ת הַיְאֹֽר׃
4 וַתֹּאכַ֣לְנָה הַפָּר֗וֹת רָע֤וֹת הַמַּרְאֶה֙ וְדַקֹּ֣ת הַבָּשָׂ֔ר אֵ֚ת שֶׁ֣בַע הַפָּר֔וֹת יְפֹ֥ת הַמַּרְאֶ֖ה וְהַבְּרִיאֹ֑ת וַיִּיקַ֖ץ פַּרְעֹֽה׃
5 וַיִּישָׁ֕ן וַֽיַּחֲלֹ֖ם שֵׁנִ֑ית וְהִנֵּ֣ה שֶׁ֣בַע שִׁבֳּלִ֗ים עֹל֛וֹת בְּקָנֶ֥ה אֶחָ֖ד בְּרִיא֥וֹת וְטֹבֽוֹת׃
6 וְהִנֵּה֙ שֶׁ֣בַע שִׁבֳּלִ֔ים דַּקּ֖וֹת וּשְׁדוּפֹ֣ת קָדִ֑ים צֹמְח֖וֹת אַחֲרֵיהֶֽן׃
7 וַתִּבְלַ֙עְנָה֙ הַשִּׁבֳּלִ֣ים הַדַּקּ֔וֹת אֵ֚ת שֶׁ֣בַע הַֽשִּׁבֳּלִ֔ים הַבְּרִיא֖וֹת וְהַמְּלֵא֑וֹת וַיִּיקַ֥ץ פַּרְעֹ֖ה וְהִנֵּ֥ה חֲלֽוֹם׃
8 וַיְהִ֤י בַבֹּ֙קֶר֙ וַתִּפָּ֣עֶם רוּח֔וֹ וַיִּשְׁלַ֗ח וַיִּקְרָ֛א אֶת־כׇּל־חַרְטֻמֵּ֥י מִצְרַ֖יִם וְאֶת־כׇּל־חֲכָמֶ֑יהָ וַיְסַפֵּ֨ר פַּרְעֹ֤ה לָהֶם֙ אֶת־חֲלֹמ֔וֹ וְאֵין־פּוֹתֵ֥ר אוֹתָ֖ם לְפַרְעֹֽה׃
9 וַיְדַבֵּר֙ שַׂ֣ר הַמַּשְׁקִ֔ים אֶת־פַּרְעֹ֖ה לֵאמֹ֑ר אֶת־חֲטָאַ֕י אֲנִ֖י מַזְכִּ֥יר הַיּֽוֹם׃
10 פַּרְעֹ֖ה קָצַ֣ף עַל־עֲבָדָ֑יו וַיִּתֵּ֨ן אֹתִ֜י בְּמִשְׁמַ֗ר בֵּ֚ית שַׂ֣ר הַטַּבָּחִ֔ים אֹתִ֕י וְאֵ֖ת שַׂ֥ר הָאֹפִֽים׃
11 וַנַּֽחַלְמָ֥ה חֲל֛וֹם בְּלַ֥יְלָה אֶחָ֖ד אֲנִ֣י וָה֑וּא אִ֛ישׁ כְּפִתְר֥וֹן חֲלֹמ֖וֹ חָלָֽמְנוּ׃
12 וְשָׁ֨ם אִתָּ֜נוּ נַ֣עַר עִבְרִ֗י עֶ֚בֶד לְשַׂ֣ר הַטַּבָּחִ֔ים וַ֨נְּסַפֶּר־ל֔וֹ וַיִּפְתׇּר־לָ֖נוּ אֶת־חֲלֹמֹתֵ֑ינוּ אִ֥ישׁ כַּחֲלֹמ֖וֹ פָּתָֽר׃
13 וַיְהִ֛י כַּאֲשֶׁ֥ר פָּֽתַר־לָ֖נוּ כֵּ֣ן הָיָ֑ה אֹתִ֛י הֵשִׁ֥יב עַל־כַּנִּ֖י וְאֹת֥וֹ תָלָֽה׃
14 וַיִּשְׁלַ֤ח פַּרְעֹה֙ וַיִּקְרָ֣א אֶת־יוֹסֵ֔ף וַיְרִיצֻ֖הוּ מִן־הַבּ֑וֹר וַיְגַלַּח֙ וַיְחַלֵּ֣ף שִׂמְלֹתָ֔יו וַיָּבֹ֖א אֶל־פַּרְעֹֽה׃
15 וַיֹּ֤אמֶר פַּרְעֹה֙ אֶל־יוֹסֵ֔ף חֲל֣וֹם חָלַ֔מְתִּי וּפֹתֵ֖ר אֵ֣ין אֹת֑וֹ וַאֲנִ֗י שָׁמַ֤עְתִּי עָלֶ֙יךָ֙ לֵאמֹ֔ר תִּשְׁמַ֥ע חֲל֖וֹם לִפְתֹּ֥ר אֹתֽוֹ׃
16 וַיַּ֨עַן יוֹסֵ֧ף אֶת־פַּרְעֹ֛ה לֵאמֹ֖ר בִּלְעָדָ֑י אֱלֹהִ֕ים יַעֲנֶ֖ה אֶת־שְׁל֥וֹם פַּרְעֹֽה׃
17 וַיְדַבֵּ֥ר פַּרְעֹ֖ה אֶל־יוֹסֵ֑ף בַּחֲלֹמִ֕י הִנְנִ֥י עֹמֵ֖ד עַל־שְׂפַ֥ת הַיְאֹֽר׃
18 וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת בְּרִיא֥וֹת בָּשָׂ֖ר וִיפֹ֣ת תֹּ֑אַר וַתִּרְעֶ֖ינָה בָּאָֽחוּ׃
19 וְהִנֵּ֞ה שֶֽׁבַע־פָּר֤וֹת אֲחֵרוֹת֙ עֹל֣וֹת אַחֲרֵיהֶ֔ן דַּלּ֨וֹת וְרָע֥וֹת תֹּ֛אַר מְאֹ֖ד וְרַקּ֣וֹת בָּשָׂ֑ר לֹֽא־רָאִ֧יתִי כָהֵ֛נָּה בְּכׇל־אֶ֥רֶץ מִצְרַ֖יִם לָרֹֽעַ׃
20 וַתֹּאכַ֙לְנָה֙ הַפָּר֔וֹת הָרַקּ֖וֹת וְהָרָע֑וֹת אֵ֣ת שֶׁ֧בַע הַפָּר֛וֹת הָרִאשֹׁנ֖וֹת הַבְּרִיאֹֽת׃
21 וַתָּבֹ֣אנָה אֶל־קִרְבֶּ֗נָה וְלֹ֤א נוֹדַע֙ כִּי־בָ֣אוּ אֶל־קִרְבֶּ֔נָה וּמַרְאֵיהֶ֣ן רַ֔ע כַּאֲשֶׁ֖ר בַּתְּחִלָּ֑ה וָאִיקָֽץ׃
22 וָאֵ֖רֶא בַּחֲלֹמִ֑י וְהִנֵּ֣ה שֶׁ֣בַע שִׁבֳּלִ֗ים עֹלֹ֛ת בְּקָנֶ֥ה אֶחָ֖ד מְלֵאֹ֥ת וְטֹבֽוֹת׃
23 וְהִנֵּה֙ שֶׁ֣בַע שִׁבֳּלִ֔ים צְנֻמ֥וֹת דַּקּ֖וֹת שְׁדֻפ֣וֹת קָדִ֑ים צֹמְח֖וֹת אַחֲרֵיהֶֽם׃
24 וַתִּבְלַ֙עְןָ֙ הַשִּׁבֳּלִ֣ים הַדַּקֹּ֔ת אֵ֛ת שֶׁ֥בַע הַֽשִּׁבֳּלִ֖ים הַטֹּב֑וֹת וָֽאֹמַר֙ אֶל־הַֽחַרְטֻמִּ֔ים וְאֵ֥ין מַגִּ֖יד לִֽי׃
25 וַיֹּ֤אמֶר יוֹסֵף֙ אֶל־פַּרְעֹ֔ה חֲל֥וֹם פַּרְעֹ֖ה אֶחָ֣ד ה֑וּא אֵ֣ת אֲשֶׁ֧ר הָאֱלֹהִ֛ים עֹשֶׂ֖ה הִגִּ֥יד לְפַרְעֹֽה׃
26 שֶׁ֧בַע פָּרֹ֣ת הַטֹּבֹ֗ת שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִּׁבֳּלִים֙ הַטֹּבֹ֔ת שֶׁ֥בַע שָׁנִ֖ים הֵ֑נָּה חֲל֖וֹם אֶחָ֥ד הֽוּא׃
27 וְשֶׁ֣בַע הַ֠פָּר֠וֹת הָֽרַקּ֨וֹת וְהָרָעֹ֜ת הָעֹלֹ֣ת אַחֲרֵיהֶ֗ן שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִּׁבֳּלִים֙ הָרֵק֔וֹת שְׁדֻפ֖וֹת הַקָּדִ֑ים יִהְי֕וּ שֶׁ֖בַע שְׁנֵ֥י רָעָֽב׃
28 ה֣וּא הַדָּבָ֔ר אֲשֶׁ֥ר דִּבַּ֖רְתִּי אֶל־פַּרְעֹ֑ה אֲשֶׁ֧ר הָאֱלֹהִ֛ים עֹשֶׂ֖ה הֶרְאָ֥ה אֶת־פַּרְעֹֽה׃
29 הִנֵּ֛ה שֶׁ֥בַע שָׁנִ֖ים בָּא֑וֹת שָׂבָ֥ע גָּד֖וֹל בְּכׇל־אֶ֥רֶץ מִצְרָֽיִם׃
30 וְ֠קָ֠מוּ שֶׁ֜בַע שְׁנֵ֤י רָעָב֙ אַחֲרֵיהֶ֔ן וְנִשְׁכַּ֥ח כׇּל־הַשָּׂבָ֖ע בְּאֶ֣רֶץ מִצְרָ֑יִם וְכִלָּ֥ה הָרָעָ֖ב אֶת־הָאָֽרֶץ׃
31 וְלֹֽא־יִוָּדַ֤ע הַשָּׂבָע֙ בָּאָ֔רֶץ מִפְּנֵ֛י הָרָעָ֥ב הַה֖וּא אַחֲרֵי־כֵ֑ן כִּֽי־כָבֵ֥ד ה֖וּא מְאֹֽד׃
32 וְעַ֨ל הִשָּׁנ֧וֹת הַחֲל֛וֹם אֶל־פַּרְעֹ֖ה פַּעֲמָ֑יִם כִּֽי־נָכ֤וֹן הַדָּבָר֙ מֵעִ֣ם הָאֱלֹהִ֔ים וּמְמַהֵ֥ר הָאֱלֹהִ֖ים לַעֲשֹׂתֽוֹ׃
33 וְעַתָּה֙ יֵרֶ֣א פַרְעֹ֔ה אִ֖ישׁ נָב֣וֹן וְחָכָ֑ם וִישִׁיתֵ֖הוּ עַל־אֶ֥רֶץ מִצְרָֽיִם׃
34 יַעֲשֶׂ֣ה פַרְעֹ֔ה וְיַפְקֵ֥ד פְּקִדִ֖ים עַל־הָאָ֑רֶץ וְחִמֵּשׁ֙ אֶת־אֶ֣רֶץ מִצְרַ֔יִם בְּשֶׁ֖בַע שְׁנֵ֥י הַשָּׂבָֽע׃
35 וְיִקְבְּצ֗וּ אֶת־כׇּל־אֹ֙כֶל֙ הַשָּׁנִ֣ים הַטֹּב֔וֹת הַבָּאֹ֖ת הָאֵ֑לֶּה וְיִצְבְּרוּ־בָ֞ר תַּ֧חַת יַד־פַּרְעֹ֛ה אֹ֥כֶל בֶּעָרִ֖ים וְשָׁמָֽרוּ׃
36 וְהָיָ֨ה הָאֹ֤כֶל לְפִקָּדוֹן֙ לָאָ֔רֶץ לְשֶׁ֙בַע֙ שְׁנֵ֣י הָרָעָ֔ב אֲשֶׁ֥ר תִּהְיֶ֖יןָ בְּאֶ֣רֶץ מִצְרָ֑יִם וְלֹֽא־תִכָּרֵ֥ת הָאָ֖רֶץ בָּרָעָֽב׃
37 וַיִּיטַ֥ב הַדָּבָ֖ר בְּעֵינֵ֣י פַרְעֹ֑ה וּבְעֵינֵ֖י כׇּל־עֲבָדָֽיו׃
38 וַיֹּ֥אמֶר פַּרְעֹ֖ה אֶל־עֲבָדָ֑יו הֲנִמְצָ֣א כָזֶ֔ה אִ֕ישׁ אֲשֶׁ֛ר ר֥וּחַ אֱלֹהִ֖ים בּֽוֹ׃
39 וַיֹּ֤אמֶר פַּרְעֹה֙ אֶל־יוֹסֵ֔ף אַחֲרֵ֨י הוֹדִ֧יעַ אֱלֹהִ֛ים אוֹתְךָ֖ אֶת־כׇּל־זֹ֑את אֵין־נָב֥וֹן וְחָכָ֖ם כָּמֽוֹךָ׃
40 אַתָּה֙ תִּהְיֶ֣ה עַל־בֵּיתִ֔י וְעַל־פִּ֖יךָ יִשַּׁ֣ק כׇּל־עַמִּ֑י רַ֥ק הַכִּסֵּ֖א אֶגְדַּ֥ל מִמֶּֽךָּ׃
41 וַיֹּ֥אמֶר פַּרְעֹ֖ה אֶל־יוֹסֵ֑ף רְאֵה֙ נָתַ֣תִּי אֹֽתְךָ֔ עַ֖ל כׇּל־אֶ֥רֶץ מִצְרָֽיִם׃
42 וַיָּ֨סַר פַּרְעֹ֤ה אֶת־טַבַּעְתּוֹ֙ מֵעַ֣ל יָד֔וֹ וַיִּתֵּ֥ן אֹתָ֖הּ עַל־יַ֣ד יוֹסֵ֑ף וַיַּלְבֵּ֤שׁ אֹתוֹ֙ בִּגְדֵי־שֵׁ֔שׁ וַיָּ֛שֶׂם רְבִ֥ד הַזָּהָ֖ב עַל־צַוָּארֽוֹ׃
43 וַיַּרְכֵּ֣ב אֹת֗וֹ בְּמִרְכֶּ֤בֶת הַמִּשְׁנֶה֙ אֲשֶׁר־ל֔וֹ וַיִּקְרְא֥וּ לְפָנָ֖יו אַבְרֵ֑ךְ וְנָת֣וֹן אֹת֔וֹ עַ֖ל כׇּל־אֶ֥רֶץ מִצְרָֽיִם׃
44 וַיֹּ֧אמֶר פַּרְעֹ֛ה אֶל־יוֹסֵ֖ף אֲנִ֣י פַרְעֹ֑ה וּבִלְעָדֶ֗יךָ לֹֽא־יָרִ֨ים אִ֧ישׁ אֶת־יָד֛וֹ וְאֶת־רַגְל֖וֹ בְּכׇל־אֶ֥רֶץ מִצְרָֽיִם׃
45 וַיִּקְרָ֨א פַרְעֹ֣ה שֵׁם־יוֹסֵף֮ צָֽפְנַ֣ת פַּעְנֵ֒חַ֒ וַיִּתֶּן־ל֣וֹ אֶת־אָֽסְנַ֗ת בַּת־פּ֥וֹטִי פֶ֛רַע כֹּהֵ֥ן אֹ֖ן לְאִשָּׁ֑ה וַיֵּצֵ֥א יוֹסֵ֖ף עַל־אֶ֥רֶץ מִצְרָֽיִם׃
46 וְיוֹסֵף֙ בֶּן־שְׁלֹשִׁ֣ים שָׁנָ֔ה בְּעׇמְד֕וֹ לִפְנֵ֖י פַּרְעֹ֣ה מֶֽלֶךְ־מִצְרָ֑יִם וַיֵּצֵ֤א יוֹסֵף֙ מִלִּפְנֵ֣י פַרְעֹ֔ה וַֽיַּעֲבֹ֖ר בְּכׇל־אֶ֥רֶץ מִצְרָֽיִם׃
47 וַתַּ֣עַשׂ הָאָ֔רֶץ בְּשֶׁ֖בַע שְׁנֵ֣י הַשָּׂבָ֑ע לִקְמָצִֽים׃
48 וַיִּקְבֹּ֞ץ אֶת־כׇּל־אֹ֣כֶל שֶׁ֣בַע שָׁנִ֗ים אֲשֶׁ֤ר הָיוּ֙ בְּאֶ֣רֶץ מִצְרַ֔יִם וַיִּתֶּן־אֹ֖כֶל בֶּעָרִ֑ים אֹ֧כֶל שְׂדֵה־הָעִ֛יר אֲשֶׁ֥ר סְבִיבֹתֶ֖יהָ נָתַ֥ן בְּתוֹכָֽהּ׃
49 וַיִּצְבֹּ֨ר יוֹסֵ֥ף בָּ֛ר כְּח֥וֹל הַיָּ֖ם הַרְבֵּ֣ה מְאֹ֑ד עַ֛ד כִּי־חָדַ֥ל לִסְפֹּ֖ר כִּי־אֵ֥ין מִסְפָּֽר׃
50 וּלְיוֹסֵ֤ף יֻלַּד֙ שְׁנֵ֣י בָנִ֔ים בְּטֶ֥רֶם תָּב֖וֹא שְׁנַ֣ת הָרָעָ֑ב אֲשֶׁ֤ר יָֽלְדָה־לּוֹ֙ אָֽסְנַ֔ת בַּת־פּ֥וֹטִי פֶ֖רַע כֹּהֵ֥ן אֽוֹן׃
51 וַיִּקְרָ֥א יוֹסֵ֛ף אֶת־שֵׁ֥ם הַבְּכ֖וֹר מְנַשֶּׁ֑ה כִּֽי־נַשַּׁ֤נִי אֱלֹהִים֙ אֶת־כׇּל־עֲמָלִ֔י וְאֵ֖ת כׇּל־בֵּ֥ית אָבִֽי׃
52 וְאֵ֛ת שֵׁ֥ם הַשֵּׁנִ֖י קָרָ֣א אֶפְרָ֑יִם כִּֽי־הִפְרַ֥נִי אֱלֹהִ֖ים בְּאֶ֥רֶץ עׇנְיִֽי׃
53 וַתִּכְלֶ֕ינָה שֶׁ֖בַע שְׁנֵ֣י הַשָּׂבָ֑ע אֲשֶׁ֥ר הָיָ֖ה בְּאֶ֥רֶץ מִצְרָֽיִם׃
54 וַתְּחִלֶּ֜ינָה שֶׁ֣בַע שְׁנֵ֤י הָרָעָב֙ לָב֔וֹא כַּאֲשֶׁ֖ר אָמַ֣ר יוֹסֵ֑ף וַיְהִ֤י רָעָב֙ בְּכׇל־הָ֣אֲרָצ֔וֹת וּבְכׇל־אֶ֥רֶץ מִצְרַ֖יִם הָ֥יָה לָֽחֶם׃
55 וַתִּרְעַב֙ כׇּל־אֶ֣רֶץ מִצְרַ֔יִם וַיִּצְעַ֥ק הָעָ֛ם אֶל־פַּרְעֹ֖ה לַלָּ֑חֶם וַיֹּ֨אמֶר פַּרְעֹ֤ה לְכׇל־מִצְרַ֙יִם֙ לְכ֣וּ אֶל־יוֹסֵ֔ף אֲשֶׁר־יֹאמַ֥ר לָכֶ֖ם תַּעֲשֽׂוּ׃
56 וְהָרָעָ֣ב הָיָ֔ה עַ֖ל כׇּל־פְּנֵ֣י הָאָ֑רֶץ וַיִּפְתַּ֨ח יוֹסֵ֜ף אֶֽת־כׇּל־אֲשֶׁ֤ר בָּהֶם֙ וַיִּשְׁבֹּ֣ר לְמִצְרַ֔יִם וַיֶּחֱזַ֥ק הָֽרָעָ֖ב בְּאֶ֥רֶץ מִצְרָֽיִם׃
57 וְכׇל־הָאָ֙רֶץ֙ בָּ֣אוּ מִצְרַ֔יְמָה לִשְׁבֹּ֖ר אֶל־יוֹסֵ֑ף כִּֽי־חָזַ֥ק הָרָעָ֖ב בְּכׇל־הָאָֽרֶץ׃
פירוש רד"ק על בראשית מ״א
1 וַיְהִי מִקֵּץ. מִסּוֹף שְׁנָתַיִם יָמִים שֶׁעָשָׂה פַּרְעֹה מִשְׁתֶּה הַזֶּה חָלַם זֶה הַחֲלוֹם.
2 וְהִנֵּה עֹמֵד עַל־הַיְאֹר. סָמוּךְ עַל הַיְּאֹר, כְּמוֹ ״וְעָלָיו מַטֵּה מְנַשֶּׁה״ במדבר ב:כ וְהַדּוֹמִים לוֹ. יִתְבָּרַךְ נוֹרָא עֲלִילָה עַל בְּנֵי אָדָם אֲשֶׁר סִבֵּב כָּל הַסִּבּוֹת הָאֵלּוּ מִסִּבָּה לְסִבָּה עַד שֶׁיָּרְדוּ אֲבוֹתֵינוּ לָגוּר שָׁם וּבָאוּ שָׁם בְּכָבוֹד וְהָיוּ שָׁם בְּכָבוֹד עַד שֶׁמֵּת יוֹסֵף מֶשֶׁךְ מֵאָה שָׁנָה עַד שֶׁגָּרְמוּ עֲוֹנוֹת וּבָאוּ יְמֵי הַשִּׁעְבּוּד. וְהַחֲלוֹם הָיָה מֵאֵת הָאֵל כִּדְמוּת נְבוּאָה כְּמוֹ שֶׁאָמַר הַכָּתוּב, ״וַיִּקְרָא רָעָב עַל הָאָרֶץ״ תהילים קה:טז וְכִי נִתְקַיֵּם הַחֲלוֹם כַּאֲשֶׁר פָּתַר יוֹסֵף, וְהַחֲלוֹם מְבֹאָר הַפִּתְרוֹן הָיָה לְכָל מֵבִין אֶלָּא שֶׁאָבְדָה חָכְמַת חֲכָמָיו כְּדֵי שֶׁיִּפְתְּרֵהוּ וְיַעֲלֶה לִגְדֻלָּה עַל יְדֵי הַפִּתְרוֹן, וְעַל כַּיּוֹצֵא זֶה נֶאֱמַר ישעיה מד:כה ״מֵשִׁיב חֲכָמִים אָחוֹר וְדַעְתָּם יְסַכֵּל״.
3 מִן הַיְאֹר עֹלֹת. הָיָה זֶה מֵעִנְיַן הַפִּתְרוֹן, כִּי יְאוֹר מִצְרַיִם עוֹלֶה וּמַשְׁקֶה אֶת הָאָרֶץ, וְהַפָּרוֹת הַדּוֹלוֹת דָּלוֹת הַתְּבוּאָה.
4 וַתִּרְעֶינָה בָּאָחוּ. כִּי מוֹצְאוֹת חָצִיר לָרֹב.
5 וַתַּעֲמֹדְנָה. לֹא אָמַר וַתִּרְעֶינָה, אֶלָּא שֶׁהָיוּ עוֹמְדוֹת סְמוּכוֹת לָרִאשׁוֹנוֹת. כָּל זֶה מְבֹאָר הַפִּתְרוֹן.
6 וַתֹּאכַלְנָה. וְזֶה עִנְיַן הַפִּתָּרוֹן, כִּי בְּשֶׁבַע שְׁנֵי הָרָעָב אָכְלוּ תְּבוּאוֹת שְׁנוֹת הַשֶּׁבַע.
7 וַיִּקַץ פַּרְעֹה. יָקַץ בֵּין חֲלוֹם לַחֲלוֹם, שֶׁאִם הָיָה כֻּלּוֹ חֲלוֹם אֶחָד יִדְמֶה הָאַחֲרוֹן מוֹסִיף עִנְיָן עַל הָרִאשׁוֹן, אֲבָל כְּשֶׁהָיוּ שְׁנֵי חֲלוֹמוֹת לֹא הוֹסִיף עִנְיַן הָאַחֲרוֹן עַל הָרִאשׁוֹן אֶלָּא שָׁנָה אוֹתוֹ לְעִנְיַן מְהִירוּת הַדָּבָר, כְּמוֹ שֶׁנֶּאֱמַר ״וַיִּישָׁן וְהִנֵּה חֲלוֹם״ בראשית מא:ה, ״וַתִּבְלַעְנָה וְהִנֵּה חֲלוֹם״ בראשית מא:ז. וְהִנֵּה הַחֲלוֹם נִשְׁלַם, וְלֹא חָלַם עוֹד אוֹתוֹ הַלַּיְלָה.
8 וַתִּפָּעֶם רוּחוֹ. נִשְׁבְּרָה רוּחוֹ מִדַּאֲגָתוֹ עַל הַחֲלוֹם, כִּי רָאָה חֲלוֹם עַל דֶּרֶךְ אַחַת וְהוּא חָלוּק בַּמַּרְאֶה וְנִבְהַל עַל פִּתְרוֹנוֹ.
9 וַיִּשְׁלַח וַיִּקְרָא. קָרָא לָהֶם עַל יְדֵי שְׁלוּחִין.
10 וְאֵין פּוֹתֵר אוֹתָם. מֵהֶם, כְּמוֹ ״הֵם יָצְאוּ אֶת הָעִיר״ בראשית מד:ד.
11 אֶת־חֲטָאַי. אַף עַל פִּי שֶׁאֵינוֹ מִן הַמּוּסָר לְהַזְכִּיר אָדָם חֲטָאָיו שֶׁחָטָא אֶל הַמֶּלֶךְ לְפָנָיו אַחַר שֶׁעָבְרָה עֵת הַסְּלִיחָה, עַתָּה אָמַר אֲנִי מַזְכִּיר אוֹתָם לְצֹרֶךְ הַמֶּלֶךְ.
12 אֹתִי וְאֵת שַׂר הָאֹפִים. אַף עַל פִּי שֶׁזָּכַר אֹתִי שָׁנָה עוֹד מִפְּנֵי הַדְּבָרִים, כִּי כֵן דֶּרֶךְ הַלָּשׁוֹן, כְּמוֹ ״וְאִם בֶּאֱמֶת וּבְתָמִים״ שופטים ט:יט שֶׁשָּׁנָה אוֹתוֹ מִפְּנֵי הַדְּבָרִים שֶׁהָיוּ בֵּינֵיהֶם, וְכֵן ״וְאֵין אֲנִי וְאַחַי וּנְעָרַי וְגוֹ׳״ וְשָׁנָה ״אֵין אֲנַחְנוּ פֹּשְׁטִים בְּגָדֵינוּ״ נחמיה ד:טז מִפְּנֵי הַדְּבָרִים שֶׁהָיוּ בֵּינֵיהֶם.
13 כְּפִתְרוֹן חֲלֹמוֹ. פֵּרַשְׁנוּהוּ בראשית מ:ה.
14 וְשָׁם נַעַר. לְפִי שֶׁהָיָה מְשָׁרֵת אוֹתָם בַּמִּשְׁמָר אָמַר כֵּן, וְאָמַר עֶבֶד לְשַׂר הַטַּבָּחִים לְפִי שֶׁהָיָה יוֹדֵעַ בַּעֲבוּרוֹ וְשֶׁיִּשְׁאָלוּהוּ, הַקּוֹרֵא אוֹתוֹ שָׁם בִּשְׁמוֹ.
15 אִישׁ כַּחֲלֹמוֹ. חָסֵר לָמֶ״ד הַשִּׁמּוּשׁ, רוֹצֶה לוֹמַר לְאִישׁ כַּחֲלֹמוֹ, כְּלוֹמַר לְכָל אֶחָד פָּתַר כְּעִנְיַן חֲלוֹמוֹ, זֶה לְמַשְׁקֶה וְזֶה לְמַאֲכָל.
16 וַיְרִיצֻהוּ. הוֹצִיאוּ אוֹתוֹ בִּמְרוּצָה מִשָּׁם, כִּי דְבַר הַמֶּלֶךְ נָחוּץ.
17 וַיְחַלֵּף שִׂמְלֹתָיו. כִּי אֵין לָבֹא לִפְנֵי הַמֶּלֶךְ אֶלָּא אִם כֵּן מְהֻדָּר בְּגוּפוֹ וּבִלְבוּשָׁיו.
18 שָׁמַעְתִּי עָלֶיךָ לֵאמֹר. שֶׁאוֹמְרִים שֶׁאַתָּה מֵבִין חֲלוֹם לִפְתֹּר אוֹתוֹ אֶל נָכוֹן.
19 תִּשְׁמַע. כְּמוֹ תָּבִין, וְכֵן ״גּוֹי אֲשֶׁר לֹא תִשְׁמַע לְשֹׁנוֹ״ דברים כח:מט.
20 בִּלְעָדָי. זוּלָתִי, לִפְתֹּר אוֹתוֹ לְפִי שִׂכְלִי.
21 אֱלֹהִים יַעֲנֶה אֶת־שְׁלוֹם. וְהוּא יְקִימֶנּוּ לְשָׁלוֹם לְךָ. וּפֵרֵשׁ יַעֲנֶה כְּמוֹ ״מַעֲנֵה בְּשִׂמְחַת לִבּוֹ״ קהלת ה:יט שֶׁיִּהְיֶה חָפֵץ וּמְכֻוָּן בִּשְׁלוֹם פַּרְעֹה, אוֹ שֶׁיָּשִׂים בְּפִי פִּתְרוֹנוֹ לִשְׁלוֹם פַּרְעֹה, וְהוּא עַל דֶּרֶךְ ״וּמֵה׳ מַעֲנֵה לָשׁוֹן״ משלי טז:א.
22 וַיְדַבֵּר. כְּבָר כָּתַבְנוּ כִּי בִּשְׁנוֹת אָדָם הַדְּבָרִים יוֹסִיף אוֹ יִגְרַע אוֹ יְשַׁנֶּה, וְאֵינוֹ שׁוֹמֵר אֶלָּא שֶׁיִּהְיֶה הָעִנְיָן אֶחָד, וְכֵן בְּסִפּוּר זֶה הַחֲלוֹם.
23 וְרַקּוֹת בָּשָׂר. בְּרֵי״שׁ, שָׁרְשׁוֹ רָקַק מִן ״וּרְקִיקֵי מַצּוֹת״ שמות כט:ב.
24 הָרַקּוֹת. בְּרֵי״שׁ, כְּמוֹ ״רַקּוֹת בָּשָׂר״ שֶׁפֵּרַשְׁנוּ.
25 וְלֹא נוֹדַע. עַל זֶה אָמַר בַּפִּתָּרוֹן ״וְלֹא יִוָּדַע הַשָּׂבָע״ בראשית מא:לא.
26 צְנֻמוֹת. לְשׁוֹן רַבּוֹתֵינוּ זִכְרוֹנָם לִבְרָכָה ברכות לט ״פַּת צְנוּמָה בִּקְעָרָה״, וְכָל הַסִּפּוּר וְהַפִּתְרוֹן מְבֹאָר הוּא.
27 הַפָּרוֹת הָרַקּוֹת. בְּרֵי״שׁ מִן רָקָק כְּמוֹ הָאֲחֵרִים.
28 הַשִּׁבֳּלִים הָרֵקוֹת. מִן ״וְהַבּוֹר רֵק״ בראשית לז:כד.
29 קַדְמָאָה כה הִגִּיד, תִּנְיָנָא כח הֶרְאָה, וְחַד פָּסִיק סִימָן ״מֵהַגִּיד אֶת הַמַּרְאָה״ שמואל א ג:טו.
30 וְעַל הִשָּׁנוֹת הַחֲלוֹם... פַּעֲמָיִם. אָמַר פַּעֲמַיִם אַחַר שֶׁאָמַר הִשָּׁנוֹת לְתוֹסֶפֶת בֵּאוּר.
31 וְחִמֵּשׁ. יִקַּח אֶחָד מִן חֲמִשָּׁה.
32 וְיִקְבְּצוּ. עַל הַחֲמִישִׁית אָמַר שֶׁיִּקְבְּצוּ כָּל הַחֲמִישִׁית שֶׁיִּקַּח פַּרְעֹה בְּשֶׁבַע הַשָּׁנִים הַטּוֹבוֹת, וְיִצְבְּרוּ כָּל הָאֹכֶל תַּחַת יַד־פַּרְעֹה בְּכָל עִיר וְעִיר וְיִהְיֶה שָׁמוּר לְשֶׁבַע שְׁנֵי הָרָעָב, מִלְּבַד מַה שֶּׁיֶּאֱצֹר כָּל אֶחָד לְעַצְמוֹ, וּבְכָל עִיר וְעִיר יִהְיוּ אוֹצָרוֹת לְפַרְעֹה שֶׁיִּצְבֹּר שָׁם כָּל הַחֲמִישִׁית שֶׁיִּקַּח בְּשֶׁבַע שְׁנֵי הַשָּׂבָע.
33 לְפִקָּדוֹן. יִהְיֶה לָכֶם כְּמוֹ פִּקָּדוֹן שֶׁיִּמְצְאוּ אוֹתוֹ לְעֵת הַצֹּרֶךְ, וְאַף עַל פִּי שֶׁיִּקְנוּ אוֹתוֹ טוֹב יִהְיֶה לָהֶם שֶׁיִּמְצְאוּ אוֹתוֹ בָּר.
34 וַיִּיטַב. הֵבִינוּ כִּי עֲצָתוֹ טוֹבָה, וְעַל הַפִּתְרוֹן הֶאֱמִינוּהוּ, כִּי רָאוּ כִּי קָרוֹב מְאֹד הַפִּתְרוֹן לַחֲלוֹם, וְעוֹד כִּי שָׁמְעוּ מִשַּׂר הַמַּשְׁקִים כִּי כַּאֲשֶׁר פָּתַר לָהֶם כֵּן הָיָה, וְעוֹד שֶׁלֹּא הֶאֱרִיךְ הַמַּעֲשֶׂה אֶלָּא אָמַר ״הִנֵּה שֶׁבַע שָׁנִים בָּאוֹת״ בראשית מא:כט.
35 הֲנִמְצָא כָזֶה. הַנּוּ״ן לַמְדַבְּרִים, אָמַר, הוּא אָמַר שֶׁנָּשִׂים אִישׁ חָכָם וְנָבוֹן עַל אֶרֶץ מִצְרַיִם וְאָנָה נִמְצָא כָּמֹהוּ, כִּי חָכְמָתוֹ גְדוֹלָה מִכָּל הַחַרְטֻמִּים וְהַחֲכָמִים, הִנֵּה אֵין זֶה כִּי אִם רוּחַ אֱלֹהִים שֶׁיֵּשׁ בּוֹ.
36 יִשַּׁק. עִנְיַן נֶשֶׁק, כְּתַרְגּוּמוֹ.
37 הַכִּסֵּא אֶגְדַּל מִמֶּךָּ. בִּדְבַר הַכִּסֵּא אֶהְיֶה גָּדוֹל מִמֶּךָּ.
38 רְאֵה נָתַתִּי. רְאֵה כִּי הִמְשַׁלְתִּיךָ עָלֶיהָ, הַנְהִיגֶהָ כְּפִי שִׂכְלְךָ.
39 וַיָּסַר הַטַּבַּעַת. הִיא אוֹת וְסִימָן לַמֶּמְשָׁלָה, וְיַחְתֹּם בָּהּ לַאֲשֶׁר יִרְצֶה.
40 בְּמִרְכֶּבֶת הַמִּשְׁנֶה. בְּמִרְכֶּבֶת הַשַּׂר שֶׁהָיָה מִשְׁנֶה לַמֶּלֶךְ, אוֹ פֵּרוּשׁוֹ כְּתַרְגּוּמוֹ.
41 אַבְרֵךְ. הָאָלֶ״ף בִּמְקוֹם הֵ״א, וְהוּא מָקוֹר כְּמוֹ וְנָתוֹן אֹתוֹ. כְּלוֹמַר כָּל אֶחָד הָיָה אוֹמֵר זֶה רָאוּי לְתִתּוֹ עַל כָּל אֶרֶץ מִצְרָיִם.
42 אֲנִי פַרְעֹה. אַף עַל פִּי שֶׁאֲנִי מֶלֶךְ, בְּלֹא רְשׁוּתְךָ לֹא יָרִים אִישׁ אֶת יָדוֹ וְאֶת רַגְלוֹ לְכָל דָּבָר.
43 צָפְנַת פַּעְנֵחַ. לְשׁוֹן מִצְרִי הוּא, כְּמוֹ שֶׁקָּרָא נְבוּכַדְנֶאצַּר לְדָנִיֵּאל וַחֲבֵרָיו שֵׁם בִּלְשׁוֹן אֲרָמִי דניאל א:ז, וְהַמְפָרְשִׁים שֶׁפֵּרְשׁוּ שֶׁהוּא לְשׁוֹן הַקֹּדֶשׁ תֵּמַהּ הוּא אֵיךְ קָרָא פַרְעֹה שֵׁם בִּלְשׁוֹן הַקֹּדֶשׁ.
44 וַיֵּצֵא יוֹסֵף. יָצָא לְהַחֲזִיק בְּמֶמְשַׁלְתּוֹ שֶׁנָּתַן לוֹ פַּרְעֹה.
45 וַיֵּצֵא מִלִּפְנֵי פַרְעֹה. יָצָא מִלַּעֲמֹד לְפָנָיו תָּמִיד כִּשְׁאָר הַשָּׂרִים.
46 וַיַּעֲבֹר בְּכָל־אֶרֶץ מִצְרָיִם. עַל עִנְיְנֵי הַמַּלְכוּת לִפְקֹד וְלַחְקֹר עֲלֵיהֶם, לְפִי שֶׁפַּרְעֹה שָׂמָהוּ אָדוֹן עַל הַכֹּל.
47 וַתַּעַשׂ הָאָרֶץ. עָשְׂתָה הָאָרֶץ הַתְּבוּאָה לִקְמָצִים, כְּלוֹמַר מִגַּרְגַּר אֶחָד הוֹצִיאָה קְמָצִים רַבִּים.
48 וַיִּקְבֹּץ אֶת־כָּל־אֹכֶל. פֵּרַשְׁנוּהוּ.
49 וַיִּתֶּן־אֹכֶל בֶּעָרִים. כִּי הָאוֹצָרוֹת עָשָׂה בֶּעָרִים וְלֹא בַּכְּפָרִים, וּמַה שֶּׁהָיָה מְקַבֵּץ מִן הַחֲמִשִּׁיּוֹת מִשְּׂדוֹת הַכְּפָרִים הָיָה נוֹתֵן בָּאוֹצָרוֹת בֶּעָרִים.
50 כְּחוֹל הַיָּם. דֶּרֶךְ הַפְלָגָה.
51 וּלְיוֹסֵף יֻלַּד. דֶּרֶךְ כְּלָל, וְאוּלַי תְּאוֹמִים נוֹלְדוּ, לְפִיכָךְ אָמַר יֻלַּד, כִּי נוֹלְדוּ בְּלֵידָה אַחַת.
52 שְׁנַת הָרָעָב. הָרִאשׁוֹנָה. וְאָמַר בְּטֶרֶם תָּבוֹא כִּי בַּשָּׁנָה הָאַחֲרוֹנָה שֶׁל הַשֶּׁבַע נוֹלְדוּ. וְהִנֵּה הָיָה יוֹסֵף בֶּן שְׁלֹשִׁים וְשֶׁבַע כְּשֶׁנּוֹלְדוּ, וְהֵם הָיוּ בְּנֵי שִׁבְעִים וְשָׁלֹשׁ כְּשֶׁמֵּת יוֹסֵף. וְרַבּוֹתֵינוּ זִכְרוֹנָם לִבְרָכָה דָּרְשׁוּ מִזֶּה תענית יא שֶׁאָסוּר לְאָדָם לְשַׁמֵּשׁ מִטָּתוֹ בִּשְׁנַת רַעֲבוֹן.
53 אֲשֶׁר יָלְדָה־לּוֹ אָסְנַת. לְהוֹדִיעַ כִּי לֹא הָיְתָה לוֹ אִשָּׁה אַחֶרֶת, כִּי שְׁנֵיהֶם הָיוּ לוֹ מִמֶּנָּה.
54 כִּי נַשַּׁנִי. כָּל כָּךְ נָתַן לִי ה׳ עֹשֶׁר וְכָבוֹד עַד כִּי הִשְׁכִּיחַנִי כָּל עֲמָלִי שֶׁהָיָה לִי מִשֶּׁנִּמְכַּרְתִּי, וְגַם כָּל בֵּית אָבִי הִשְׁכִּיחַנִי.
55 נַשַּׁנִי. הַפַּתָּ״ח בִּמְקוֹם חִירִיק עַל מִשְׁקַל צִוַּנִי, וְיֵשׁ אוֹמְרִים כִּי שָׁרְשׁוֹ בְּשֶׁקֶל חַנַּנִי.
56 בְּאֶרֶץ עָנְיִי. שֶׁהָיְתָה לִי מִתְּחִלָּה אֶרֶץ עָנְיִי, וְעַתָּה הִפְרַנִי הָאֵל בָּהּ בְּבָנִים וּבְעֹשֶׁר וּבְכָבוֹד.
57 אֲשֶׁר הָיָה. דֶּרֶךְ כְּלָל.
58 וּבְכָל־אֶרֶץ מִצְרַיִם. בְּכָל הָאֲרָצוֹת הַקְּרוֹבוֹת לְאֶרֶץ מִצְרַיִם הָיָה לָחֶם מֵאֲשֶׁר אָצַר כָּל אֶחָד לְעַצְמוֹ.
59 וַתִּרְעַב. כִּי כָּלוּ לֶאֱכֹל אֶת אֲשֶׁר אָצְרוּ, כִּי לֹא יָכְלוּ לֶאֱצֹר לְכָל שֶׁבַע הַשָּׁנִים מִפְּנֵי הַחֲמִישִׁית שֶׁנָּתְנוּ לְפַרְעֹה.
60 וַיִּצְעַק הָעָם. כִּי יָדְעוּ כִּי יוֹסֵף אָצַר אוֹצָרוֹת מִן הַחֲמִישִׁית, וּלְצֹרֶךְ הָעָם אָצְרוּ שֶׁיִּמְצְאוּ תְּבוּאָה לִקְנוֹת, לְפִיכָךְ צָעֲקוּ אֶל פַּרְעֹה בַּעֲבוּר הַלָּחֶם.
61 וַיִּפְתַּח. פָּתַח אֶת כָּל אוֹצָרוֹת שֶׁבָּהֶם תְּבוּאָה.
62 וַיִּשְׁבֹּר לְמִצְרַיִם. תְּחִלָּה מָכַר לָהֶם עַד שֶׁנּוֹדַע בָּאֲרָצוֹת כִּי בְּמִצְרַיִם תְּבוּאָה, וּמָכַר גַּם לָהֶם. וּלְשׁוֹן שֶׁבֶר מִבִּנְיַן הַקַּל נוֹפֵל עַל הַמּוֹכֵר וְעַל הַקּוֹנֶה, כִּי הַפְּעֻלָּה בָּזֶה עַל שֵׁם הַתְּבוּאָה שֶׁנִּקְרֵאת שֶׁבֶר, לְפִי שֶׁהִיא שׁוֹבֶרֶת הָרָעָב, עַל דֶּרֶךְ ״יִשְׁבְּרוּ פְרָאִים צְמָאָם״ תהלים קד:יא. וְהִנֵּה הַמּוֹכֵר נוֹתֵן הַשֶּׁבֶר וְהַקּוֹנֶה לוֹקֵחַ הַשֶּׁבֶר, וְהַפְּעֻלָּה עַל שְׁנֵיהֶם. אֲבָל בְּעִנְיַן הַפָּעוּל מִמֶּנּוּ אֵינוֹ נוֹפֵל אֶלָּא עַל הַמּוֹכֵר, לְפִי שֶׁהַפְּעֻלָּה יוֹצֵאת מֵאִתּוֹ. וּבִנְיַן הִפְעִיל בְּרֹב הוּא יוֹצֵא.
63 וַיֶּחֱזַק הָרָעָב. מִשֶּׁבָּאוּ לִקְנוֹת, לְפִיכָךְ אָמַר אַחֲרָיו ״וְכָל הָאָרֶץ״ בראשית מא:נז, כִּי לְפִי שֶׁרַבּוּ הַקּוֹנִים חָזַק הָרָעָב בְּמִצְרַיִם, כִּי לֹא הָיוּ מוֹכְרִים לָהֶם אֶלָּא בְּצִמְצוּם מִפְּנֵי שֶׁהָיָה צָרִיךְ גַּם כֵּן לִמְכֹּר בִּשְׁאָר אֲרָצוֹת, וּמִפְּנֵי זְמַן הָרָעָב שֶׁיִּהְיֶה אָרֹךְ.
64 בָּאוּ לִשְׁבֹּר אֶל־יוֹסֵף. כְּמוֹ הֲפִיךְ: בָּאוּ אֶל־יוֹסֵף לִשְׁבֹּר.